ኣብ ሙሉእ ዓለም ንነብር ልዕሊ ክልተ ሲሶ ንኸውን ናይ ዓለምና ክርስትያናት፡ መዓልቲ ልደተ የሱስ ክርስቶስ ኣኽቢርና ኣሎና። እዚ በዓል ሰባት ምስ ናይ ቀረባን ርሑቕን ቤተሰብን፡ መሓዙትን ተኣኪብና ዝተፈላለየ መግቢ፡ መስተን፡ “ሳዕስዒትን” ከምኡውን ህያባትን ዝተለዋወጥናሉ ኩነት እዩ። እቲ ናይ’ዚ በዓል ዝዓበየን ዝበለጸን ህያብ ግና፡ እቲ እግዝኣብሄር፡ ንዓና ደቂ ሰባት፡ ብኣዳም ዝወረስናዮ ሓጥያት፡ ንምድምሳስ፡ ሞይቱ ዝተንሰአ ሓደ ወዱ፡ ኣባና ዘለዎ ክቱር ፍቕሪ ዝገለጸሉ ፍጻሜ እዩ።

“ኣምላኽ፡ በቲ ሓደ ወዱ ዝኣመነ ዅሉ ናይ ዘለኣለም ህይወት ምእንቲ ኺረክብ እምበር፡ ከይጠፍእሲ፡ ንወዱ በጃ ኽሳዕ ዚህብ፡ ክሳዕ ክንድዚ ንዓለም ኣፍቀራ።” ወንጌል ዮውሃንስ 3፡16።

ናይ እግዝኣብሄር ሓሳብ፡ ብሓቂ ሰላም፡ ፍቕሪን ሓጎስን ምዃኑ፡ ነዘን ዘሕለፍናየን ድሮን መዓልቲ ልደን ምዕዛብ እዩ ዘድልየና። ብሓቂ፡ ኣብ ሙሉእ ዓለም ክበሃል ይከኣል፡ ሰላም፡ ፍቕሪን ሓጎስን ሰፊኑ፡ ገና’ውና ካባና ኣይበነነ ዘሎ። ንሕና ደቂ ሰባት፡ ኣብ’ቲ ናይ እግዝኣብሄር ሓሳብ ክንጸንዕ እንተ ንኽእል፡ ምናልባት ሰላም፡ ፍቕሪን ሓጎስን መዓልታዊ ከየስተማቐርናዮ ኣይምስተረፍናን ኔርና ንኸውን።

ፍቕሪ እግዝኣብሄር፡ ብሓቂ፡ ካብ ንርድኦ ንላዕሊ ወይ ዝሓለፈ ምዃኑ፡ ኣብ ኤፈሶን 3፡18-19 ይነግረና እዩ፡ “…ምግፋሑን ምንዋሑን ምዕማቑን ቍመቱን እንታይ ምዃኑ ምስትውዓል ክትክእሉ፡ እሞ ነታ ንፍልጠት ሓለፍ እትብላ ፍቕሪ ክርስቶስ….።”

እቲ ዘሕዝን፡ ዓለምና ብፍቕሪ፡ ሰላምን ሓጎስን ዝተመልአት ዘይኮነት፡ ብዓመጽ፡ ውግእ፡ ሞት፡ ማእሰርቲ፡ ግፍዒ፡ ስደትን፡ መከራን ዝተመልአት እያ።

ህዝብና ኣብ’ዚ ዘመን እዚ፡ ቀንዲ ተኻፈልቲ ናይ’ዚ ሽግር ኮይኑ ኣሎ። ነዚ ዝተዓዘቡ ገለ ዜጋታትና፡ “ናይ ዓለምና ምጽኣት ብኤርትራ ግዲ እዩ ክጅምር?” ክሳብ ምባል ዝበጽሑ ኣለዉ። ዘለናዮ ሽግርን መገድናን ክንርእይ ተስፋ ዝህብ ኣይመስልን እዩ።

