ናብ ራድዮ ኣሰና እዚ ንሰዶ ዘለና ናብ ሓፋሽ ህዝቢ ብዝጥዕመኩም ከተቃልሕዎ ንሰደልኩም ኣለና ፣ሽመይ ንዓኩም ጉዱስ ሓውኩም ካብ ኤርትራ።

ተቐማጦ ዓዲ ጋዕቤን ኣውያተናን ጥርዓናን ሰማዒ ስኢኑ፡ንግፋዕ ኣለና። ፍትሒ ተቐቢራ፡ መንግስትን መራሕትን ኣብ ዘይብላ ሃገር ኣመሓዳሪ ን/ዞ/ዓዲ ዃላ ኣቶ ተኽለብርሃን ምሕረትኣብ ብዘይ ኣገባብ ካብ ዕለት 10/04/2017 ክሳብ ሕጂ ንልዕሊ ደቂ 80 ዓመት ዝርከብዎም 12 ሰባት ኣሲሩ ይርከብ። ካልኦት ንኸይጠርዑን ንኸይሓቱን ድማ የፈራርሖም። ኣመሓዳሪ ዞባ ደቡብ ኣቶ ኤፍረም ገብረታትዮስ ወዲ ዓዱን ዘመዱን ናይ ረብሓ መሳርሕቱን ንኣቶ ተኽለብርሃን ስለ ዝኾነ ነቲ ጥርዓን ፈጺሙ ክሰምዖ’ውን ኣይከኣለን። በዚ ዝተገረሙ ነበርቲ ዓዲ ጋዕቤን ናብ ዞባዊ ምምሕዳር ኣቶ ወልደንክኤል ኣብርሃን ማእከላይ ሽማግለ ህግደፍ ዑስማን በሊሑን ጥርዓኖም እኳ እንተኣቕረቡ: ገለ ካብቶም ኣባላት ዞባዊ ምምሕዳር ካብዚ ቤት ጽሕፈት ፍታሕ ክትረኽቡ ኣይትጸበዩ ተኺኢልኩም ገለ ወቲፍኩም ተገላገሉ ክብሉ ምኽሮም ለጊሶም። ነቲ ብሓይልን ብጸቕጥን ተጋጊና ኢና ኢሎም ንክፍርሙ ዕዮ ተዋሂብዎ ዘሎ ወዲ ፍርዙን ዝብሃል መራሒ ክ/ሰ 22 እዩ፣ እንተ`ኾነ ነዚ ፈጺምና ኣይንቅበሎን ከይተጋገና  ተጋጊና ኢልና ኣይንፍርምን ኢሎም ጸኒዖም ኣለው ብፍላይ ንመም/ዓንደሚካኤልን ተጋዳላይ ተፈሪ ነጋሽን ንምውዳቕ ዝግበር ዘሎ ጸቕጢ ደረት የብሉን።

ካብዞም ተኣሲሮም ዘለዉ ሱፐቫይዘር ሚ/ት/ን/ዞባ ዓዲ-ዃላን ኣባል ባይቶ ዞባ ደቡብን ዝኾነ መምህር ዓንደሚካኤል ክፍለኣብን ተጋዳላይ ነበር ተፈሪ ነጋሽን ነቲ ኣማሕዳሪ ን/ዞ/ዓዲ ዃላ ነቲ ብጉቦን ብብልሽውናን ተቖማጢዑ ነቶም  ክእለት ናይ ስርቅን ምሕሳውን ዘለዎም ኣባላት ኢሰፓ ዝነበሩ ሓሰውቲ ሓቒፉ ከምዘሎ ኣጸቢቖም ስለ ዝፈልጡ ንምድሃልን ነቲ ዝፈልጥዎ ንኸየውጽኡ ኣፈራሪሑን ድሂሉን ከዳኽሞም ስለ ዝመደበ ዝመሃዞ መሸፈኒ ምዃኑ ኩሉ ዝፈልጦ ሓቂ እዩ።

