ብምቝሕ ሰንሰለት ምልካዊ ርዓት ኢሳይያስ ንልዕሊ 15 ዓመታት ዝተሳቐየ፣ ካብ ቤትማእሰርቲ ካርሸሊ ኣብ ወርሒ መጋቢት ፈንጢሱ ባዕሉ ነብሱ ሓራ ዘውጽአ ጅግና ኤርትራዊ ፓይሎት ደጀን ዓንደ ሕሸል፣ ብምኽንያት መብል 23 ዓመት ናጽነት ምስ ድምጺ ኣሰና ፍሉይ ቃለመጠየቕ ኣካይዱ።

ንሱ ኣብቲ ምስ ድምጺ ኣሰና ንፈለማ ግዜ ድሕሪ ምፍንጣስ ካብ ማእሰርቲ ዘካየዶ ተኸታታሊ ቃለመጠየቕ፣ ንድሕረባይትኡ፣ ኣመዓባብላ ሞያኡ ከም ፓይሎት፣ ጸገማት ሓይሊ ኣየር ኤርትራን፣ ተሳታፍነቱን ኣብ ኵናት ኤርትራን ኢትዮጵያን፣ ኣተኣሳስራኡ ብምልካዊ ርዓት ኢሳይያስ፣ ኩነታት ማእሰርቱን ኣወጻጽኣኡን ዘጠቓልል  ሰፊሕ መርብርሂ ሂቡ ‘ሎ። 

እቲ ወዲ ክልተ ዓመት ከሎ ተሓዚሉ ምስ ስድርኡ ናብ ሳሕል ዝወፈረ ኣብ ጉዕዞ ሳሕልን ቤትትምህርቲ ሰውራን ብነፈርቲ ስርዓት ደርግ ዘጋጥም ዝነበረ ደብዳብ ነፈርቲ ዝዓበየ ብድሆኡ ከም ዝነበረ ዝዝክር ወዲ ስድራቤት ተጋደልቲ፣ ድሕሪ ናጽነት ካብተን ዝደብድባኦ ዝነበራ ነፈርቲ ውግእ ኢትዮጵያ ዝተራቐቓ ሚግ 29 ኣብ ሰማያት ኤርትራ ከብርር ዝበቕዐ ቀዳማይ ኤርትራዊ ፓይሎት ክንሱ፣ ቀዳማይ እሱር ኤርትራዊ ፓይሎት ኮይኑ 15 ዓመታት ኣብ ማእሰርቲ ምብላዩ፣ ነቲ “ ሰውራ በላዒት ደቃ ‘ያ” ተባሂሉ ዝምሰል ኣበሃህላ፣ በቲ ጨካንንን ክፉእን መልክዑ ዘረጋግጽ ኣንደበት ምዃኑ ካብ ዛንትኡ ንርዳእ።

ኣብ ወርሒ መጋቢት ብዜና ኣሰና ከምዝተኻታተልኩሞ ፣ እቲ ፍትሒ ምስ ሰኣነ ነቲ ኣብ ሕምብርቲ ኣስመራ ዝርከብ ጽኑዕ ቤትማእሰርቲ ምልካዊ ስርዓት ህግደፍ፣ ካርሸሊ፣ ፈንጢሱ ባዕሉ ሓርነቱ ዘረጋገጸ ፓይሎት ደጀን ዓንደ ሕሸል ዝወሰዶ ተባዕ ስጉምቲ፣ ነቲ ሎሚ – ሎሚ ኣዝዩ ሳሕቲ ኮይኑ ኣበይ ከምዝኣተወ ንኹላትና ኣጨኒቑና ዘሎ ኤርትራዊ ጅግንነት ዘዘኻኽር፣ ዋላ ኣብቲ ዝኸፍአ ኩነታት ተስፋን ሓቦን ምግባር ዝፈድየካ ናይ ዓወት ጕንዖ ከምዘለዎ ብግብሪ ዘመስክር፣ ልዕሊ ኹሉ ኸኣ እቲ ንመላእ ህዝቢ ኤርትራ ብፍርሕን ራዕድን ናብ ዝኸፍአ ባርነት መሊሱዎ ዘሎ ምልካዊ ስርዓት ኢሳይያስ ሞሽሚሹ ከምዘሎ፣ ህዝቢ ኤርትራ ከኣ ብሓደ ክፍራሕ ዘይግብኦ ጓንጓ ስርዓት ተመሊኹ ይኸይድ ብምህላዉ ዘኪሩ ተባዕ ናይ ለውጢ ስጉምቲ ክወስድ ከምዝግብኦ ዘረጋግጽ ስጉምቲ እዩ።

ክቡራት ተኸታተልቲ ኣሰና፣ ንዛንታ እቲ ጅግና ኤርትራዊ ፓይሎት ደጀን ዓንደ ሕሸል ባዕልኻትኩም ካብቲ ኣፍ ፈረስ ኣብ ድምጺ ኣሰና ርኸቡዎ፣ ካብ ሎሚ ምሸት 17 ግንቦት ኣትሒዝና ብተኸታታሊ ክንፍንዎ ምዃና ነዘኻኽረኩም።