ቦሎኛ !!

ናይ 10 ሽሕ ድምጺ ብ100 ሽሕ ዜጋታት

ብወልደየሱስ ዓንደማርያም

ብዛዕባ  ህ.ግ.ደ.ፍ. ዘቃልሖ ዘሎ መበል 40 ዓመት ዳንኬራ ቦሎኛ ድኣ፡ ገለ  ዘይትሕንጥጥ?  ክብለኒ እዩ ዝቐነየ እቲ ሕልናይ። ድሕሪ መልእኽቲ ናይዞም ዓበይቲ ኣቡናት እሞ፡ እንታይ ክጽሓፍ። እንታይ እዩ ኸ ክንበብ? ድሕሪ ቃለ-መጠይቕ ደጀን ሰባር ካርሸሊ ኸ እንታይ እዩ ክዝረብ። ንሳቶም ነቲ ዝጽሓፍ ይኹን ዝብሃል ወዲኦሞ እዮም። ድሕሪኦም!! ብዛዕባ ህዝብና ኣትይዎ ዘሎ ኩነታት፡ ዝጸሓፍካ እንተጽሓፍካ ዝተዛረብካ እንተተዛረብካ፡ ኣይክጥዕምን እዩ። እቲ ነዚ ኣቲናዮ ዘሎና ኩነታት ዘድሊ፡ ጽሕፈትን ዘረባን መግለጽን ዝተወድአ እዩ ዝመስል።

ነቲ መድረኽ ቃልሲ ከም ዝተቐየረ ኣፋፍኖት ዝሃቡ ጀጋኑ፡ ቁምነገሮም ደጋጊምካ ምንባብን ምስማዕን ጥራይ እዩ ዘድልየና። ካብኡ ተበጊስና ድማ፡ መሬት ንኽርሁ ሰላምን ርግኣትን ንኽርከብ፡ ጸረ ሃገር ተማሕዩ ንኽቕበር፡ ኣብ ዘዘሎናዮ ነቲ ርእይትኦምን ሓሳባቶምን ምትግባር እዩ። ንኹሉ ገግዚኡን መመድረኹን ኣለዎ። ዋላ ንሓሳባትን ኣተሓሳስባን። ክኸውን እንተድኣ ኾይኑ ከኣ ወፍሪ ሓሳባት ኣብቂዑ፡ ወፍሪ ትግባሬ ክእቶ እዩ ዝሕተት ዘሎ። ኣብ ውሽጢ ሃገር ተቓዉሞ ክስማዕን ክልዓልን ዘይከኣልን ዘይሕሰብን እዩ ዝብል ዝነበረ እምነትና እንሆ ተሰይሩ።  እቲ ናይ መጨረሽታ ጥምጥም ዝሓትት ተግባራዊ ቃልሲ ከኣ ካብ ውሽጢ ሃገር ይቃላሕ ኣሎ። እዛ ዓመት እዚኣ ብርኽቲ ዓመት እያ።

እቲ ዝብሃል ኢሎሞ ኣለዉ። እቲ ዝጽሓፍ እውን ከምኡ። ኣብ ውሽጥን ኣብ ወጻእን፡ ካብ ሃገራዊ፡ ጸረ-ሃገራዊ ስራሕ ገርጊሩ። ልዕላውነት ህዝቢ ተረጊጹን ተደርበዩን፡ ልዕላውነት ሃገር ሰንደልደል ኢሉ  ሃገርና ንሕማቕ ኩነታት ከምዘየተዳሉ ኾይና ኣላ። ኣብ ሃገርና መሰል ምንባር ተሳኢኑ፡ ሃገር ትባድም ኣላ። ኤርትራዊ ዜጋ ኣብ ዝሃለዎ ይሃሉ መዋጽኦ ንኽርከብ፡ ግብራዊ ፍታሕ ንኸምጽእ ክቃለስ ጥራይ ዘይኮነስ ሸለል ምስ ዝብሎ ብሓላፍነት ከም ዝሕተት ተነጊሩ ኣሎ።