እዚ ከምዚ ኢሉ ከሎ እዚ ተጠቃሲ ኣማሓዳሪ ን/ዞ/ዓዲ ዃላ ኣቶ ተኽለብርሃን ምሕረትኣብ፡ ነቲ ኣብቲ ንኡስ ዞባ ኣብ ትሕቲ ሃገራዊ ድሕነት ኮይኑ ዝሰርሕ ዘሎ መሳርቕቱ መብራህቶም በላይ ፣ ሰባት ብምጥፋእን ምሕሳውን ሓደገኛ  ብሰብ ዝተፈንፈነ  ኣብ ዓዲ ጋዕቤን መሬት ከውህቦን ከእትዎን ስለ ዝመደበ ነቲ ብሓባር ኮይኖም ብብላዕን ጉቦን ዝምንጭትዎ ዘለዉ ከደንፍዕ ዝመደቦ ምዃኑ ናይ ክልቲኦም እሙናት ምንጪ ይሕብሩ።

ኣቶ ተኽለብርሃን ነዞም ብዘይ ኣገባብ  ብስልጣኑ ቀይድዎም ዝርከብ መጀመርያ ኣብ መደበር ፖሊስ ዓዲ ዃላ ምስ ኣእተዎም፡ መደበር ፖሊስ ዓዲ ዃላ ድማ ንልዕሊ 24(ዕስራን ኣርባዕተን) ሰዓት ክንሕዞም ኣይንኽእልን ኢሎም፡ ብድሕሪ’ዚ ናብ ካርሸሊ ዓዲ ዃላ ወሲደሞም፡ ንሶም’ውን ዝኾነ ክሲ ክሳብ ዘይብሎም ኣብዚ ክኣትዉ ኣይነፍቅድን ስለ ዝበልዎ ኣብ ዓደልገስ፡ ሓልሓለ ሕጂ ኸኣ ኣብ መትከል ኣቤት ከባቢ ጋሕቴላይ ተኣሲሮም ይርከቡ። ካብዞም እሱራት ዝበዝሑ ምእንቲ ናጽነት ኣብ ማርያም ግብን ካርሸሊ ዓዲ ዃላን ዝተኣሰሩ ሕጂ ድማ ነታ ባዕሎም ዘምጽዋ ናጽነት ከየብዕሉ ተኸልኪሎም ኣብ መዓልቲ ናጽነት ፈቀዶ ቤት ማእሰርቲ ይካላበቱ ኣለዉ።

1.መምህር ዓንደሚካኤል ክፍለኣብ ሱፐቫይዘር ሚንስትሪ ትምህርቲ ን/ዞ/ዓዲ ዃላን ኣባል ባይቶ ዘባ ደቡብን እዩ። ከመኡ ውን  ናጽነት ሃገር ንምውጻእ ኣብ ዝነበረ ቃልሲ ምስ ህዝባዊ ሓይልታት ምንባሩን  ድሕሪ ምብታን ተጋድሎ ሓርነት ድማ ምስ ህ/ግ ካብ 1981 ኣትሒዙ ውፉይ ሓፋሽ ውዱባት ኮይኑ ኣብ ፈቀዶ ቤት ማእሰርቲ ከም ካርሸሊ ዓዲ ኻላን ካልኦትን ብዙሕ ሽግርን መግረፍትን ከም ዘሕለፈ ይንገር። ከምቲ ንናጽነት ንምምጻእ እንዳ ተቃለሰ ከሎ  ብሓሰውቲ ተጠቒሙ ዝእሰርን ዝግረፍን ዝነበረ ሕጂ ድማ ኣመሓዳሪ ን/ዞባ ኣቶ ተኽለብርሃን ዘይገበርክዎ ጌጋታት ናብ ባይቶ ዞባ የሕሊፍካለይ ብዝብል ኣብ ምስሕሓብ ከምዝነበሩ`ሞ  ናቱ ኣምሳያ ሕኒኡ ክፈዲ ብዘይገበሮ  ኣብ ግዜ በዓል ናጽነት ኣብ ቤት ማእሰርቲ ከምዘእሰሮ  እሙናት ምንጭታት ይሕብሩ ። እቲ ብ ኣቦመንበርነት  መምህር ወልደኣብ  ንፎርማ ጥራይ ዝቆመ  ባይቶ ዞባ ደቡብ ጉዳይ ኣባሎም መም/ዓንደሚካኤል ተቢዖም ክሓቱ ዘይክእሉ ንሽም ጥራይ ምኻኑ ተጋሂዱ ። እቲ ዘሕዝን ክኣ ሙሴ ወዱ  ንመም/ዓንደሚካኤል ኮይኑ ተደናጋጺ ህግደፍ  ከምኡ’ውን ነቲ ኣብ ኤርትራ ከስርሖ ዝሸባሸብ ዘሎ ቪላ ንከይጋናደቦ ከምዘጽቀጠ ፈለጥቱ ይሕብሩ።

