እቲ ፈለማ ኣብ ዝተመስረተሉ እዋን፣ ምስ ናይ ኩባ ዩኒቨርሲቲን ናይ ኣመሪካ ጆርጅ ዋሺንግተን ዩኒቨርሲቲን ብዝፈጠሮ ሞያዊ ምትእስሳር፣ ብመንገዲ ‘ቶም ፍሉጣት ኣህጉራውያን ማእከላት ፍልጠት ብቑዕ ኣካዳምያዊ ደረጃ ተጎናጺፉ፣ ነቶም ኣብተን ብቕዓት ዘይብለን ካልኦት ኮለጃት ክምሃሩ ተገዳስነት ዘይብሎም ብዙሓት ብሉጻት ኤርትራውያን ተማሃሮ ካብቲ ዘሎ ዝሓሸ ኣማራጺ ኮይኑዎም ብህርፋን ዝጽንበሩዎ ዝነበሩ ቤትምህርቲ ሕክምና ኦሮታ፣ ብሰንኪ ብልሹው ምሕደራ ኣብ ውድቀት በጺሑ ከምዝርከብ ምንጭታት ካብ ኣስመራ ሓቢሮም።

እቶም ምንጭታት ኣብ ዝሰደዱዎ መልእኽቲ ካብ ዝዘርዘሩዎም ልዕሊ ዓሰርተ ምኽንያታት ዕንወት ቤትምህርቲ ሕክምና ኦሮታ፣ እቶም ቀንዲ፣ ምብታኽ ሞያዊ ዝምድና ምስቶም ፍሉጣት ዩኒቨርሲታት ኩባ፣ ኣመሪካን ኤውሮጳን ምስኡ ተተሓሒዙ ዝመጽአ ውድቀት ደረጃ ኣካዳምያዊ ተቐባልነቱን፣ ከምኡ ‘ውን ኣብቲ ቤትምህርቲ ተኸሲቱ ዘሎ ኣዝዩ ምልካዊ ምሕደራን ፈጢሩዎ ዘሎ ኣካዳምያዊ ናጽነት ዘየፍቅድ ኩነታትን እዮም።

ተማሃሮ፣ ብቑዕ መጻሕፍትን ካልኦት ከም ላቦራቶሪ ዝኣመሰሉ መሳለጥያታትን፣ እንተላይ ኣገልግሎት ኢንተርነት ከምዘይብሎም ‘ውን እቶም ምንጭታት የረድኡ።

ነቲ ቤትምህርቲ ኣብ ምምስራት ፍሉይ ኣስተዋጽኦ ዝገበሩ ሚኒስተር ጥዕና ነበር ኣቶ ሳልሕ መክን ኣብ ኣመሪካ ዝምቕማጡ ዶር ሃይለ መዝገበን ከምዝነበሩ ይፍለጥ። ይኹን እምበር ኣቶ ሳልሕ መኪ ቅድሚ ገለ ዓመታት ድሕሪ ምዕራፉን ዶር ሃይለ መዝገበ ተስፋ ቆሪጹ ኣበርክቶኡ ምስ ደስከለን፣ ቤትምህርቲ ሕክምና ኦሮታ ‘ውን ደድሕሪኦም ስዒቡ ኣብዚ ዕንወትን ውድቀትን ደረጃ በጺሑ ይርከብ ኣሎ።

ኣብ ዘበነ ምልካዊ ስርዓት ኢሳይያስ ብተደጋጋሚ ግዜ ብግብሪ ከምእተራእየ፣ ጽቡቕ ነገር ክዓኑ እምበር ክስስን ኣይርአን እዩ።