ኤርትራ ኣርእስቲ ስደትን ማእሰአርትን ሞትን መቓብርን እያ ኾይና ዘላ። ነዚ ርኢኻን  ሬሳታት ኣሕዋትካ እንዳቐበርካን ዝተሰደድካ፡ ብኣማእት ኣሽሓት እትቑጸር ኣብ ኤሮፓ እትቕመጥ ኤርትራዊ መንእሰይ ፡ ኢሳይስ  ኣብ ልዕሊ ሬሳታት ኣሕዋትካ ክትዛነ ክትውዕል ከበሮኻ ጽሎ ክራርካ ኣቓኒ ይብለካ ኣሎ። ነዚ ጽላለ እዚ ዝሰማዕካ፡ ፈስቲቫል በሎኛ “ጸረ-ሃገር!!” እዩ ኢልካ ተስእ። ፈስቲቫል ቦሎኛ ንህዝቢ ኤርትራ ዝያዳ ንምብትታን ዝዓለመ፡ “ጸረ ህዝቢ እዩ!!” እንዳበልካ  ንዕብዳን ኢሳያስን ሰዓብቱን፡ ሓንሳብን ንሓዋሩን ኣብ ከባቢኻ ጽፍዒት ክትህቦም፡ ማዕበል ኮንካ ጽርጊያታት ቦሎኛ ኣንጎድጉዶ። እዚ ኸኣ ካብ ሓሳባት ናብ ግብሪ ምስ ትስጉም እዩ።

ብፍላይ ኣብዚ ግዜ እዚ፡ ምስቲ ሃገርን ህዝብን እትይዎ ዘሎ ኩነታት ተዛሚዱ፡ ኣብ ልዕሊ ስደተኛታት ኤርትራውያን፡ “ሰብ ምዃን”  ከም ዓቢይ ሞራላዊ ሕቶ ኾይኑ ንነፍሲ-ወከፍና ይቐርበና ኣሎ። ንኢሳያስን ሰዓብቱን እምበር ዶ ሰብ እዮም ንብሎም ኢና። ጠፊኡና ዘይኮነስ ተግባራቶም ስለዝገርመናን ዝድንጽወናን፡ መግለጺ ስለእንስእነሉን እዩ። ሰብ ምዃኖም ከዘኻኽሮም ኢሉ እውን፡ ኣምላኽ ኤርትራ ንነፍሲ-ወከፎም ብሞት ኣሕዋቶምን ኣሓቶምን ወገኖምን መጺእዎም እዩ። ንነብሶም ክሕቱን ምስ ሕልናኦም ክመኽሩን ክመራመሩን ፈቲኑዎም። ኣይሰርሐን። እንተኾነ ግና፡ ካብዚ ዝዓቢ መረዳእታ የለን። ነዚ ሕልና እዚ  ኢሳያስ፡ ከምቲ ሓንሳብ ምስ ተበለለ ኣብ ቀደሙ ክምለስ ዘይከኣል ጻዕዳ ነጸላ ገይርዎ እዩ።

እንተኾነ ግና፡ ኣብዚ እዋን እዚ እቲ “ሰብ ምዃን” ንሰዓብቲ ኢሳያስ ጥራይ ኣይኮነን ዝምልከቶም ዘሎ። መንእሰይ ኢሮፓ ማዕበል ሰብ ፈጢርካ ድምጽኻ ከተስምዕ፡ ንስኻ እውን ሰብ ክትከውን ትሕተት ኣሎኻ። ኣማእት ኣሽሓት ዝኾንካ ኤርታዊ ዜጋ፡ ካልእ ክገብረለይ እዩ እንዳበልካ፡ ኣብ ውሻጠኻ ኣጽቂጥካ ምውዓል ሰብ ኣይገብረካን እዩ። ዜግነት ሓላፍነት ምዃኑ እንዳፈለጥካ፡  ነዚ እከይን ኣዕናውን ተግባራት  ዘገልግል ጸረ-ሃገር ዝኾነ በዓል ክካየድ ኣብ ቅድሚ ዓይንኻ እንዳረኣኻ፡  ተዓወት እንዳተብሃልካ  ከኒብካ ምውዓል፡ ንሰብኣውነትካ ኣብ ምልክት ሕቶ ዘእቱ እዩ።

