ስርዓት ህግደፍ ንቤተ ክርስትያን ተዋህዶ ምሉእ ብምሉእ ኣብ ትሕቲ ምቁጽጻሩ ካብ ዘእትዋ ንደሓር፥ ኣብታ ቤተ ክርስትያን ሰላም ክርከብ ኣይተኻእለን።

ብፍላይ ንፓትርያርክ ተዋህዶ ቅዱስ ኣንቶንዮስ ብሓይሊ ካብ ስልጣኖም ኣልዩ፥ ናተይ ኣገልጋሊ እዮም ዝበሎም ኣባ ድዮስቆሮስ ካብ ዝሸይም ንደሓር፥ እታ ቤተ ክርስትያንን ህዝባን ኣብ ክልተ እዩ ተመቒሉ፥ እቲ ኣብ ውሽጢ ሃገር ዘሎ፥ ኣማራጺ ስለ ዝሰኣነ ተዓሚቱ ይስዕብ። እቲ ኣብ ወጻኢ ዝነብር ክኣ፥ ኣዝዮም ውሑዳት ኣጫፈርቲ ነቲ ዝበዝሕ ሱቕታ ዝመረጸ ብምፍርራህ፥ ገዛኻ ክውረስ እዩ፥ ሞትካ ኣይትቕበርን ኢኻ፥ ወዘተ ዝብሉ መፈራራህቲ ቃላት ብምጥቃም ወይ ኣብቲ ህግደፍ ዝውንኖ ቤተ ክርስትያን ክስዕቡ፥ ወይ ድማ ኣብ ገዝኡ ኮፍ ከም ዝብል ገይሮሞ። ብቑጽሪ ኣዝዮም ብዙሓት መንእሰያት ግን ነታ ቤተ ክርስትያን ሓዲጎማ ይጠፍኡ ኣለዉ። ብዙሓት ድማ ቤተ ክርስትይንና ኣይንሓድግ፥ ኣቦና ኣይንኽሕድ ዝብል ተሪር መትከል መሪጾም፥ ኩሉ ኣደራዕን መከራን ተጻዊሮም ብትብዓት ደው ኢሎም ኣለኡ።

