ብወደብ ባጽዕ ዝካየድ ዝነበረ ንግዳዊ ንጥፈታት ‘ትራንዚት’ ናይቲ ብነስረዲን በኺት (ወዲ በኺት) ዝምራሕ ‘ሰቲት’  ሓዱሽ ሽም ኣጠሚቖሞ ዘለዉ ኩባንያ ንግድ ስርዓት ህግደፍ፣ ብፖርት ሱዳን ተቐይሩ፣ ወደብ ባጽዕ መሊሳ ተዳኺማ ከምዘላ ምንጭታት ኣሰና ሓቢሮም።

ቅድሚ ሕጂ፣ ብወደብ ባጽዕ ዝኣተወ ንግዳዊ ናውቲ ‘ትራንዚት’ ተባሂሉ ኣብ ዶብ ሱዳን ኣብ እትርከብ መካስተራት ዝተባህለት ራሻይዳ ዝቕመጡላ ቦታ ይረገፍ ‘ሞ፣ እቶም ናይ ሱዳን ልቸንሳ ዝሓዙ ኣብቲ ቦታ መኽዘን ዘለዎም ነጋዶ ንሓንቲ ኮይንተይነር 5 ሽሕ ዶላር ነቲ ብወዲ በኺት ዝካየድ ትካል ህግደፍ እናኸፈሉ፣ ነቲ ንብረት መሊሶም ናብ ናእሽቱ ነጋዶ የከፋፍሉዎ ነይሮም። እቲ ስርዓት ከኣ፣ ነቶም ናእሽቱ ነጋዶን ውልቀሰባትን ብኮንትሮባንዳ ከሲሱ ንብረቶምም እናዘረፈ ወይ እናቐጽዐ ብኽልተ መንገዲ ገንዘብ ክግሕጥ ጸኒሑ።

ኣብቲ ግዜ ‘ቲ፣ ስርዓት ህግደፍን እቶም ‘ዓበይቲ’ ነጋዶ ነቲ መኽሰብ ክማቐሉዎ ከለዉ፣ እቶም ካብቲ መኻዚኖታት ገዚኦም ናብ ህዝቢ ዝሸጡ ዝነበሩ ናእሽቱ ነጋዶን ልውቀሰባትን እዮም ዝውጽዑ ነይሮም።

በዚ ሕጂ ምልካዊ ስርዓት ኢሳይያስ ኣተኣታትዩዎ ዘሎ ብ ፖርት ሱዳን ዝካየድ ናይ ትራንዚት ሓዱሽ ኣሰራርሓ ግን፣ እቲ ስርዓት ነቲ ንግዳዊ ንጥፈታት መሊሱ ዓብሊሉ፣ ምሉእ ብምሉእ መኽሰብ ይግሕጥ ኣሎ።

ነዚ ንምስላጥ፣ መዓርፎ ናይቲ ብትራንዚት ብፖርት ሱዳን ዝኣቱ ዘሎ ንብረት፣ ካብታ መካስተራት እትብሃል 5 ኪሎሜትር ካብ ዓሊ ግደር ርሒቓ እትርከብ ቦታ ናብ ዓሊ ግድር ተቐይሩ፣ በቲ ኣብ ተሰነይ ዝርከብ ቤትጽሕፈት ወዲ በኺት ይካየድ ከምዘሎ ይፍለጥ።

እዚ ብሓሶት ብትራንዚት ዝግለጽ ዝተሓላለኸ ኣሰራርሓ’ዚ፣ እቲ ‘መንግስቲ’ እየ ዝብል ምልካዊ ስርዓት ኢሳይያስ፣ ካብ ሕጋዊ ንጥፈታት ንግድ ኣላጊሱ፣ ንኹሎም ኮንትሮባንደኛታት ውሒጡ፣ ብወግዒ ኣብ ኮንትሮባንዳዊ ዕማም ተዋፊሩ ከምዘሎ ዘርኢ ዘጸይፍ ኣሰራርሓ እዩ።

እዚ መንግስታዊ ኮንትሮባንዳ’ዚ፣ ኢሳይያስ ኣብዚ ዝሓለፈ ቀረባ እዋናት ኣብ ፖርት ሱዳን በጺሑ ምስ ተመልሰ ዝተኸስተ ተርእዮ ምዃኑ እቶም ምንጭታት ሓቢሮም።