ብዕለት 12.02.2012፡ ”ኣገዳሲ ሰሚናራት ንኤርትራውያን ተቐማጦ ኦስሎ” ብዝብል ኣርእስቲ፡ ህግደፍ ኣብ ከተማ ኦስሎ ክፉት ሰሚናር ንህዝቢ ዓዲሞም። ናይቲ ኣኼባ ዛዕባታት እዘን ዝስዕባ ነበራ፡-

• ህልው ኩነታት ሃገር ብተኽለ መንግስቱ፡ ሓላፊ ህዝባውን ኮማውን ጉዳያት፡ ኣብ ኤምባሲ ኤርትራ፡ ስዊድን
• ዕደና ኣብ ኤርትራ፡ ብፕሮፌሰር እምባየ ፈሮው፡ ማናጀር ዕደና ኤርትራ

ገለ ክፋል ካብቶም ዝተሳተፉ መንእሰያት ዘርኢ ስእሊ

እቲ ኣኼባ ብዝኽረ-ሰማዕታት ድሕሪ ምኽፋቱ፡ ኣቶ ተኽለ መንግስቱ ዘረባኡ ጅምር ምሰበለ ኢዩ በቶም ተባዓት መንእሰያት ዘይተጸበዮ ናይ ሕቶ መደረጋሓት ዘዝነብሉ።

እቲ ወይጦ፡ ኣመሪካ ኣብ ዞባና ብዙሕ ሽግር ትፈጥር ከምዘላ፡ ብፍላይ ከኣ ኣብ ኤርትራ ንልዕሊ 40 ዓመታት ብቐጻሊ ሸርሕታት ትገብር ምህላዋ፣ ከም ውጽኢቱ ከኣ መሪር ሓርነታዊ ቃልሲ ከም ዘካየድና፣ ሕጂ’ውን ብኻልእ ኣሳቢባ ንሃገርና ኤርትራ ማዕቀብ ኣዊጃትልና ከም ዘላ ብምባል መደርኡ ምስ ጀመረ፡ ”ሓንሳብ ጠጠው በል፡ ሕቶ’ሎና” ዝብል ዘይተጸበዮ ድምጺ ኣብቲ ቤት ተሰምዐ።

እቲ ልኡኽ፡ ኣስታት ክልተ-ሰሙን ይገብር ብተባዓት ኤርትራውያን መንእሰያት ተቐማጦ ትሮንድሃይም ስለ ዝተዳህለ፡ ሕጂ’ውን ተመሳሳሊ ፍጻሜ ብምግጣሙ፡ ብስንባደ ካብታ ጠጠው ኢሉ ዝዛረበላ ዝነበረ ቦታ ሃዲሙ ናብቶም ሰማዕቱ ተጸንቢሩ ዑቕባ ሓተተ።

እቶም ብውሽጢ ዝዓወሩ፡ ብደገ ግን ዝርእዩ ዝመስሉ ኣባላት ህግደፍ፡ ናይቲ መንእሰይ ሕቶታት ክሰምዕዎ ኣይደለዩን፡ ከመይ ንሕልናኣቶም ዝወግእ ሕቶታት ስለ ዘልዓለ። ”ስቕ ኣብሎ፡ ኣውጽኣዮ…” ክብሉ ምስ ጀመሩ ከኣ፡ እቶም ከይተፈልጡ ኣትዮም ዝነበሩ ልዕሊ 30 ዝኾኑ ካልኦት መንእሰያት ብሓንቲ ምልክት ብምትሳእ፡ ”ስምዕዎ፡ ሕቶታቱ’ውን መልስሉ” እናበሉ ደገፋቶም ኣስምዑ። በዚ ከኣ ህግደፍ ቀባሕባሕ በሉ። ኩነታቱ ዘሻቐሎም ገለ ካብቶም ተሳተፍቲ ግን ነቶም መንእሰያት ከህድእዎም ኣብ ልመናን ምምስሳልን ኣተዉ። እቶም ተባዓት መንእሰያት ግን ኣብ ርሱን ጕይላ ከም ዝኣተወ ወናም ሳዕሳዒ፡ ነታ ክፍሊ ተሓምበለ በሉላ። ብኸምዚ ከኣ መልእኽቲታቶም ናብቶም ኣባላት ህግደፍ ኣመሓላለፉ፡-

