ብጃምላዊ ሕቶ ዑቕባ ኤርትራውያን ተጻወቲ ኩዕሶ እግሪ ኣብ ቅድሚ ዓለም ብተደጋጋሚ ዝተዋረደ ምልካዊ ስርዓት ኢሳይያስ፣ ኣብቲ ካብ 27 ሕዳር ጀሚሩ ኣብ ኬንያ ዝካየድ ናይ ሰካፋ ውድድር ኩዕሶ እግሪ ሃገራት ምብራቕ ኣፍሪቃ ንምስታፍ፣ ኣብ ወጻኢ ዝቕመጡ ኤርትራውያን ተጻወቲ ኣኻኺቡ ጋንታ ከቕውም ሃታ ሃታ ይብል ከምዘሎ ተፈሊጡ።

እቲ ናይ ምብራቕ ኣፍሪቃ ውድድር ኩዕሶ እግሪ ሰለስተ ሰሙን ጥራይ ‘ኳ ተሪፉዎ እንተሎ፣ ገለ ካብቶም ህግደፍ ሓይሩዎም ዘሎ ኣብ ወጻኢ ዝነብሩ ተጻወቲ ዛጊት ናብ ኤርትራ ኣይኣተዉን ዘለዉ። ብሰንኪ ‘ቲ ቅድሚ ሕጂ ዘጋጠሞ ተደጋጋሚ ህድማን ዘስዓበሉ ውርደትን፣ ኣይተሳተፍን ተባሂሉ ተወሳኺ ውርደት ከየጋጥሞ ንሽሙ ነይረ ክብል ከኣ’ዩ ብዘይ ብቑዕ ልምምድ ነታ ጋንታ ኣብ ውድድር ክጸምዳ ዝጓየ ዘሎ።