ይኹን እምበር፡ ናይ ናይ ደቂ ሰባት ሓሳብን፡ ናይ እግዝኣብሄር ሓሳብን በበይኑ እዩ። እግዝኣብሄር ህዝቡ ክገብረና ሓንሳብ ፈትዩ እዩ።  “እግዚኣብሄር ህዝቡ ኺገብረኩም ፈትዩ እዩ እሞ፡ ስለዚ እግዚኣብሄር ምእንቲ እቲ ዓብዪ ስሙ ኢሉ ንህዝቡ ኣይሐድጎን እዩ። ኣነስ እታ ጽብቕትን ቅንዕትን መገዲ እባ ደአ ኽምህረኩም እየ እምበር፡ ምእንታኹም ምልማን ብምሕዳገይ ንእግዚኣብሄር ምብዳልሲ ኻባይ ይርሐቕ።” 1ይ ሳሙኤል 12-22-23።

ኣብ ዘመና፡ ንህዝቦም ብሓቂ ከም ነፍሶም ዘፍቅሩ፡ ምእንቲ ህዝቦምን ሃገሮምን ዘይምልማን፡ ንእግዝኣብሄር ከም ምብዳል ዝቖጽርዎ ተባዓት ኣመንቲ ተላዒሎም ኣለዉ። እዚኣቶም፡ ናይ ስቕታ ሰንሰለት ሰበርቲ እዮም። “ኢድ እግዝኣብሄር ብመሰል መንፈሳውነትን ንጉስነትን” ኣብ ትሕቲ ዝብል ኣርእስቲ፡ ን21 መዓልታት፡ ካብ 1-21 ታሕሳስ 2016፡ ብሓባር ኣብ ጸሎትን ጸሙን ቀንዮም። (www.EriPrayer.org)

ኣብ ሙሉእ ዓለም ንዝርከቡ፡ ብኣዓሰርተታት ኣሽሓት ዝቑጸሩ ኤርትራውያን ኣመንቲ ብመንገዲ ፈይስቡክን ቴሌኮንፈረንስን ተሳቱፈሞ። እንተ ዘይ ተጋግየ፡ ኣብ ታሪኽ ኤርትራ ከም’ዚ ዓይነት ብዝሒ ሰባትን፡ ሕብረት፡ እምነትን ዘለዎ ስለ ኤርትራን ህዝባን ክጽለ ሰሚዐን ርእየን ኣይፈልጥን እየ።

እዚ ክቕጸልን ግብሪ ክሕወሶን ጸሎተይ እዩ። ነቶም ኣብ ስደትን መከራን ዘለዉ ዜጋታትና’ውን ብዘድልዮም ዘበለ ክንበጽሖም እግዝኣብሄር ንልብታትና ብተመሳሳሊ የላዓዕሎ።

ካለኦት ሃይማኖታት ተመሳሳሊ ስጉምቲ እንተ ዝወስዳ ኣብ ሓድነት፡ ሰላምን ፍቐኢን እታ ሃገር ዓበዪ ኣበርክት ኣለዎ እዩ። ጸሎት ቅዱሳን ይሰልጥ’ዮሞ ክሰልጠና እዩ።
እዚ ዘለናዮ ሽግር ክሓልፍ እዩ። ሃገርና ሰላም ወሪድዋ፡ ህዝብና ብፍቐሪ ዝሕጎሰሉ ርሑቕ ኣይኮነን። የግዳስ ንሕና ከም’ቲ የሱስ ክርስቶስ ዘፍቀረና፡ ናብኡ ብምትኳር፡ ነንሕድሕድና ንፋቐር።

ሰላም እግዝኣብሄር ምስ ኩሉና ይኹን። እግዝኣብሄር ንህዝብናን ሃገርናን ብሰላም ይባርኽ። እቶም ደለይቲ ሰላም፡ ሰላም ክረኽብዋ እዮም።

ቴድሮስ መንግስቱ

12/24/2016

ህዩስተን።