ብኸቢድ ሕማም ከብዲ (Liver)ተጠቒዑ ዘሎ መራሒ ስርዓት ህግደፍ ውልቀመላኺ ኢሳይያስ ኣፈወርቂ፡ ኣብ ዱባይ ኣብ ትሕቲ ጽዑቕ ሕክምናዊ ምህላዉ ምንጭታት ካብቲ ቦታ ኣረጋጊጾም።

ብመሰረት’ቲ ሓበሬታ፡ ሕማሙ ኣብቲ ናይ መወዳእታ ደረጅኡ በጺሑ ብምህላዉ፡ ብመድሃኒት ናይ ምሕዋይ ተኽእሎኡ ምህሙን ኮይኑ ስለዘሎ፡ ከብዲ (Liver) ክቕየረሉ (Transplant ክግበረሉ) ጥራይ ከምዘለዎ፡ ቅያር እንተዘይረኪቡ ግን ክመውት ከምዝኽእል ብሓካይም ተሓቢሩዎ ‘ሎ።

እቲ ምቕያር ከብዲ ንገዛእ ርእሱ፡ እቲ ተሪፉዎ ዘሎ እንኮን ናይ መወዳእታን ምርጫ ኳ እንተኾነ፡ ከምዘየተኣማምን፡ ድሕር’ዚ ፍወሳ’ዚ ኣሽንባይ ከም መራሒ ክቕጽል፡ ውልቃዋዊ ህይወቱ ንምምራሕ ‘ውን ኣጠራጣሪ ምዃኑ እቶም ሓኻይም ከምዝገለጹ እቲ ሓበሬታ ብተወሳኺ የመልክት።

ኣብ ሪያድ ዝመደበሩ፡ እንተላይ ናይ ኣቡዛቢ ሓላፍነት ዘለዎ ኣምባሳደር ስርዓት ህግደፍ ኣብ ስዑዲ ዓረብ፡ ኣቶ ኣሕመድ ዑመር ማሕሙድ ንኢሳያስ ኣሰንዩዎ ከምዘሎ ብተወሳኺ ተፈሊጡ።

ንኽብደት ሕማም ኢሳይያስ ኣጸቢቖም ተገንዚቦሞ ዘለዉ መራሕቲ ስርዓት ህግደፍ፡ ነቲ ኩነታት ብምስጢር ሒዞም ካብ ህዝቢ ብምሕባእ፡ ፖለቲካዊ ኩነታት ኤርትራ ንምቍጽጻር ዝሕግዞም ኣወዳድባ ንምድህሳስ ኣብ ቀጻሊ ምስጢራዊ ኣኼባታት ከምዝርከቡ ካብ ኣስመራ ዝረኸብናዮ ሓበሬታታት የረድእ።

ኩነታት ጥዕና ኢሳይያስ ኣብ ተኣፋፊ ደረጃ ስለዝርከብ ምዕባሌታቱ እናተኸታተልና ተወሳኺ ሓበሬታ ከነስዕበልኩም ክንፍትን ኢና።