ብምልካዊ ስርዓት ኢሳይያስ ንኤርትራ ከይኣቱ ንነዊሕ ዓመታት ተኸልኪሉ ናይ ዝጸንሐ ማዕከን ዜና ቢቢሲ ልኡኽ፡ ሳም ፕራንቲ፡ እቲ ስርዓት Millennium Development Goals የዐዊተ ኣለኹ `ሞ ርኣዩለይ ስምዑለይ ክብል ብዘቅረበሉ ዕድመ መሰረት ኣስመራ ድሕሪ ምእታዉ፡ ንናጽነት ፕረስ ብዝምልከት ኣብ ኤርትራ ዝተረኽበ ዝኾነ ይኹን ለውጢ ከምዘየልቦ ፡ እቲ ስርዓት ከም ቀደሙ ጨፍላቒ ናጽነት ፕረስ ኮይኑ ይቕጽል ከምዘሎ ብጭብጢ እረዲኡ ።

ንሱ ትማሊ 11 መጋቢት ካብ አስመራ ብቐጥታ ኣብ ዘመሓላለፎ ጸብጻብ፡ `ሓላፊ ፖለቲካዊ ጉዳያት ናይቲ ንኤርትራ ዝገዝኣ ዘሎ እንኮ ሰልፊ ህግደፍ የማነ ገብረኣብ፡ እዚ ዓዲ ነጻ እዩ፡ ህዝቢ ብዘይስክፍታ ሓሳቡ ብነጻ ክገልጽ ይኽእል እዩ፡ ነዚ ምስ ዝደለኻዮ ሰብ ብምዝራብ ከተረጋግጾ ትኽእል ኢኻ` ድሕሪ ምባሉ ኣብ ጎደናታት ኣስመራ ወሪዱ ከዘራርቦም ካብ ዝሓተቶም 37 ሰባት ብምሉኦም እቶም 37 ኣይፋል ኢሎም ሓሳቦም ክገልጹ ቅሩባት ከምዘይኮኑ ብምግላጽ ከምዝነጸጉዎ፡ ገሊኦም ብዘይ ማይክሮፎን ዘዘራረቡዎ ድማ፡ `ይከታተሉና ስለዘለዉ ክንዛረበካ ኣይንኽእልን ኢና` ከምዝበሉዎ ኣገንዚቡ።

ጋዜጠኛ ቢቢሲ ሳም ፕራንቲ፡ ካብቲ ኩነታት ህዝቢ ሓሳቡ ክገልጽ ከምዘይክእል፡ ኣብ ከተማ አስመራ ዘይሩ ካብ ዝረኣዮ ናይቲ ብመንግስቲ ዝሕተም ጋዜጣ ንመንግስቲ ዝንእድ ናይ ውዳሰ ጸብጻባት ጥራይ ከምዝረኣየ ብምምልካት ድማ፡ ኤርትራ ኣብ መስርዕ ናጽነት ፕረስ ዓለም ኣብ ዝተሓተ ደረጃ ምህላዋ ብዘየማትእ ግቡእ ቦታኣ ከምዝኾነ ብመርትዖ ኣረዲኡ።

ነቲ ናይ ቢቢሲ ጸብጻብ ንምስማዕ ኣብዚ ይጠውቑ