2.ተፈሪ ነጋሽ ኣብ 1978 ብድሌቱ ናጽነት ሃገር ንምምጻእ ተሰሊፉ ዝተቃለሰን ዘቃለሰን ብደረጃ ሓላፍነት ከም ዘገልገለን፡ድሕሪ ወራራት ወያነ ኣካይዳ መንግስቲ ደስ ስለ ዘይበሎ ብድሌቱ ስቪላዊ ጉዳዩ ይገብር ከም ዝነበረ ይንገር። ከምዚሉ እንዳሃለወ ፣ኣቶ ተኽለብርሃን  ኣመሓዳሪ ን/ዞባ ንዝገብሮ ዓመጻ ኣብቲ ን/ዞባ ዐገብ ስለዝብሎ ይሰሓሓቡ ከምዝነበሩ ይዝረብ።

3.ፈረንሳዊ ክፍለኣብ 78 ዝዕድሚኡ ተጋዳላይ ተጋድሎ ሓርነት (ጀብሃ) ዝነበረ፡ድሕሪ ጀብሃ’ውን ካብቶም ንናጽነት ሃገር ዓቢ ህርፋን ዝነበሮም ምስ ምሉእ ስድራኡ ኣባል ሓፋሽ ውድባት ህ/ግ ኮይኖም ከም ዝተቓለሱ እዩ ዝንገር።

4.ፍሻለ ነጋሽ ናጽነት ሃገር ንምምጻእ ፣ብሰንኪ ሓፋሽ ውድባት ምንባሩ ኣብ ቤት ማእሰርቲ ማርያም ግቢ ኣስመራ ናይ ቅድሚት ኣስናኑ ክምርመር  ከሎ ብሰደፍ ብረት ተሃሪሙ ዝተሰብረ  ድሕሪ ናጽነት መንግስቲ ኤርትራ ኣስናኑ እኳ ክትክእሉ ዘይከኣሉ ፣ሕጂ’ውን በዚ ሕሱር ስርዓት ኣብ ፈቐዶ ቤት ማእሰርቲ በታ ዝሰበረቶ ብረት ይሕሎ ኣሎ።

5.ሃብቶም ፍሰሃጽዮን ሃገራዊ ኣገልግሎት ኮይኑ ኣብ ምድሓን ሃገር ሓደ እግሩ ከም ዝሰንከለን  መንግስቲ ሓንቲ ከይ ገበረ ዝደርበዮ ኮይኑ ድሕሪ ምጥያሱ ከም ኣመሓዳሪ ከባቢ ዓዲ ጋዕቤን  ኮይኑ ዘገልገለ ብትሩን ሓቅነቱን ዝፍለጥ ምስ ኣማሕዳሪ ን/ዞባ ከምዘይሰማምዑ ውን ይንገር።

6.ሓዱሽ ኣበራ ሃገራዊ ኣገልግሎት ከምዝነበረን ከምዝተጣየሰን እዩ ዝሕበር ።

እዞም ዝስዕቡ ውን ብዝዓቅሞም ነዛ ሃገር ግብኦም ዘበርከቱ እዮም ።

7.ይከኣሎ በየነ

8.ገብረመስቀል እምባየ

9.ቴድሮስ በርሀ

10.ተስፋዝጊ በየነ

11.ተኽሎም ተስፋስላሴ

12.ጋይም ኣብርሃ

ዓወት ንውጽዕ ህዝቢ ኤርትራ ይኹን !!

ብሕጂ ንዝስዕብ ኣገዳሲ ሓበሬታ ንዝተባህለ ውን ክንሕብረኩም ኢና ።