ብዘይሕጋውያን መሰጋገርቲ ተመሪሖም ዶብ ሱዳን ቆሪጾም ሊብያ ዝኣትዉ ዝነበሩ ልዕሊ 60 ኤርትራውያን ኣብ መንጎ ሓለዋ ዶብ ወተሃደራት ሱዳንን ሊብያውያን ዕጡቓት ኣሸበርትን ኣብ በረኻታት ምድረበዳ ሰሃራ ናይ ተኸፍተ ውግእ ግዳይ ኮይኖም ሓንቲ ጓልን ሓደ ወድን ብጥይት ተወቒዖም ክመቱዎም ከለዉ፣ ሓደ ተወጊኡ ዘልዕሎ ዝሰኣነ ኤርትራዊ ኣብቲ በረኻ ተሪፉ ሃለዋቱ ከምዘይፍለጥ ምንጭታት ካብ ሱዳን ሓቢሮም።

ብመሰረት እቲ ሓበሬታ፣ እታ ዝመተት ኤርትራዊት መንእሰይ፣ ብሕማም ተኻኢላ ኣብ እግሪ ጎማ መኪና ተጸጊዓ ከላ ብጥይት ሱዳናውያን ወተሃደራት ዝተቐትለት ‘ያ። እቲ ሃለዋቱ ጠፊኡ ዘሎ ድማ፣ ከብዱ ብጥይት ተወቒዑ ዘልዕሎ ስኢኑ ኣብቲ ጸምጸም በረኻ ዝተረፈ እዩ። ካብቲ ኩነታት ድሒኖም ሱዳን ዝርከቡ ኤርትራውያን ከምዝሓበሩዎ፣ ሕሙም ይኹን ውጉእ ከተልዕል እንተፈቲንካ ንርእስኻ ብጥይት ከምእትቕተል ብምጥቃስ ዝነበሮም ኣማራጺ ነብስኻ ምውጻእ ጥራይ ምዃኑ የረድኡ።

እዚ ኩነታት ‘ዚ ቅድሚ ወርሒ ኣቢሉ ተፈጸመ ክኸውን ከሎ፣ ኩሎም እቶም ዝበዝሑ ኤርትራውያን ኣብ ትሕቲ ቁጽጽር ወተሃደራት ሱዳን ኣትዮም ናብ ካርቱም ብምምላስ ከምዝተኣሰሩ፣ ገሊኦም ገንዘብ ከፊሎም ድሮ ነጻ ተለቒቖም ከምዘለዉ ‘ውን ተፈሊጡ።