ልቢ ኣይነቅጽን – ዝበለ መን’ዩ

ከብዲ ኣይሓርርን – ዝበለ መን’ዩ

ሕልና ኣይስሕትን – ዝበለ መን’ዩ

እግሪ ምስተፈነወ – ናብ ዝወስዶ

ኣያ ብምስእኑ – ብኣጆኻ ዝእብዶ

ንቅድሚት ሰጉሙ – የማን ጸጋመ

ዓይኒ ተዓሚቱ – ዝረግጾ ከየስተውዓለ

ናብ ሞት ኣፍ – ብኽፉቱ ዝጽበዮ

ንነፍሱ ቀቢጹ – ጠኒኑ ዝኣትዮ

ግፍዒ ጭቆና – ኣገዲዱ ዘንፈጾ

ጸጊቡ ይብሉዎ – ክንዲ መሪርዎ

ሓንቂቁ ተባሂሉ – ክንዲ በርቲዒዎ

ኤርትራዊ ዜጋ – እዝይ እንኳ ዊሒዱዎ

ዝብሉ ኣይተሳእኑን – ንሰማዒ ዘደንጸዎ።

 

ካብ ዓዶም ስቓይ – ግፍዒ ደፊኢዎም

ኣብ በረኻ መገዲ – ሞት ተጸቢዎም

ካብ ሓዊ ሃዲሞም – እቶን ተቐቢልዎም

ንባርነት ነጽጎም – ንስደት ደፊሮም

ኣብ ባሕርን ምድረበዳ – ሞት ጨኒዎም

ከም ከብቲ ክስዕብዎ – ሃነን ኣቢልዎም

ንመኽሰብ ዕዳጋ – ራሻይዳ ክጨውይዎም

ኣትረርቲ ሃይማኖት – መምሪጾም ክሓርድዎም

ኤርትራውያን ንሞት – ባህጊ ከምዘለዎም

ይቕዘፉ ብጅምላ – ረዳኢ ዘይብሎም

ህግደፋውያን ግና – ይስዕስዑ ተጠሊዖም።

 

ኣብ ዓዱ ዘይቀሰነ – ኣብ ገዝኡ

ፍትሒ መሰል – ዘይረኸበ ኣብ ደንቢኡ

ኣብ ስደት በርኻ – ፈቖዶ ተደርብዩ

ዋጋ ኣቕሓ ኮይኑ – መንእሰይ ዕድሚኡ

ባዓል ገንዘብን ሓያልን – ኮይኑ ወናኒኡ

ክብሩ ተገፊፉ – ከይነብር ቀሲኑ ተሳንዩ

ከም ሰብ ተቖጺሩ – ከይሓሪ ከምድላዩ

ምንባር ምስ ዘይምንባር – ሓርቢትዎ ቃንኡ

ንመሰሉ ከይሓትት – ጠፊዎ ኣማኒኡ

ተበለጽቲ መኸርዎ – ክሰግድ ኣዳሕዲሑ

ስሱዓት በልዎ – ህግደፍ’ዩ ፈጣሪኡ

ንምንባር ከምልኽ – ከይፈተ ቀታሊኡ።

 

ስቅያት ኣብ ገዛኻ – ትበልዖ ከይሰኣንካ

ሞት ኣብ ቅድሜኻ – መጻብቦ ማሕለኻ

ኤርትራዊ ዜጋ – ትመርጾ’ዶ ጠፍኣካ

ዝኣመንካዮ ክኽሕደካ – መአስ ተጸቢኻ

መብጽዓ ዝጠልም – ዝወጽአ ካብ ብርክኻ

ጅግንነት መስዋእቲ – መአስ ዊሒዱካ

ንስለ ናጽነት – ብሉጻት ከፊልካ

ጠላም ዓዲ ኣቡኡ – ነጊሱ ኣብ ልዕሌኻ

ንሞትስ ብሞትካ – ጥራይ ኢኻ ተሕውያ።

 

ዝግ በልሞ ንዕላሎም – ሕሰብ ብጽምዋ

ዘክሮም ንድሕሪት – ብሉጻት ዝሓለፉላ

እንታይ ነይሩ ዘነድሮም – ክጎዩ ብዝላ

ግፍዒ’ዶ ኣይነበረን – ጭቆና ህዝብና

ብሰላም ቅሳነት – ክመሓደር ሃገርና

ማዕርነት ክሰፍን – ክረጋገጽ ምዕባለና

ኣይነበረንዶ ሓቂ – ክቡር ህይወት ዘኽፈለና

ሎሚ ግን ተረሲዑ – መብጽዓ ጀጋኑና።

 

ዘክርዎ’ባ ሎሚ – ናይ ገድሊ ሙያኹም

አነባ አነ ክትበሃሃሉ – ክትሓልፉ ንብጻይኩም

ንስልጣን ድዩ ነይሩ – ድሕሪት መትረፊኹም

ስንኩላት ክትርሽኑ – ብድዐ ሳዕሪሩኩም

ደቂ ስውኣት ክትኣስሩ – መሰሎም ገፊፍኩም

አበይ አሎ እቲ ሙያ – ቅያ ሕድርኹም

ሰይቲ ስውእ ክትበኪ – ክስደዱ ደቅኹም

ኤርትራ ክትጸንት – ዓገብ ብዘይምባልኩም

መርገም ድዩ ምረቓ – ኣጉቢጥዎ ዝባንኩም

ንግፍዒ ክትሰግዱ – ታሪኩም ጉሒፍኩም

ዘሕዝን ዘስደምም – ትገድፍሉ ሓድግኹም።

 

ንህዝቢ ዝረገጸ – ዝዓበደ ብደም

ዘይሕተት ኣይኮነን – ንፍትሒ ንሰላም

ቅሩብ ኒሕ ሓቦ’ዩ – ዝድለ ኣብ ዓለም

ግራትካ ጽሂይካ – ዝርኣትካ ክልምልም

ንእሾኽ ቦንቁስካ – ቅሳነት ክትተክል

መፍትሕ ኣብ ኢድካ – ኣይትግበር ቀለዓለም

ሃውልትኻ ክነብር – ኣብ ልዕሊ መቓብር

ሽምካ ክዝከር – ንታሪኽ ምስክር

ንሞት ኣይትፍርሃያ – ቀታሊኻ ክትቀብር

ሓቒፍካ ህዝብኻ – ጭቆና ክትሰብር

ዘክሮ ናይ ትማሊ – ኒሕካ ይበራበር።

 

ራህዋን ቅሳነትን፥ ንህዝብናን ዓድናን

ሰላምን ሕብረትን፥ ንደለቲ ፍትሒ

 

ሰለሞን ብርሃነ ሠንጋል

“ሕልና ሰነ 13, 2015”