ስለዚ ነቲ ፍረ ግቡእን ሓላፍነትን ዝኾነ ኤርትርዊ ዜግነትን ሰብኣውነትን ከተመስክር፡ ዕድልን ባይታን ተፈጢሩልካ ኣሎ። እዚ ዕድል እዚ፡ ሓደ ካብቲ  ኢሳያስ ባዕሉ ንመውደቒኡ ኢሉ ዘጠዓዕሞ  ዓሰርተታ ባይታታት እዩ። ተቓዉሞ ነይሩ ኢልካ ክተውሪ  ዘይኮነስ፡ ነቲ ዝተገብረ ተቓዉሞ ደላይ ለውጥን ፍትሕን ኣብ ቦሎኛ፡ ውዒለዮ ኣብል። ኣብ ምሉእ ኤሮፓ መቐይሮ ፈጢሩ ኢልካ ከም እተዘንትወሉ ጽዓት። እቲ ጭርሖን ድሌትን ተቓዉሞ፡ ነፍሲ-ወከፍ ስደተኛ ኤሮፓ ድምጺ ናይ ነፍሲ-ወከፍ እሱርን ስውእን ንኸስምዕ እዩ። ንሓደ እሱር ዓሰርተ!! ንሓደ ስውእ ዓሰርተ!! ኮይኑ ኸኣ ድምጺ ዓሰርተ ሽሕ እሱራት ብሚእቲ ሽሕ ዜጋታት፡ ድምጺ ሚእቲ ሽሕ ስዉኣት ብኽንዲ ዓጸፌታኡ ዜጋታት ኣብ ቦሎኛ ክጋዋሕ ክውዕል እዩ። ኣብ ኤሮፓ እትርከብ ኤርትራዊ ዜጋ፡  ሓደ ካብቶም ዓሰርተ ኾንካ ወዲ እከለ ውዒለዮ ኣብል። ኣብ ኤሮፓ እትርከቢ ኤርትራዊት ዜጋ ተዓወቲ!! ሓንቲ ካብቶም ዓሰርተ ኾንኪ፡ ጓል እከለ ውዒለዮ ኣብሊ።

ነዞም ምዑታት ዜጋታትና ኣንቢቡን ሰሚዑን፡ ዝዘርኦ ዘሎ ጩራ ተስፋ ሂወት ርእዩን፡ ሞራሉን ሓቦኡን ዝተሓደሰ ቁጽሪ ዘይብሉ ዜጋ ኣብ ኤሮጳ ይቀራረብ እዩ ዘሎ። ኩሉ ተደማሚሩ፡ ድምጺ ናይ ዓሰርተታት ኣሽሓት ዜጋታት ፈጢሩ ነቲ ፈስቲቫል ከበርዕኖ ጥራይ ዘይኮነስ፡ በሎኛ ብቦለኝኣ እንታይ እዩ መጺኡና ከብላ እዩ። ንሱ ድማ እዩ እቲ ዝድለ ግብረ-መልሲ። ኣብ ኤሮፓ ዘሎኻ ኤርትርዊ ዜጋ ተዓወት!! ኣካል እዚ ቅዱስ ተግባር እዚ ኹን። እወ!! እቲ ድምጺ፡ ድምጺ ናይ ህልዋት ጥራይ ኣይኮነን።ኣውያቱ ኸኣ ኣብ ቦሎኛ ክስማዕ እዩ። ኣብ ልዕሊ ንግዜኡ ተኸዚንዎ ዘሎ ሳናዱቑ፡ ከበሮን ዝላን  ህ.ግ.ደ.ፍ. ዝሰምዕ ንቡር ዘይረኸበ ነፍሳት ኣሎና። ንሱ ድማ፡ “ኡይ በሊ ሃገረይ!! ተልዓል መንእሰይ!! ኣድሕን ህዝብኻ!!” ክብል ዝስማዕ ቃንዛን ድምጽን ሬሳታት ላምፓዱዛ እዩ። ኣብ ምድረባታት ሊብያን ሲናይን ከም ኣሰር ቦያ ተዘርጊሑ ዓብይ መንገዲ ኣውጺኡ ዘሎ ቀባሪ ዝሰኣነ  ኣሽሓት ሬሳታት መንእሰያትን ቆልዑትን ኤርትራ ድምጺ እዩ። ብሓፈሽኡ ከኣ፡ እቲ ድምጺ ናይ እቲ ሓንሳብ እንተድኣ ተበጊሱ ዘይግታእ ህዝባዊ ቁጥዓ እዩ።