ገዳማት ኤርትራ ኣብ 2014 ነቶም ንዓመታት ምሉእ ነታ ቤተ ክርስትያን ረሚሶማ ዝጸንሑ፥ ዮፍታሄን ቀሺ ሃብቶምን፥ ብዘይኣፍልጦ ስርዓት ህግደፍ ብትብዓት ካብ ስልጣን ክወርዱ ምስ ወገዝዎም፥ እቲ ስርዓት ካልእ ናዕቢ ከይፍጠር ሸበድበድ ኢሉ፥ መተካእታ ይኾኑ እዮም ዝበሎም ሓሙሽተ ሃሱሳት ተኪኡ ክሰርሕ ጸኒሑ። ብፍላይ እቶም ኣብ ዝለዓለ ጽፍሒ ቤተ ክርስትያን ምሉእ ናይ ምምሕዳር ተዋህዶ ሃይማኖት ምክትል ሓላፊ ግርማይ ዘርኣይ፥ ናይ ቅዱስ ሲኖዶስ ምሉእ ስልጣን ምክትል ጸሓፊ ካሕሳይ ግርማይ ዝበሃሉ፥ ብሕቡእ ምስ ክልተ ጳጳሳት ኣባ ሉቃስን ኣባ ባስልዮስን፥ ዝበሃሉ ብምእማን ኣብታ ቤተክርስትያን ከቢድ ዕንወት ክፍጽሙ ጸኒሖም እዮም። ቤተክርስትያን ካብ ዝኸፍአ ናብ ዝኸፍአ ዕንወት ትኸይድ ምህላዋ ዝተሰምዖም  ሰለስተ ካብቶም ዝለዓለ መዓርግ ድሕሪ  ፓትርያርክ ዘለዎም ሊቃነ ጳጳሳት ብፖፕ ሽኖዳ ዝተቐብኡ፥ ክልተ ድማ ተራ ጳጳሳት ብፓትርያርክ ኣቡነ እንጦንዮስ ዝተቐብኡ፥ ነቶም ዝለዓለ ሓላፍነት ቤተክርስትያን ብሒቶም ዝጸንሑ ዕሉላት ዕስቡት ብውግዘት ካብታ ቤተክርስትያን ከም ዝርሕቁ ገይሮም። ረዚን ጽሑፍ ተበተነ። እዚ ንህግደፍ ዘርዓደ ብኽታም ሓሙሽተ ኣቡናት ናብ ምሉእ ቁምስናታት ተዋህዶን ፋሕ በለ። ብቕዳሕ ከኣ ናብ ሓላፊ ጸጥታ ህግደፍ ብርጋደር ጀነራል ኣብርሃ ካሳን ተላእከ። በዚ ዘይሓሰቦ ዝተሰናበደ ህግደፍ ንኣቡናት ህጹጽ ኣኼባ ጸውዐ። ረቡዕ 16 ታሕሳስ፣ 2015 ብርጋደር ጀነራል ኣብርሃ ካሳ፥ ንኣቡናት ኣኪቡ ፈኸራን ምጉብዕባዕን ዝተሓወሶ መደረ ኣስሚዑ። እቲ ጀነራል ኣብ መደረኡ፥ ቅድም እቶም ገዳማት ንኣምባሳደር ይፍታሕ ግዝት ደብዳቤ ክጽሕፉሉ ከለዉ ኢድኩም ነይሩ እዩ። ንሕና ዘይንፈልጦ ኣይኮነን። ሕጂ ከኣ ንሕና ዘይፈለጥናዮን ከይሓበርኩምናን ህዝቢ ንምንዓብ ዳግማይ ጽሒፍኩም በቲንኩሞ። እዚ ኩሉ ትገብርዎ ዘሎኹም ከኣ ናበይ ክትበጽሑ ከም ዘደለኹም ሓንቲ ብሓንቲ ፈሊጥናዮ ኢና።  ብዝኾነ  ሕጂ ገርክሞ ዘሎኹም ናይ መወዳእታ ኮይኑ፥ ካብ ሎሚ ንደሓር፥ ብዝኾነ ንሕና ከይፈለጥናዮ ከይወሰንናዮን ዝኾነ ጽሑፍ እንተ ጽሒፍኩም፥ ወይ ውን ካብ ክልተ ንላዕሊ ኮንኩም እንተ ተኣኪብኩም ተሓተቲ ኢኹም። ብተለፎን ይኹን ብካልእ እትገብርዎ ርክባት’ውን ኣብ ትሕቲ ቁጽጽርና ምዃኑ ፍለጡ። ካብዛ ሎሚ ጀሚርኩም ነናብ ቁምስናኩም ትኸዱ። ቅያር ናይዞም ገዚትኩም ሰጉግክሞም ዘሎኹም ቀስ ኢልና ክንሕብረኩም ኢና። ክብል ሰጎጎም

