ብተደጋጋሚ ግዜ ኣብ ጉያ ቀዳመይቲ እናወጽአት፣ ስደተኛ ጥራይ ብምዃና ብእስራኤላውያን ካብ ሽልማት ዝተኣገደት ጓል 13 ዓመት ኤርትራዊት ተቐዳዳሚት ራሄል ገብረጻድቕ፣ ኣብቲ ትማሊ ኣብ ደንቨር (ኮሎራዶ) ዝተኻየደ ጽምብል ኣህጉራዊ መዓልቲ ደቂ ኣንስትዮ ብ ኤርትራውያን ደቂ ኣስንትዮ ንለውጢ ጽዋእ ተሸሊማ። ተሳተፍቲ ናይቲ ጽምብል ከኣ ነታ ብልጽቲ ኤርትራዊት ንምትብባዕ ብኡ ንብኡ ዘዋጽኡዎ 1000 ዶላር ኣበርኪቶምላ።

ኣብቲ ብናይ ቪድዮ ሊንክ ዝተኻየደ ናይ ሽልማት ስነስርዓት፣ ንኤርትራውያን ደቂ ኣስንትዮ ንለውጢ ወኪላ ኣድያም ሃይለ ሩፋኤል ኣብ ዝስሃበቶ ቃል፣ ብእስራኤላውያን ሽልማት ምእጋዳ ቀዳመይቲ ካብ ምዃን ከምዘየትርፋ፣ ኣብ ልቢ ኤርትራውያን ኩሉ ግዜ ቀዳመይቲ ምዃና ገሊጻትላ፣ ተቐዳዳሚት ራሄል ብወገና በቲ ንምትብባዓ ዝተዋህባ ሽልማት ሕጉስቲ ምዃና ኣመስጊና። ኣብቲ ኣጋጣሚ፣ ብቪድዮ ሊንክ ዝተዛረቡ ስድራቤታ፣ ኣሰልጣኒኣን ነቲ ዛንታ ኣብ ጋዜጣ ዝጸሓፈቶ ጋዜጠኛን ‘ውን በቲ ኤርትራውያን ንራሄል ንምትብባዕ ዝወሰዱዎ ተበግሶ ሓጎሶም ብምግላጽ ሞያዊት ተቓዳዳሚት ክትከውን ክደጋገፉዋ ምዃኖም ኣረጋጊጾም።

ኣብቲ ኣብ ደንቨር ዝተኻየደ ጽንብል ዝተሳተፉ ዕድማት ‘ውን ኤርትራውያን ደቂ ኣስንትዮ ንለውጢ ንወጽዓ ናይታ ተስፋ ዘለዋ ኤርትራዊት ቆልዓ ራሄል ገብረጻድቕ ዘኪሮም ኣብ ኣጋጣሚ ጽምብል ደቂ ኣንስትዮ ምሽላሞም ሞጊሶም።