ነቲ ሎሚ መዓልቲ ሓዉን ሓብቱን ተረዲኡ ክነሱ፡ ንጽብሒቱ ኣብ ልዕሊ መቓብሮም ኮይኑ ክራሩ ዘቓኒ ኣብዲ፡ ግና እንታይ እየ ክብሎ። ነተን ናይ ስጋ ዘይብለን፡ ሕቶ ሰብኣዊ ሞራልን ሕልናን ኣይምልከተናን እዩ ብማለት፡ እዝስ የኽፍኣለና እዩ ከይበላ፡ ጥሪት ኢሳያስ ክኾና ዘመረጻ  ዜጋታት– ነታ ቀልባ ኣጥፊኣ ኢሳያስ ወይ ሞት!!  ሃገር ትለምዕ ኣላ!!  ሃገር ትውንጨፍ ኣላ!! ንኺድ ጥራይ!!  ንኺድ!! እንዳበለት ነዚ ነውራም ፈስቲቫል ክትብል ትቑነንን ትሕነንን ዘላ ዜጋ– ነቲ ናበይ ገጽና ኢና ኸ?  እንተበልዎ፡ ኢሳያስ ኣብ ቦሎኛ ጓይላን ዳንኬራን ክትከል ኣዚዙ ኣሎ፡ እንዳበለ ኣብ ልዕሊ ሬሳታት ኣሕዋቱ ከበሮ እንዳኣተቐባበለ ናይ ሕራይ ኮኑ ሳዕስዒት ከስብር ዝዳሎ ዘሎ  ዜጋ፡ ቀቢጸዮ እየ። ምኽንያቱ እንዳፈለጠ ዝፍጽሞ ዘሎ ስራሕ ስለዝኾነ። እንተኾነ ግና ገዲፍካ  ዘይግደፍ ስለዝኾነ ምሕረት የውርደልካ ጥራይ እየ ዝብሎ።

ምናልባት እተን ቁሩብ መባኹዕቲ ዜግነትን ሰብኣውነትን ተሪፈናኻ ዘለዋ ኣባል ህ.ግ.ደፍ. ዘበልካ ኩሉኻ፡ ተቐቢጽካ ስለዘይትቕበጽ ፈስቲቫል ቦሎኛ ጸረ-ሃገር ምዃኑ ፍለጥ። እዚ ፈስቲቫል እዚ ዘርኢ ሞትን ዕንወትን እዩ። ንትልኽ ትብል ሂወት ንኽትቡንቁስ፡ ንቕልቅል ትብል ጩራ ብርሃን ንኸጥፍእ ዘጥዓዕም ዘሎ ኣጸያፊ ውራይ እዩ። ስለዝኾነ ከኣ፡ እቲ እዚ መድረኽ እዚ ኣምጺእዎ ዘሎ ሕቶ፡ ወይ ምስ ኢሳይስን ሰዓብቱን ወግን ወይ ከኣ ንድሕነት ሃገርካን ህዝብኻን ደው በል እዩ። ቃንዛን ውርደትን ህዝቢ ኤርትራ ዓመታት ነዊሕዎ፡ ኣብ መጨረሽታ ሎሚ ዘመን ኣብ ክልተ ባላ ረጊጽካ ክትከይድ ዘየፍቅድ ቃልሲ ይቃላሕ ኣሎ። እዚ ቃልሲ እዚ፡ ነግ-ፈረግ ዘየብል፡ ካብ ሓዲኡ ሓዲኡ ክትመርጽ ዘገድድ ኩነታት ኣቲኻ ከም ዘሎኻ ስማዕን ፍለጥን ይብለካ። ነቲ መበል 40 ዓመት እንዳተባህለ ተኣዚዝካ ኣብ ልዕሊ ሬሳታትና ክትስዕስዕ እተዳለወሉ ዘሎኻ ፈስቲቫል፡ ካብ ኤርትራዊ ሞራልን ባህላዊ ክብርን ኩርዓቱን ዝወጸ ረሲእን በዓለጋዊ ውሳኔ፡ ክትስርዞን ከይትውዕሎን ብስም ስዉኣት ትሕተት ኣሎኻ።

ወልደየሱስ ዓንደማርያም

በይ-ኤርያ ካሊፎርንያ

07.01.14