ብዓልቲ ቤቱ ነቲ ብፖለቲካዊ ምኽንያት ኣብ ምስጢራዊ ቤትማእሰርቲ ምልካዊ ስርዓት ኢሳይያስ ምስ ተመቝሐ ሃለዋቱ ን 16 ዓመት መመላእታ ጠፊኡ ዘሎ ሓርበኛ ተጋዳላይ በራኺ ገብረስላሰ ሓርበኛ ተጋዳሊት ምሕረት ኢዮብ ኣብ መበል 65 ዓመታ ብቕድሚ ትማሊ 13 ሚያዝያ 2017  ዓሪፋ።

ተጋዳሊት ምሕረት ኢዮብ ንሓያለ እዋን ብሕማም ክትሳቐ ድሕሪ ምጽናሕ ‘ያ፣ ኣብ ገድሊ ብዘሕለፈቶ መሪር ቃልሲ፣ ድሕሪ ናጽነት ‘ውን ማእሰርትን ሃለዋት ምጥፋእን ብዓል ቤታ ብዘስዓበላ ክቱር ሓዘን ንዝነውሐ ዕድሚኣ ከይቀሰነት ካብ ዓለም ብመስዋእቲ ተፈልያ።

ብሕልፊ ማእሰርቲ ናይቲ ኣብ ገድሊ ላዕለዋይ ሓላፊ ጨንፈር ትምህርቲ፣ ድሕሪ ናጽነት ድማ ሚኒስተር ትምህርትን ዜናን ዝነበረ ገዲም ተጋዳላይ ብዓል ቤታ በራኺ ገብረስላሰ ሕዱር ጓሂ ከምዝነበራ ይፍለጥ።

ተጋዳሊት ምሕረት ኢዮብ፣ ኣብ ኣዲስ ኣበባ ዩኒቨርሲቲ ብዲፕሎማ ድሕሪ ምምራቓ፣ ኣብ 1978 ኣብ መሳርዕ ህዝባዊ ግንባር ሓርነት ኤርትራ ተሰሊፋ፣ ከም መምህር ኣብ ምዅስኳስ መንእሰያት ተማሃሮ ቤትትምህርቲ ሰውራ ከምኡ ‘ውን ኣብ ምምዕባል ስርዓተ ትምህርቲ (ካሪክለም)፣ ልዑል ኣበርክቶ ዝገበረት በላሕ ብዓልቲ ሞያ፣ ምቕልልቲ ሰብን ውፍይቲ ተጋዳሊትን እያ። ድሕሪ ናጽነት ‘ውን ኣብ ርእሲ’ቲ ኣብ ሚኒስትሪ ትምህርቲ ብደረጃ ሓላፍነት ኣብ ምምዕባል ትምህርቲ ዘወፈየቶ ሞያዊ ኣበርክቶ፣ ቀዋሚት ኣባል ኮምሽን ቅዋም ኮይና ሃገራዊ ቅዋም ኣብ ምንዳፍ እጃማ ኣበርኪታ። ኣብ ዩኒቨርሲቲ በርሚንግሃም ብማስተርስ ዲግሪ ብምምራቕ ኣብ ምምዕባል ስርዓተ ትምህርቲ ንዝነበራ ሞያዊ ኣበርክቶ ብዝለዓለ ቀጺላ።

ተጋዳሊት ምሕረት ብሰንኪ ግፍዐኛ ማእሰርቲ ብዓል ቤታ ሓርበኛ ተጋዳላይ በራኺ ገብረስላሰ ብውልቀመላኺ ኢሳይያስ፣ ከም መበለት ተቐይራ ዝዘኽተሙ ክልተ ውላዳ ዘዕበየት ጽንዕቲ ብዓልቲ ኪዳን እያ።

Assenna.com ንተጋዳሊት ምሕረት ኢዮብ መንግስተ ሰማያት ይቀበላ እናበለት፣ ንቤተሰብን ፈተወታን ጽንዓት ትምነየሎም።