11/20/2013

ንኩሎም ደለይቲ ለውጢን ፍትሒን ዝኾኑ ኤርትራውያን ዘጠቓለለ መፈለምታ ዕዉት ህዝባዊ አኼባ “ህዝብን ሃገር ምድሐን ቅድሚ ኩሉ “ አብ ትሕቲ ዝብል  መደረ  አብ ከተማ ሳን ድየጎ  ተኻይዱ። አኼባ ንዝነበረ ታሪኻዊ ተበግሶታትን ናይ ከተማኡ ዝነበረ ናይ ቃልሲ አበርክቶ እጃምን ብምልዓል፣ ንሕሉፍ ተመኩሮታቱ ገምጊሙ። ንዝተፈላለየ አገባብ አተሃላልዋኡ ብምምዛን  ከአ፣ ንኹሉ ሃገራዊ ዓቕሚታቱ ብሐደ አወሃሂዱ ንኽሰርሕ ወሲኑ።

አኸበኛታት ንህሉው ኩነታት ህዝብን ሃገርን ብምስትብሃል፣ ዘርኢን ሐድጊን  ናይ ኤርትራ  ኮነ ተባሂሉ ይብተንን ይጸንትን፣ ይስደድን ይቕዘፍን፣ እቲ አብ ሃገሩ ዝተረፈ ከአ ብራዕዲን ሽበራን ተኸቢቡ ዝእሰርን ዝግፋዕን ኮይኑ ናብ ጎደና ፍጹም ዕንወት የምርሕ ስለዘሎ፣  ኤርትራውያን አብ ዘለዉ ይሃልዉ ንኩሉ ዘሎ ፍልልያቶም አወጊዶም ብሐደ ህርመት ንሐደ ዕላማ ንኽሰርሑ አማሕጺኖም።

ንዘሎ መላኺ ስርዓት ሐግሒግካ ብምልጋስ፣ አብ ቦትኡ  ከአ ብልዑላውነት ግዝእተ ሕጊ እትመሐደር፣ ነብሲ ወከፍ ዜጋ ከአ ናተይ ኢያ ኢሉ ዝኾርዓላን ዝሕበነላን፣ ብመንፈሱን አእምሮኡን ከአ ቀሲኑ ዝነብረላ ሃገር ንምርግጋጽ፣ ወሳኒን መሪርን ዝኾነ ንህዝቢ  ከአ ማእከሉ ዝገበረ ናይ ቃልሲ መኸተ ምክያድ እዋኑ ሕጂ ምዃኑ አገንዚቦም።

አኸበኛታት ነዚ ዕላማ’ዚ ክዉን ንምግባርን ርሱን ህዝባዊ ማዕበል ንምልዕዓልን፣  ምስ ከባቢኦም  ዝርከባ ከተማታት ተአሳሲሮም ቃልሶም  ከም ዘሕንኑ አረጋጊጾም።  ነዚ ዕማታት’ዚ እተማእክል ካብ ዓበይትን መንእሰያትን ዝተመርጸት ሽማግለ ከአ መሪጾም። እዚ ከም መፈለሚ ናይ ተበግሶ  አኼባ ድአ’ምበር ዝርጋሔኡ  ብዝያዳ ንምስፋሕ፣ ንኹሎም ደለይቲ ለውጢን ፍትሕን ዝኾኑ ባእታታት ተሳታፍነቶምን እጃሞምን  ንምዕዛዝ ቀጻሊ ጻዕርታት ክገብሩ  ምዃኖም  አነጺሮም። አብ ከተማኦም  ንዘለዉ አገደስቲ ህዝባዊ ጉዳያት አልዒሎም  ብምልዛብ ፣ ብዝያዳ ንማሕበራዊን ባህላዊን ዝምልከት ጉዳያት ምስ ኩሎም ግዱሳት ኤርትራውያን  ብምርኻብ ንኹሉ ብማዕረ ዝቀባበል ሃዋሁው ንኽፍጠር፣  መጽናዕቲ ንኽካየድ ብምውሳን ዝግብኦም ሃናጺ አበርክትኦም ከምዝገብሩ  ከአ ብምርግጋጽ፣  ናይ ምልዛብ አኼባኦም ብህዱእን ዕዉትን ዝኾነ አገባብ  ዛዚሞም።