ባይቶ ጸጥታ ውድብ ሕቡራት ሃገራት፣ እቲ ምስ ግብረሽበራዊ ጉጅለ ኣልቓዒዳ ምትእስሳር ዘለዎ ሶማላዊ ዕጡቕ ጉጅለ ኣልሸባብ ኣስጋእነቱ ገና ከምዘይተወገደ ብምጥቃስ፣ ነቲ ኣብ ልዕሊ ኤርትራን ሶማልያን ንሓያለ ዓመታት ኣጽኒዑዎ ዝጸንሐ እገዳ ኣጽዋር ከምዘናውሖ ውድብ ሕቡራት ሃገራት ኣብ ዘውጽኦ ጋዜጣዊ መግለጺ ኣገንዚቡ።

እቲ 15 ቀወምትን ግዝያውያንን ኣባላት ሃገራት ዝሓዘ ቤትምኽሪ ባይቶ ጸጥታ 10 ኣባላቱ ክናዋሕ ናይ ደገፍ ድምጺ ብምሃበን እዩ እቲ እገዳ ኣጽዋር ተናዊሑ።

ነቲ ንድፊ- ውሳኔ ዘቕረበ ኣምባሳደር ዓባይ ብሪጣንያ፣ እቲ ናይ ኣጽዋር እገዳ፣ ኣሸባብ ቀረብ ኣጽዋር ከይረክብ ዓንቂጹዎ ምህላዉ ኣውንታዊ ምዃኑ ብምጥቃስ ክቕጽል ከምዝግብኦ ቀቀድሚ ‘ቲ ናይ ድምጺ መድረኽ ከምዝገለጸ እቲ ጋዜጣዊ መግለጺ የመልክት።

ናይ ቪቶ ዲምጺ ዘለዋ ቻይና እትርከበን 5 ሃገራት ናይቲ ቤትምኽሪ ድምጺ ካብ ምሃብ ከምዝተቖጠባ ተፈሊጡ።

ምልካዊ ስርዓት ኢሳይያስ እቲ እገዳ ኣጽዋር ክእለየሉ ብዙሕ ፈተነታት ኳ እንተካየደ ኣይተዓወተን።

እቲ ነዚ ጉዳይ ‘ዚ ብዝምልከት ኣቐዲሙ ጸብጻቡ ዘቕረበ ብባይቶ ጸጥታ ውድብ ሕቡራት ሃገራት ዝተመዘዘ ተኸታታሊ እገዳ ኣጽዋር ኤርትራን ሶማልያን ዝኾነ ጉጅለ፣ ብ ሓገዝ ወጻኢ ኣብ ኤርትራ ሓድሽ ወተሃደራዊ መደበርን ወደብን ምስርሑ ይኹን፣ ህላወ  ናይ ወጻኢ ኣጽዋርን መሳለጥያታትን ኣብ ዓሰብን ከባቢኣን፣ ነቲ ብውድብ ሕቡራት ሃገራት ኣብ ልዕሊ ኤርትራ ዝተበየነ እገዳ ኣጽዋር ዝጥሕስ ምዃኑ ኣቐዲም ኣብ ዝዘርግሖ ጸብጻብ ኣገንዚቡ እዩ።

እተን ኣብ ልዕሊ ኤርትራን ሶማልያን ጸኒዑ ዘሎ እገዳ ኣጽዋር ክቕጽል ድምጸን ዝሃባ ዓባይ ብሪጣንያን ኣመሪካን፣ ነቲ ምስ ግጭት የመን ተኣሳሲሩ ዝፍጸም ዘሎ ጥሕሰት ዕሽሽ ብምባል ነቲ ዘሕለፋኦ ውሳኔ ምሉእ ብምሉእ ከምዝጸንዕ ዘይምግባረን ነቲ ወሲደናኦ ዘለዋ ስጉምቲ ዘፍኵስ እዩ።