ብ ‘ብልሽውና’ ተኸሲሱ ካብ 2008 ክሳብ 2013 ን 5 ዓመት ኣብ ማይ ሑጻ ተኣሲሩ ዝነበረ፣ ሓላፊ ጸረ-ስለያ ስርሒት ዞባ 2 ነበር (ኣብ እዚ ውጩ ዝነበረ) ካፕቴን ኣሚነ ምስግና፣ ኣብ መካስተራት ናይ ነዳዲ ትካል ከፊቱ፣ ካብ ሱዳን ብራሻይዳ ብኮንትሮባንዳ ዝኣተወ ነዳዲ ገዚኡ፣ ናብቲ ብወዲ በኺት ዝመሓደር ትካል ንግዲ ህግደፍ (ሰቲት) ይሸይጦ ምህላዉ ምንጭታት ኣሰና ካብ ከባቢ ተሰነይ ሓቢሮም።

ኣሚነ ምስግና ዝተኣሰረሉ ክስታት፣

1ይ – ምስ ስግረዶብ (ሰባት ናብ ሱዳን ምስግጋር )

2ይ- መሬት ምግባት (ብዘይ ኣገባብ ዘይመጠንካ መሬት ብምግዛእ)

3ይ- ንብረት ዓቃብ ሰላም ብምሻጥ፣ ዝብል እዩ ነይሩ።

ይኹን’ምበር ንኽብደት ናይቲ ተኸሲሱሉ ዝነበረ ጉዳይ ዝፈልጡ ኣባላት ሰራዊትን ህዝብን፣ ካፕቴን ኣሚነ ምስግና፣ ካብ ማእሰርቲ ወጺኡ ከምዚ ዝኣመሰለ ዕድል ተዋሂቡዎ፣ ናይ ነዳዲ መከፋፈሊ ገይሩ ነቲ ናይ ስርዓት ህግደፍ ትካል ንግድ ብኮንትሮባንዳ ዝተረኽበ ነዳዲ የቕርበሉ ምህላዉ ብዙሕ ምጥርጣራት የርእዩ ኣለዉ።

‘ሃብታማት ተሰነይ ኣዋጺኦም እግሪ ኣትኪሎሞ’ ዝብል፣ ነቲ ምጥርጣራት ንምህሳስ ዝተዘርግሐ ወረ ‘ኳ እንተሎ፣ በንጻሩ ኣብቲ እዋናት’ቲ ናይ ሓለዋ ዶባት ኣዛዚ ዝነበረ፣ ገንዘብ ብምኽዕባት ብዙሕ ዝሕመ ተኽለ ማንጁስ ብዝሃቦ ገንዘብ ተበጊሱ ከምዘሎ፣ በቲ ኻልእ ወገን ከኣ፣ እቲ ስርዓት ካብ ማእሰርቲ ምስ ኣውጽኦ፣ ከም ብሕታዊ ነጋዳይ ተመሲሉ፣ ነቲ ብራሻይዳ ካብ ሱዳን ዝኣቱ ዘሎ ነዳዲ ኣኪቡ ከምጽኣሉ ብጉልባብ የስርሖ ምህላዉ ይንገር ኣሎ።

ምስዚ ኣብ ዝተኣሳሰረ ሓበሬታ፣ ‘ወዲ ዛራ’ ዝብሃል፣ ድሕሪ ኣሚነ ምእሳሩ ነቲ ናይ ጸረ-ስለያ ስራሕ ስርሒት ዞባ 2 ብሓላፍነት ዝተቐበለ ምኽትል ኮፖራል፣ ኣብ ከረን ፐላሶ ብምስርሑ፣ ኣብ ሻምብቆ ጓል ኣንከረ ካብ ዝተባህለት ነጋዲት መሬት ብምግዝኡ ተኸሲሱ ኣብ ባረንቱ ኣብ ቤትማእሰርቲ ሃገራዊ ድሕነት ተታሒዙ ከምዘሎ እቶም ምንጭታት ሓቢሮም።

ማእሰርቲ ወዲ ዛራ፣ ነቲ ኣብ ባረንቱ ካብ ፎርቶ ክሳብ መዓርፎ ኣውቶቡስ ምሸት ምሸት ኣካላዊ ምውስዋስ ኣብ ዝገብረሉ እዋን ወትሩ ዘሰንዮ ዝነበረ፣ ክሳብ ‘ዚ ቀረባ እዋን ኣዛዚ ስርሒት ዞባ 2 ኮይኑ ዝጸንሐ ሜጀር ጀነራል ሃይለ ሳሙኤል (ቻይና) ከምዘሰንበዶ ‘ውን ይንገር።

ብዘይካ ‘ዚ፣ ሓላፊ ‘ተሃድሶ’ ባረንቱ ግርማይ ዛግር ዝተባህለ ካልእ ኣባል ‘ውን ኣብ ትሕቲ ቀይዲ ሃገራዊ ድሕነት ከምዝርከብ ተፈሊጡ ‘ሎ።

እዞም ሰለስቲኦም ኣብ ተመሳሳሊ ጽፍሕታትን ከባብን ዝነበሩ ታሕተዎት ሓለፍቲ፣ ንእሱራት ብጉቦ ካብ ማእሰርቲ ብምልቃቕ ገንዘብ ከምዘኻኽበቱ ‘ውን ይንገር።

እዚ ተርእዮ ‘ዚ፣ እቲ ብዘሰንብድ ናህሪ ዘስፋሕፍሕ ዘሎ ግቦን ብልሽውናን ካብ ላዕለዎት ኣዘዝቲ ምልካዊ ስርዓት ህግደፍ ናብ ታሕተዎት ሓለፍቲ ዘሪቑ፣ ስርዓት ህግደፍ ብብልሽውና ጠስጢሱ ከምዘሎ ዘርኢ እዩ።

እቲ ንርእሱ ብልሹው ዝኾነ ውልቀ ምልካዊ መራሒ ኢሳይያስ ኣፈወርቂ፣ ንስልጣኑ ክሳብ ዝሓለወሉን ዘይተጻብኦን፣ ናይ ዝኾነ ሰብ ተሳትፎ ኣብ ግቦን ብልሽውናን ዝዓጅቦ ኣይኮነን። ኣዘዝቲ ሰራዊት ኤርትራ ብነጻ ጉልበት ሃገራዊ ኣገልግሎት ኣብ ውልቆም ዝውዕል ጀራዲን ከልምዑ፣ ንግዳዊ ድኳናት ክተኽሉ፣ ካብኡ ሓሊፎም፣ ኣብ ልዕሊ ምእዛዝ ሰራዊት፣ ከተማታት ከመሓድሩን ክፈርዱን ዕድል ብምሃብ ናይ ብልሽውና ባይታ ዝፈጠረ ኢሳይያስ ባዕሉ እዩ።

ኣብ መጻኢ፣ ነዚ ኣብ ኤርትራ ሳዕሪሩ ዘሎ ደረቱ ዝሓለፈ ባህሊ ብልሽውና ናይ ምምሓው ስራሕ ሓደ ካብቶም ዝዓበዩ ብድሆታት ከምዝኸውን ናይ ቀረባ ተዓዘብቲ ሻቕሎቶም ይገልጹ።