ብዓልቲ ቤቱ ነቲ ኣብ ፈለማ ናይዚ ዓመት ‘ዚ (ጥሪ 21 2013) ኣብ ውሽጢ ኣስመራ፣ ኣብ ዝተኻየደ፣ ብ”ስርሒት ፎርቶ” ዝፍለጥ ምንቅስቓስ ሓይልታት ምክልኻል ኤርትራ ንለውጢ መሪሑ ብጅግንነት ዝተሰውኤ፣ ኮሌኔል ስዒድ ዓሊ ሕጃይ (ወዲ ዓሊ) በኺታ እድሪስ ዑመር፣ ምስ ክልተ ደቃ፣ ሪሃም ስዒድ ዓሊ ሕጃይ ከምኡ ‘ውን ሪም ስዒድ ዓሊ ሕጃይ ካብ ምንጋጋ ምልካዊ ስርዓት ኢሳይያስ ኣምሊጣ ብሰላም ኣዲስ ኣበባ ከምዝኣተወት ምንጭታት ሓቢሮም።

ንሳ ኣብቲ ፈለማ ዘምለጠትሉ ሱዳን ንገለ ኣዋርሕ ብስቱር ተዓቝባ ድሕሪ ምጽናሕ ብምትሕብባር ግዱሳት ናብ ኢትዮጵያ ከምዝሰገረት ከኣ ተፈሊጡ ‘ሎ።

እቲ ምስ ካልኦት ተባዓት ብጾቱ፣ ኣብ ሕምብርቲ ምልካዊ ስርዓት ኢሳይያስ፣ ኣብ ኤርትራ ቅዋም ክትግበርን ናይ ፖለቲካ እሱራት ክፍትሑን ዝብሉ ጠለባት ዝርከቡዎም ናይ ለውጢ ዛዕባታት ብመንገዲ መደበር ቴለቭዥን ስርዓት ህግደፍ ብምእዋጅ፣ ነቲ ኣብ ኤርትራ ዘይመስል ዝነበረ ቅሉዕ ተቓውሞ ዘግሃደ ወዲ ዓሊ ካብ ዝተሰውኣሉ ዕለት ኣትሒዛ፣ ብዓልቲ ቤቱ ወ/ሮ በኺታ፣ በቲ ሓደ ብስርዓት ህግደፍ ብዝወርዳ ዝነበረ ጸቕጢ፣ በቲ ካልእ ወገን ከኣ መስዋእቲ ቃልኪዳና ካብተን ትሕቲ ዕድመ ደቃ ክትክውል መሪር ኣዋርሕ ከምዘሕለፈት እቶም ምንጭታት ንኣሰና ሓቢሮም።

ድሕሪ መስዋእቲ ኮለኔል ወዲ ዓሊ፣ ብዓልቲ ቤቱ፣ ኣብ ውሽጢ ሒደት ኣዋርሕ ካብቲ ኣብ ከረን ምስተን 13 ን 11ን ዝዕድሚኤን ኣዋልድ ደቃ ሰፊራትሉ ዝነበረት መንበሪ ገዛ፣ ከም‘ውን ካብቲ ተዋፊራትሉ ዝነበረት ሞያ ምምህርና ብህግደፍ ከምዝተሰጎገት እቲ ሓበሬታ የረድእ።

ጅግና ወዲ ዓሊ ምስ ብጾቱ ኣባላት ሓይልታት ምክልኻል ዘካየዱዎ ናይ ለውጢ ምንቅስቓስ ብኡንብኡ ‘ኳ እንተዘይተዓወተ፣ ኣብ ንቕሓት ህዝቢ ኤርትራ ብቐሊሉ ዘይሃስስ ኣሰር፣ ኣብ ፖለቲካዊ ምንቅስቓስ ደለይቲ ፍትሕን ዲሞክራስያዊ ለውጥን ከኣ ናህሪ ፈጢሩ እዩ። ኣብቲ እዋን’ቲ፣ ብዘይካ ‘ቲ ንወዲ ዓልን ብጾቱን ብምስዓብ ዕመሪ ምልካዊ ስርዓት ኢሳይያስ ዘይምሕጻርና ከቢድ ዕዳ ከምዘለና ዝተሰመዓና ጣዕሳን ሻቕሎትን፣  ኩሉ ደላዪ ፍትሒ ዝኣተዎ ኣገዳሲ መብጽዓ እንተነይሩ፣ ነቲ ስዉእ ወዲ ዓሊ ዘጓሃሃሮ ቃልሲ ብዝለዓል መንፈስ ምቕጻል፣ ማዕረማዕሪኡ ኸኣ ነቶም ምእንቲ ህዝብን ሃገርን ክብል ብዘይናባዪ ዝገደፎም ስድራቤቱ ምሕብሓብ እዩ። እንሆ ኸኣ እዋኑ መጺኡ ‘ሞ፣ ምእንቲ ፍትሕን ምእንቲ ሕልናናን በብዓቕምናን በብኽእለትናን ንስድራቤቱ ንጠውሮም።

ቅድሚ ኹሉ ብዓልቲ ብቱን ደቁን ናብ ውሑስ ዝኾነ ቦታ ተሰጋጊረን ሰላማዊ መነባብሮአን ዝመርሓሉን ባይታ ምጥጣሕ፣ ደቁ ትምህርተን ከምዝቕጽላ ምግባር፣ ምስኡ ኸኣ ንጉዕዞአን ኮነ መነባብሮአን ፋንያንሳዊ ደገፍ ምብርካት፣ ብሓፈሻ ናይ ምንባየን ሓላፍነት ከም ህዝቢ ግቡእና ምዃኑ ክንዝንግዕ ኣይግባእን።