ከምዝዝከር ካብ ሕዳር 21 ክሳብ ሕዳር 30/2011 ኤሪትራዊ ሃገራዊ ጉባኤ ንደሞክራሲ ለውጢ ኣብ ኢትዮጵያ፡ ኣብ ኣዋሳ፡ ርእሰከተማ ናይ ደቡብ ብሄረስባት ክልላዊ መንግስቲ፡  ተኻይዱ። ኣብዚ ታሪኻዊ ጉባኤ ካብዝተሳተፉ ሓደ ብምንባረይ  እዛ ሓጻር ናይ ውልቂ ርእይቶይ ክህብ እፈቱ ።

እቲ ዝተኻይደ ጉባኤ እንተስ ክነድምዕ ፡ እንተስ ንኸይነድምዕ፡ ዛዕባታቱን፡ መድረኻቱን ፡ ሙሉእ ብምሉእ፡ ወነንቱ፡ ንሕና ጉባኤኛታት ባዕላትና ከምዝነበርና ኣጥቢቐ፡ ከስምረሉ እፈቱ። ድሕሪ ብዙሕ ምይይጥ ከኣ ጉብኤ ንፍትሒ ሲኢኑ ዝሳቐ ፡ ዘሎ ህዝቢ ኤሪትራ፡ ተስፋ ዝህብን፡ ንሰብሕልና ተቓለስቲ ብ ሓደ መኣዲ ዘጓዕዝን ውሳኔታት ኣሕሊፉ መርሕነቱ መሪጹ፡ ብዓወት ኢዩ ተዛዚሙ።

ብዘይ ናይ ኢትዮጵያ መንግስትን ህዝብን ሓገዝ ነዚጉባኤ’ዚ  ክተካይድ  ከምዘይከኣል፡ ዘይከሓድ፡ ሓቂ ኢዩ። መንግስቲ ኢትዮጵያ ንድሕንነት ጉባኤኛታት፡ ቅድምያ ብምሃብ ፡ ን ኣስታት 600 ዝኣክል ጉባኤኛ፡ ምሉእ ሓለዋ ብምሃብ ፡ ናይ ኣውቶቡሳት፡ ናይ ሆተላት ፡ ናይ መግቢ፡ ናይ መኤከቢ ኣደራሽ፡ ናይ ኣገልግሎት ጥዕና ፡ ወጻኢታት ብምሽፋን ፡ ነዚ ኣብ ፈቐድኡ ተበታቲኑ ዘሎ ህዝቢ ኤሪትራ ንኽላዘብ ምቹእ ሃዋሁን ባይታን ብምፍጣሮም፡ ብዓቢኡ ንፈደራላዊ መንግስቲ ኢትዮጵያ፡ ክብ ዝበለ ምስጋና ይብጸሓዮም ክብል እፈቱ። ከምኡ ከኣ ነቲ ዝተፋላለዩ ህብረ ብሄረሰቦች፡ ብስኒትን ብራህዋን ሓቢርካ ናይ ምንባር ኣብነት ዝኾነት፡ 53 ዝተፈላለዩ ህብረ ብሄረሰባትን፡ 17 ሚልዮን ህዝብን፡ ዝነብሩላ  ደቡብ ብሄረሰቦች ክልላዊ መንግስትን፡  ህዝቢ ኣዋሳን ዝገበሩልና እንግዶት ኮነ፡ ዘርኣዩና ፍቕርን ምስጋናይ፡ ወሰን የብሉን።

ህዝቢ ተኣኪቡ ዝካታዓሉን ዝዛተየሉን መድረኽ እንድሕሪ፡ ረኺቡ  ሽግሩ ከምዝፈትሕን ፍልልዩ ከምዘጽብብን፡ ብርግጽ ምዃኑ እዚ ናይ ኣዋሳ ዓቢይ ምስክር ኢዩ። ካብ 23 ዘይውሕዳ ሃገራት ዝተኣከቡ ናይ ምሉእ ሕብረተሰብ ኤሪትራ ዝውክል ዝተፈላለየ ድሕሪ ባይታ ዘለዎ ህዝቢ ተኣኪቡ ፡ እሂን ምሂን ተበሃሂሉ፡ ተፋሊጡ፡ ተኻቲዑ፡ ተጋኒሑ፡ ተኣማሚኑ፡ ቀደምትነት ሰሪዑ፡ ብሓጎስ ከኣተፈላልዩ።

ንምንታይ ኢዮም ግን መንግስቲ ኢትዮጵያ እዚ ኵሉ ወጻኢታት ገይሮም ኤርትራዊ፡ ንኽዛተ ባይታ ዝህብዎ? እንታይ ረብሓታት’ከ ኣለዎም?

