መጋቢት ሸሞንተ – ተዘከራ ሎሚ

ኣደታትን ኣሓትን – ተዘከራ ብኽብሪ

ገሃድ ዝገበርክን – ናይ ትማሊ ሕልሚ

ናይ ጸላኢ ክፍኣት – ዝሰገርክን ሰልሚ

ንሃገር ንህዝቢ – ዝነበረክን ፍቕሪ

ከማይ ዘርዊ – ዘጽግብ ከም ምግቢ

ሎሚ ተረሲዑ – ዝሓለፈ ቅያ ግብሪ

ተንኮል ምስ ነገሰ – ከጥፍእ ንፍቕሪ።

 

ኣደታት ኣሓትን ሎሚ – ሎሚ ተዘከራ

ብዓብይ ንእሽቶ – ኣብ ኩሉ ተኸበራ

ናይ ስድራና ዓንዲ – ስመራ ሕበራ

ዘይሓልፍ የሎን – ወላ እንተበዝሐ መከራ

ህግደፍ ጊዚያዊ’ዩ – ወላ እንተብዝሐ ፈኸራ

ክሓልፍ’ዩ ኩሉ – ጊዜ ውራ ውራ

ሕበራ ጥራይ – ብሓደ ስመራ።

 

ወለዲ ጀጋኑ – ኣደታት ወሓላሉ

ሃገርን ህዝብን’ዩ – ዘኹርዕ ካብ ኩሉ

ድሑር ባህሊ ኣይኮነን – ካብ ቀደም ትኣምናሉ

ግፍዒ ክጋሓፍ – ስርዓት ሕጊ ክዓስለሉ

ምኸራ ደቅኽን – በሉኦም ኣስተውዕሉ

ሃገር ብዘይ መንእሰይ – ዋጋ ከም ዘይብሉ

ኣበራብርኦ ሓቦኦም – መስዋእቲ ክከፍሉ

ንማዕርነት ንሕጊ – ኩሉ ዝሕጎሰሉ።

 

ብኽያት ናይ ኣደታት – ከብቅዕ ክነጽፍ

ዓገብ በላ ብሓበራ – ንስራሕ ዘጸይፍ

ንማዕርነት ንመሰልክን – ክትምንዝዓ ካብ ህግደፍ

ድሑር ኣተሓሳስባ – ቀልጢፉ ክጸድፍ

ህግደፍ ምስ ሰዓብቱ – ተቦንቁሩ ክጋሓፍ

ደቅኽን ክትሓቑፋ – ሽግር ክሓልፍ

ሰላም ክምለስ – ፍቕሪ ከንሳፍፍ

ሎሚ’ውን ከም ቀደምክን – ኣልዕላ  ሰይፍ።

 

ኣደታት ከም ዕንባባ ምድሪ

ኣሓት ከም ኮኮብ ሰማይ

ድሙቓት ከም ፀሓይ

ጽሩያት ከም ማይ

ተባህግቲ ፍረ ፈልፈልቲ ፍቕሪ

ሎሚ’ውን ጽንዓ ከም ትማሊ

ዘይሓልፍ ሽግር የሎን ኣብዛ ምድሪ።

ንልቢ ትሰርቃ – ብዘይ ኩናት

ንሓሳብ ተናውጻ – ብደቓይቕ ብሰዓታት

ንሕልና ተደንዝዛ – ተፍዝዛ ንዓይንታት

ንእግሪ ተኣስራ ከይንቀሳቀስ – ብዘይ ገመድ

ወድቅን ትትንስኣ – ከይተንከፈክን ሓመድ

ንዓኻትክን ዝረኸበ – ምሳኻትክን ዝዘመድ

ከይሞተ ዝጸደቐ – ገና ከሎ ብህይወት

ተራኢኽን ዘይትጽገባ – ብለይቲ ብቐትሪ

ካብ ሰባት ሓሊፉስ – ተሕጉሳ ፈጣሪ

ንስኻትክን እንተሓቢርክን – ህግደፍ የብሉን ዕምሪ

ተሓቓቖፋ ንሃገር – ንሰላም ንፍቕሪ።

 

ሎሚ ተዘከራ – ሎሚ ተኸበራ

ኩሉኽን ደቂ ኤረ – ኣብዘለኽን ኣሊኽን

ከም ማይን ጸባን – ኩና በጃኽን

ናይ ህግደፍን ሰዓብቱን – ክስበር ፈኸራ

ሕበራ ጥራይ – ብሓደ ስመራ

ጸልማት ክግፈፍ – ብርሃን ክኩላዕ

ህዝብና ክዕወት – ክሓልፈላ ኤረትራ።

 

“ዓወት ንውጹዕ ህዝብናን ሃገርናን

ዘለኣለማኢ ክብርን ዝኽርን ንጀጋኑ ስውኣትና”

 

ሰለሞን ብርሃነ ሠንጋል

“ ሕልና – 03-07-2017 “