ህግሓኤ ኣብ ዘበነ ገድሊ፡ ንደርግ ኣብ ሃይማኖታዊ ጕዳያት ኢዱ የእቱ ኣሎ እናበለ ይኸሶ ከም ዘይነበረ፡ ካብ ድሕሪ ናጽነት ጀሚሩ ኣብ ገዳማትን ቤተክርስትያናትን እናኣተወ ንህዝቢ ክከፋፍል ክፍትን ጸኒሑን ኣሎን። ብፍላይ ንብጹዕ ኣቡነ ኣንጦንዮስ ምእሳሩ ድማ ብምእመናን ከም ሞባእ ዝወደቐ ገንዘብን ሽሞኣን ጽላላትን ምዝማት ከይኣኽሎ፡ ካድራቱ ናብ ውሽጢ መንበረ ታቦት ብምውፋር ከም ፍታሕ ኵርኵር ኣብ ውሽጢ ቤትክርስትያናትን ገዳማትን ይዕንድር ኣሎ። እንኮ ተሪፉዎ ዘሎ ንቤተክርስትያናት ከም ኣደራሻት ትልሂት ወይ ሲነማ ምቕያር’ዩ። እቲ ዝኸፍአ ግን ሞባእ ምስራቑ ዘይኮነ ንህዝቢ ብጸቢብ ወገንነት ክኸፋፍል ይፍትን ምህላዉ እዩ። ርሑቕ ከይከድና ድማ ኣብ ስትራቫንገር ኣጋጢሙ ዘሎ ኵነታት ምዕዛብ ይከኣል።

ኣብ ዝሓለፈ ጽሑፍ ከም ዝተገልጸ እቲ ህግደፍ ኣብ ስታቫንገር ዝነበሮን ዘለዎን ኣጀንዳ ብመጠኑ ተገሊጹ ነይሩ። ዕላማ ህግደፍ ገንዘብቲ ቤተክርስትያን ጸብጻብ ከይግበሮ፡ ነቶም ጸብጻብ ይገበረልና ዝበሉ ምእመናን ድማ ተቓወምቲ እዮም፡ ሃገራውያን ኣይኮኑን እናበለ ብምጽላም ከም ድላዩ ክዕንድር ምፍታን እዩ። ኣብ ስታቫንገር ዝጀመሮ ካብ ጸብጻብ ምድሓን ካብ ናይ ኦስሎ ብዘይፍለ ናብ ምፍሻል ገጹ ስለ ዝኸደ፡ ምስ ፍሽለት ዑደት ዕሱብ ኢሳያስ ወዲገራህቱ ኣብ ስታቫንገርን በርገንን፡ ኰራኵር ህግደፍ ድፋዖም ይፈራኸሽ ከም ዘሎ ዝስቈሮም ዘሎ ይመስሉ።

ስለዚ፡  ሓድሽ ኢሎም ዝሓሰቡዎ ተንኰል ኣብ ምፍሓስ ተጸሚዶም ኣለዉ። ንሱ ድማ ቢንያም ኣስመላሽ ዝብሃል ብውልቃዊ ትቕሚ ዝዓወረ ወይጦ ዝኣልሞ ዘሎ፡ ድሕረይ ሳዕሪ ኣይብቈላ ዝዓይነቱ “ቤተክርስትያን ስታቫንገር ክዕጾ ኣለዎ” ዝብል ውዲት’ዩ።

ቢንያም ኣስመላሽ፡ ንምእመናን ብዛዕባ ጸብጻብ ንኸይሃቱ ክዓግቶም ፈቲኑ ምኳን ምስ ኣበዮ፡ ብዓቕሊ ጽበት ንኣበደብሪ ናብቲ ቤተ ክርስትያን ገጾም ከይቅልቀሉ ኣፈራሪሑዎም። ንሶም ብዝተፈላለየ ምኽንያት ቤትክርስትያን ክዓጥኑ እንተ ዘይክኢሎም እቲ ቤተ ክርስትያን ብተዘዋዋሪ መንገዲ ይዕጾ ኣሎ ማለት’ዩ። እቶም ኣገልጋሊ ህዝቢ ዝኾኑ ካህን ከም ሰዓቢ ክርስቶስ መጠን ነዚ ቤተ ክርስትያን ይተዓጾ ዝብል ዲያብሎሳዊ ተግባር ይትረፍ ኣሜን ኢሎም ክቕበሉዎ ክሰምዑዎውን ከም ዘይደልዩ ርዱእ ይመስለና። እዚ ኾይኑ ግን፡ ንዅሉ ኣማኒ ኦርቶዶክሳዊት ቤተክርስትያን: ብዝተፈላለየ ኣገባብ ኣብ ውሽጡ ዕግርግር ኣእትዮም፡ ውልቃዊ ጥቕሞምን ልዕልነት ጭፍራ ህግደፍ ንምርግጋጽ ዘካይዱዎ ዘለዉ ሸርሕታት ከም ዝኾነ ነፍስወከፍ ኣማኒ ክፈልጦ ኣገዳሲ ኢዩ፡፡

ኣብ ውሽጢ ቤተክርስትያን ሰሊኾም ብምእታው ንህዝብና ፋሕብትን ከእትዉ ዝጽዕሩ ዘለዉ ወይጦታት ብወረጦ ተነቒሶም ከይወጽኡ፡ ህዝብና ወሲኑ ብንጹህ ልቢ ናብ ኣምላኹ ጸሎቱ ከዕርግ ከም ዘይክእል ክንፈልጥ ክንክእል ኣለና። ነፍስወከፍ ኣማኒ ድማ ከምቲ ልማድ ናይ ኣቦታትና፡ ንቤተክርስትያናት ናይ ሰላምን ጸሎትን ቦታ ክገብረን ክጽዕር ክእል ኣለዎ።

ሃይማኖትን ፖለቲካን ክሕውስ ዝፍትን ያዕ ንበሎ!

ዓወት ንሓፋሽ

ኣብራሃም ገብረክርስቶስ

ኖርወይ