• ንሕና ኣመሪካ እናበልኩም ብዙሕ ስለዘታለልኩምና፡ ነዚ ኣርእስቲ’ዚ ክንሰምዖ ኣይንደልን ኢና። ኣርእስቲ ቅይሩ ከመይ ቅድሚያ ዝግብኦን ክምለስ ዘለዎን ሕቶታት ስለዘሎና።
• ሃገርና ቅዋምን፡ ብቕዋም ዝምእዘዝ መንግስቲን የድልያ ኣሎ።
• እሱራት ኤርትራ መኣስ ኣብ ሕጊ ክቐርቡ ኢዮም?
• መንእሰይ ኤርትራ ክሳዕ መኣስ ኢዩ ኣብ ዕስክርናን ባርነትን ክበሊ?
• ኤርትራ ብቐዳምነት ፍትሕን መሰል ደቂ-ሰባትን እምበር ማዕድን ኣይኮነን ዘድልያ።
• መንእሰይ ኤርትራ ካብ ጨካን ስርዓት ክሃድም ኣብ ዶብ ይርሸን ኣሎ። ካብኡ ዘምለጠ ከኣ ኣብ ባሕርን ምድረበዳ-ሲናይን ህይወቱ ይስእን ኣሎ።
• ስማዕ ሓፋሽ፡ በዚ ስርዓት’ዚ እንዳተታለልካ ክሳዕ መኣስ ኢኻ ክትነብር? ተልዓል፡ ንመሰልካን ንኽብርኻን ከኣ ተቓለስ ዝብሉን ካልኦት ሕቶታትን ዘጠቓለለ መድረታት ኣስሚዖም።

እዚ ኣብ ዝኾነሉ ህሞት፡ ሓደ ቁሩባት ተሳተፍቲ ኩነታቱ ኣስጊእዎም በተግ ኢሎም ካብቲ ቦታ ተሰዊሮም ኢዮም። ኣዳለውቲ ኣኼባ ከኣ ነገራቱ ኣዚዩ ስለዘፍርሆም፡ ፖሊስ ክጽውዑ ተገደዱ። ኣስታት ዓሰርተ ዝኾኑ ፖሊስ ናብቲ ቦታ ምምጻእ ከኣ ነቶም ተባዓት መንእሰያት ካብቲ ናይ ሰሚናር ክፍሊ ከም ዝወጹ ገበሩዎም።

ናይቶም መንእሰያት ቀንዲ ዕላማ፡ መልእኽቲታቶም ናብቲ ተሳታፊ ሰሚናር ምትሕልላፍ ክኸውን ከሎ፡ ዓወታቶም ግን ብሓንቲ እምኒ ክልተ ጨራሩ ከምምቕታል ይግምገም፡-

1. ናይ ህዝቦም ስቓይን መከራን ኣቃሊሖም፡ ወላ’ውን እቶም እናፈለጡ ዝጸመሙ ተበለጽቲ ክሰምዕዎ እንተዘይደለዩ።
2. ኦስሎ ኣብ ሃገራት ኖርዲክ ዝመደበሩ ኤምባሲ ኤርትራ ዝንየተላ ናይ ነዊሕ ዓመታት ናይ ህግደፍ መናሃርያ ምንባራ ዝፍለጥ ኢዩ። ካብ ሎሚ ንንዮው ግን ከምኡ ከምዘይትኸውን ኤርትራውያን መንእሰያት ብግብሪ ኣመስኪሮም ኢዮም።

ጸባ ስተዩ ተባዓት መንእሰያት ኦስሎ!!