ብጉልባብ ሃይማኖት ህዝቢ ንምቍጽጻር መሳርሒ ስርዓት ህግደፍ ኮይኑ ዝነጥፍ ዘሎ ይፍታሀ ዲሜጥሮስ፡ ነቶም ብውዲት ስርዓት ህግደፍ፡ መንፈሳዊ መዓርግ ፓትርያርክ ኣቡነ እንጠንዮስ ብዘይሕጋዊ ኣገባብ መንጢሎም ዘለዉ ቀሺ ዲዮስቆሮስ ኣኸቲሉ ኣብ ቴልኣቪቭ፡ እስራኤል፡ ኣብ ዝገበሮ ዘይቅዱስ ምብጻሕ ተቓውሞ ከምዘጋጠሞ ምንጭታት ንኣሰና ሓቢሮም።
ብመሰረት’ቲ ሓበሬታ፡ ይፍታሀ ዲሜጥሮስ ምስ ቀሺ ዲሜጥሮስ፡ ሎሚ ንጉሆ፡ 21 ሚያዝያ፡ ኣብቲ ታቦቱ ብፖሊስ እስራኤል ተዓጽዩ ድሕሪ ምቕናዩ፡ ካልእ ኣዳራሽ ብምክራይ ሎሚ ተኸፊቱ ዘርፈደ መድሂነ ኣለም ቤተክርስትያን ብምምጻእ፡ ድሕሪ ‘ቲ ልሙድ ጸሎት መደረ ክገብር ማይክሮፎን ምስ ሓዘ፡ ኣብቲ ቦታ ዝተረኽቡ ተቓወምቲ ሓይልታት ኤርትራ፡ “እዚ ናይ ሃይማኖትን ጸሎትን ቦታ እምበር ከምዚ ኸማኻ ካድራት ህግደፍ ፖለቲካዊ ስብከት ዘካይዱሉ ቦታ ኣይኮነን።” ብምባል ኣትሪሮም ብምቅዋም፡ ደው ኣቢሎሞ።
በዚ ምኽንያት’ዚ ኣብቲ ቤተክርስትያን ታዕታዕን ምትፍናን ‘ኳ እንተተፈጥረ፡ እቶም ተቓወምቲ ብዘካየዱዎ ተሪር ስጉምቲ፡ ይፍታሄ ብህግደፍ ተዋሂቡዎ ዝመጽአ ፖለቲካዊ ተልእኾ ከምዘባኾሩዎ ገሊጾም።
ኣብቲ ኣጋጣሚ፡ ደገፍቲ ናይቲ ስርዓት ዝኾኑ ዲያቆናትን ውልቀሰባትን መጋዝን ሓጻዊንን ኣልዒሎም ክተሃራረሙ ኳ እንተፈተኑ፡ እቲ ምትፍፋናን ግጭትን ካብ ቁጽጽር ናይቶም ተቓወምቲ ከምዘይወጽአ ተሓቢሩ።
እቲ ህዝቢ ብሃማኖት ንምቍጽጻርን፡ ብመንፈሳዊ ኣገልግሎት ዝእከብ ገንዘብ ኣብ ኢድ ስርዓት ህግደፍ ዝውዕለሉ መንገዲ ንምጥጣሕን ካብ ኣስመራ ዝተዋፈረ ይፍታሀ፡ ኣብ እስራኤል ልዕሊ 10 መዓልታት ከምዝቐነየ እቶም ምንጭታት ብተወሳኺ ሓቢሮም።
ብሰንኪ’ቲ ስርዓት ህግደፍ ብቐጥታን ብመንገዲ ከም ብዓል ይፍታሐ ዝኣመሰሉ መሳርሒኡ ዝኾኑ ዕሱባትን ዘካይዶ ሽርሒታት፡ ኣብ ቴልኣቪቭዝርከብ ህዝብና፡ ኣብቲ ናይ ኣስመራ ታቦት ዘለዎ እንዳ መድሂነ ኣለም፡ ከምኡ ‘ውን ናይ ግብጺ ታቦት ዘለዋ እንዳ ማርያም ኣብ ክልተ ኣብያተ ክርስትያናት ተኸፋፊሉ ይግልገል ከምዘሎ ይፍለጥ።

ኣብቲ ደገፍቲ ስርዓት ህግደፍ ዝግልገሉሉ መድሂኔ ኣለም ዝርከቡ ገለ ኣቕሽሽትን ናይ ጸለመ ዘመተ ዘካይዱ ደገፍቶምን፡ ሕሉፍ ሓሊፉዎም፡ ነቶም ኣብ እንዳ ማርያም ዝግልገሉ መብዛሕትኦም ነቲ ንስርዓት ህግደፍ ዝነጸጉ ኤርትራውያን፡ “እዚኣቶም መናፍቓን እዮም፡ ኣብ እንዳማርያም ከይትምርዓዉ ደቅኹም ከይተጠምቑ” እናበሉ ንህዝቢ ጎስጓስ ከምዝገብሩሉን ‘ውን እቶም ምንጭታት ይሕብሩ።