ኣብ ከምዚ ምፍጣት እንከለዉ እቶም ብሕርያ ህግደፍ መሳርሒ ክኾኑ ዝተመርጹ ናይ ስም ፓትርያርክ ኣባ ድዮስቆሮስ ድሕሪ 5 መዓልቲ ዓሪፎም ተባህለ። ጳጳሳት ካብ ዘዝተሓየሩሉ ሃገረ ስብከቶም ናብ ኣስመራ ዳግማይ ተመልሱ። ድሕሪ ቀብሪ  ቆንጮ ስርዓት ህግደፍ ፍሉይ ኣኼባ ብምግባር፥ ብዛዕባ ኣቡነ እንጦንዮስ ዝካየድ ዘሎ ሕሹኽሹኽን ውሽጣዊሽጢ ውዳበን ንፈልጦ ኣሎና። ጉዳይ ፓትርያርክ ምምራጽ ጉዳይ ሃገር ስለ ዝኾነ ንኣና ይምልከት፥ ክሳብ ልደት ባዕላትና ንጽውዓኩም፥ ብቀጥታ ነናብ ሃገረ ስብከቶም ትምለሱ፥ ክሳብ ሽዑ  ዝኾነ ናይ ተለፎን ይኹን ናይ ቃል ምርኻብ ከይትገብሩ፥ ዝኾነ ጽሑፍ ናብ ህዝቢ ከይትዝርግሑ፥ ተባሂሎም ቀጢን ትእዛዝ ተዋሂብዎም ተመሊሶም ኣለዉ።

እዞም ክልተ ብውግዘት ተባሪሮም ዘለዉ፥ ግርማይ ምክትል ኣባ ባስልዮስ፥ ካሕሳይ ምክትል ኣባ ሉቃስ ዝብል ስም ይሃልዎም እምበር፥ እዞም  ኣቡናት ንስሙ ዝተቐመጡ እዮም። ኩሉ ስራሕ ዝስራሕ በዞም ህግደፍ ዘቐመጦም ሃሱሳት እዩ ነይሩ። ስለዚ ሕጂ እዞም ሃሱሳት ተኣልዮም እንከለዉ፥ እዞም ክልተ ኣቡናት ሕጂ’ውን ገና ጅሆ ተታሒዞም እዮም ዘለዉ። ህግደፍ ንጳጳሳት ብክልተ ወገን ገይሩ የዋግኦም ኣሎ። መን ይጋገ ኣሎ ከይመዓዓዱ ድማ ኣብ ውሽጦም ሓዊ የሳውረሎም ኣሎ።

ህግደፍ ረብሕኡ ካብ ምብትታን ህዝብን ሃገርን ስለ ዝኾነ፥ ሓድነት ህዝብን ሓድነት ጳጳሳት ክፈጥር፥ ዕርቂ ከምጽእ ንቅዱስ ኣንቶንዮስ ክመልሶም ኢልካ ምሕሳብ ካብ ካብ ደርሆ ጸባ ምሕላብ እዩ። ህግደፍ ካልእ ናቱ መጋበርያ ዝበሎም ጳጳስ ምስ ዝሸይም ግን ተዋህዶ ሃይማኖት ዝኸፍአ ምምቕቓልን ሓደጋን ኣብ ቅድሜኣ ተገቲሩ ምህላዉ ክሰሓት ዘይብሉ እዩ።

ንሕና ኣብዚ ኩሉ ሽግር ኣብ ረመጽ ደው ኢልና እዚ ኩሉ ቃልሲ እናተቓለስና፥ ኣቶም ኣብ ወጻኢ ዘሎኹም፥ ዝበረቐ ጸሓይና ዝነገሰ ንጉስና ኢልኩም ዕንወት እዛ ቤተክርስትያን ዘይረኣየኩም ሰብ ግዝያዊ ረብሓን ስልጣንን ካህናትን ዲያቆናትን፥ ሕጂከ እንታይ ኢልኩም ኢኹም ነቲ ህዝቢ ከተታልልዎ? ምስቶም ደለይቲ ሓቂን ፍትሕን ኮንኩም ዓገብ እትቡሉ ግዜ ሕጂ እዩ። ዘይጋገ ዘይኮነስ ዘይምለስ እዩ ኣብዲ። ተመለሱ ምእንቲ ሓድነት ቤተክርስትያንኩምን ህዝብኹምን ተንስኡ፥ ዓገብ በሉ።

ሰላም ንህያብ ስውኣት ዝኾነት ሃገርና

ሰላም ንቤተክርስትያን ተዋህዶ።

ኦርቶዶክሳውያን ካብ ማእከል ኣስመራ።