ገለ ናይ ፖለቲካ መሎኮታውያን ከም ዝብልዎ፡  እቲ ኣኸባ ቢትዮጵያውያንን ብናይ ኢትዮጵያ ኣጀንዳን ኢዩ ዝካይድ፡ እዚ ከኣ ብኢትዮጵያ ዝዝወር ድኹም መንግስቲ ኣብ ኤርትራ ንምምስራት፡  ዓፋር ሒዝካ ፡ዓሰብ ኣካል ኢትዮጵያ ንምግባር፡ ኤርትራ እንደገና ናብ ኢትዮጵያ ምምላስ፡ዝኣመሰሉ ሓረጋት ክትንብዩ ይስማዕ።

ኣብ ኣደባባይ፡ ብወግዒ ብመንግስቲ ኢትዮጵያ ዝግለጽ ከኣ ልዕላውነት ኤርትራ ይኣምኑ፡ ዓሰብ እካል ኤርትራ ምዃና ዓው ኢሎም ይገልጹ፡ ውሳኔ ምሕንጻጽ ዶብ ይቕበሉ፡ ንኣተገጋብርኡ ከኣ ንዛረብ ይብሉ፡

እሞ ኣብ ከምዚ ዝበለ ኩነታት ነየናይ ኢኻ ትቕበል ወይ ትኣምን? ነቲ ኣብ ቅድሚ ምሉእ ዓለም ዝተባህለ፡ ነቲ ብዓይንኻ ዝረኣኻዮ፡ ብእዝንኻ ዝሰማዕካዮ ብኣፍካ ዘንበብካዮ ድኻ ትኣምን? ወይስ ነቲ ካብ ዝኾነ ኣካል መንግስቲ ኢትዮጵያ ዘይስማዕካዮ ፡ናይ ፖለቲካ መሎኮታውያን ምጥርጣራት ንምንዛሕ ዝዝርጋሕ ወረ? ከምቲ፡ ብላዕ ንኸርስኻ ፍረድ ንነብስኻ ዝበሃል፡ ዝረኣኻዮ መስክር ዝተዛረብካዮ ዘክር ኢዩ’ሞ፡ መንግስቲ ኢትዮጵያ ኣብ ልእላውነት ኤሪትራ ዘሎዎም መርገጺ ደጋጊሞም ዘነጸሩን ቅድሚ ዓለም ንኤርትራ ዝፈለጡን ኢዮም።

ኢትዮጵያ ንኤርትራውያን መማያየጢ ባይታ ተዳልወሎም ዋና ምኽንያት ኣብ ኤሪትራ ሰላም ዘምጽእ ለውጢ ንምምጻእ ኢዩ።ረብሓታታ ከኣ በዞም ዝስዕቡ ክጥቅስ ይከኣል፡

ሰላም ኣብ መንጎ ኤሪትራን ኢትዮጵያውያን ንኽልቲኡ ህዝብታተ ዓቢይ ረብሓ ኣለዎ፡ እቲ ዘይድለ ብዋጋ ሓንቲ ሃገር እታ ሓንቲ ሃገር ክትቀም ከላ ኢዩ ። ሰላም ምስዝህሉ ምሉእ ኣተኩሮኦም ድኽነት ኣብምጥፋእ ይኸውን፡ ሰላም ምስዝህሉ ኣሕዋትን ጐረቤትን ዝኾነ ክልቲኡ ኣህዛብ ብዓኒ ጽልኢ ኣይረአአን፡ ስላም ምስ ዝህሉ ኣብዶባት ዘሎ ዓድታት ብቕሳነት ንቡር ርክቡ ይቕጽል፡ ሰላም ምስዝህሉ ወደባት ኤሪትራ ን ኣገልግሎት ኢትዮጵያ ይኽፈታ ፡ ክልቲኡ ህዝቢ ከኣ ተረባሕቲ ይኾኑ። ሰላም ምስ ዝህሉ ኢትዮጵያ ንምብትታን ብህግደፍ ዝግበር ግብረሽበራ ኣይህሉን ማለት ኢዩ።

ሰላም ንኽሊቲኡ ህዝብታት እምነ፡

ዓወት ንህዝቢ ኤርትራ፡

ዘረማርያም ክፍለ

ሰሜን ኣመሪካ