በይ ኤርያ-ካሊፎርንያ፡ዕላምኡንሓገዝስድራቤትጅግናስውእወዲዓሊዝውዕል 4415.00 ሽሕዶላርተወፍዩ

ኣብ ከተማ ሳን ሆዘ በይ ኤርያ-ካሊፎርንያ ተአኪቦም ዘምሰዩ ደለይቲ ለውጢ ኤርትራውያን ትማሊ ሰንበት 19 ጥሪ 2014 ዕላምኡ ንምሕጋዝ ስድራ ቤት ጅግና ስዉእ ኮ/ል ሲዒድ ዓሊ ሕጃይ ዝውዕል ኣርባዕተ ሽሕን ኣርባዕተ ሚኢትን ዓሰርተ ሓሙሽተን ($4415.00) ዶላር ኣወፍዮም ። እቲ ኣብ ቤት መግቢ ሻጊ ሳባ ዝተኻየደ ስነ-ስርዓት ብሓደ ካብቶም ኣዳላውቲ ናይቲ ፕሮግራም ዝኾኑ ኣቶ ኢሰያስ ስዩም እዩ ተኸፊቱ። ኢሳያስ ቀደም ተኸተል መደባት ናይቲ ምሸት ንተሳተፍቲ ድሕሪ ምሕባር ፡ እቲ መደብ ብ ኣፍልጦ ናይቲ ኣብዚ ዝሓልፈ ቀረባ እዋን ዝተመስረተ ንኹሎም ኣብ በይ ኤርያ ዝርከቡ ናይ ለውጢ ሓይልታት ሓቁፉ ዝንቀሳቐስ ዘሎ ዳዕሮ በይ ኤርያ ይካየድ ከምዘሎን፡ እዚ መደብ ኣብ ከተማ ሳን ሆዘ ዝካየድሉ ዘሎ ምኽንያት ከኣ ንካልኦት ኣብ ዝተፈላለዩ ከተማታት ክፍለ ግዝኣት ኣሜሪካን ካልኦት ሃገራትን ዝርከቡ ኤርትራውያን ከምዚ ዝዓይንቱ ስጉምቲ ንኽወስዱ ንምትብባዕ፡ ብዓቢኡ ከኣ ንኩነታት ናይቶም ኣብዚ ቀረባ እዋን ናብ ኢትዮጵያ ዝሰገሩ ስድራ ቤት ስዉእ ኮ/ል ሲዒድ ዓሊ ሕጃይ ቅልጡፍ ምላሽ ንምሃብ ከምዝኾነ ድህሕሪ ምሕባር ፡ ናብቲ ቀጺሉ ተሰሪዕ ዝነበረ መድብ ኣሰጋጊርዎ።
ቀጺሉ ከኣ ናይቲ ምሽት መተባብዒ መደረ ከቕርብ ዝተዓደመ ድራስን ሓደ ካብ መስረትን ኣካየድትን መርበብ ሓበሬታ ዓዋተ ዶት ኮም ዝኾነ ኣቶ ሳልሕ ጋዲ (ጆሃር ) ንተሳተፍቲ መልእኽታዊ ሓዘል መደረ ኣቕሪቡ። ኣቶ ሳልሕ ኣብ መደርኡ ኤርትራውያን ሰብ ታሪኽን ጅግንነትን ከምዝኾናን ፡ እዚ ቅያን ጅግነንትን ከኣ ካብ ወለዶ ናብ ወለዶ እና ተሰጋገረ ዝኸይድ መለለዩና እዩ ኢሉ። እዚ ሎሚ ምሸት ኣነካይዶ ዘሎና መደብ ከኣ ንስድራቤት ስውእ ወዲ ዓሊ ጥራይ ዘይኮነስ ክኒኡ ዝኸይድ መልእክቲ ዘሎዎ እዩ ድሕሪ ምባል፡ እቶም ዘይስገር ሰጊሮም ዘይጽወር ጸዊሮም ናጽነት ዘምጺኡ ጀጋኑ ተጋደልቲ ሎሚ ውን በቲ ኣብ ኤርትራ ተኸሲቱ ዘሎ ምልካዊ ስርዓት ከም ኩሉ ኤርትራዊ ሕዙናትን ጉሁያትን ኢዮም ኢሉ። እንተኾነ ግን እቶም ብጅግንነትን ቆራጽነትን ነቲ ኣብ ኣፍሪቃ ዝልዓለ ብዝሒ ኣጽዋርን ሰራዊትን ዝውንን ዝነበረ ስርዓት ደርግ ብምስዓር ናጽነት ዘጓናጸፉና ሓርበኛታት፡ ከምቶም ቅድሚኦም ዝሓለፉ ሰማእታት መስዋእቲ ከፊሎም ንሓርነትና ዳግም እጃሞም መበርከቱ ኔሮም እንተኾነ ግን ከምኩላትና ዝመርሕዋ ሓዳርን ዝጥውርዎም ስድራቤትን ስለዘለዎም፡ ንሕና እንተ ሓለፍናስ ስድራናን ሓዳርናን መን ክናብየልና አዮ ዝብል ከቢድ ሰብኣዊ ስክፍታ ስለዝውለዎም እዮም ሎሚ ከም ቀደሞም ብትብዓት ነቲ ኣብ ዓድና ነጊሱ ዘሎ ስርዓተ ምልኪ ክብድህዎ ዘይካኣሉ ዘልዎ ኢሉ። ሎሚ ግን ደምበ ደልይቲ ፍትሒ ኤርትራ ሓደ ካብቲ ን ምዕቡል ሕበረተሰብ መለልዪኡ ዝኾነ ምንባይ ስድራቤት ስዎእ ወዲ ዓሊ የካይድ ስለዚሎ ሕጂ ውን ኣብ ኤርትራ ኣሰር ወዲ ዓሊ ዝኽተሉ ብዙሓት ክተንሲኡ እዮም። ደምበ ደልይቲ ፍትሒ ኤርትራ ከኣ ነቶም ብሕጂ ዝትንሲኢ ሓርበኝታትን ኩለንትናዊ ሓገዝ ክገብር ዓቕምን ብቕዓትን ኣለዎ፡ ልክዕ ከምቲ ህግደፍ ብ 2 ካብ ሚኢቲ ምልካዊ ስርሓቱ ዘካይድ ዘሎ ንሕናውን ከምኡ ዝኣመሰለ ቆራጽ ስጉምቲ ብምውሳድ ጀጋኑና ዳግማይ ኣለናልኩም ክንብሎም ኣሎና። ብዛይክኡ ከምዚ ዝዓይነቱ መደባት ከነተኣታቱ እንተ ጀሚርና ነቲ ንምልጋስ እዚ ስርዓት ኣብ እነካይዶ ዘሎና ቃልሲ ቀንዲ ማሕንቖ ኮይኑ ዘሎ ፋይናንሳዊ ሕጽረት ሓንሳብን ንሓዋሩን ከነውግዶ ከም እንኽእል ብምዝኻካር መደርኡ ዛዚሙ። ካብዚ ቀጺሉ ታሪኽ ሂወት ጅግና ስዉእ ኮ/ል ስዒድ ዓሊ ሕጃይ ብ ሓው ገዛኢ ዘርእሰናይ ብ ትግርኛ ከንበብ ከሎ ብ ሓው ከማል ዓሊ ድማ ብዓረብኛ ተቶርጊሙ። ቀጺሉ ከኣ ጽልዋ ስርሒት ፎርቶ ነቲ ኣብ ወጻኢ ብዝነብሩ ኤርትራውያን ዝካየድ ዘሎ ናይ ለውጢ ቃልሲ ዘንጸባርቕ ናይ ቪድዮ ምርኢት ብ ኣቶ ብጽእ ሓዲሽን ሴፎራ ኣስቲፋኖስ ቀሪቡ። ኩሉ ተሳታፋይ ናይቲ ምሸት ከኣ በቲ ዝቐረበ ፊልም ተተንኩፉን ነቢዑን። ብሕድሕሪ ‘ዚ ብሓው ቢእምነትን ቢንያምን ተመሪሑ ናይ ገንዘብ ወፈያ መስርዕ ተጀሚሩ። ተሳተፍቲ በብተርታ ስለምንታይ እቲ ዘወፍይዎ ዘልዎ ገንዘባዊ ሓገዝ የወፍዩ ከምዘለዉ እንዳ ገለጹ ኩላቶም ዝዓቅሞም ብምውጻእ ካብ ትጽቢት ኣዳለውቲ ናይቲ መድብ ዝኾነ ኣርባዕተ ሽሕን ክልተ ሚኢትን ሱሳን ሓሙሽተን ($4265.00) ዶላር ከወፍዩ ኪኢሎም።
መደብ ድሕሪ ምዝዛሙ ድማ ተወሳኪ $150.00 መጺኡ ከም ዘሎ ንሕብር። እዚ ወፈያ ቀጻሊ ምኾኑን ካልአት ከተማታውን ተመሳሳሊ ተበግሶ ክወስዳ ንምሕጸን።
ዘልኣለማዊ ዝኽርን ክብርን ንሰማእታት ኤርትራ!
ኣዳላዊት ኮሚታ ሳን ሆዘ ካሊፎርንያ 01/19/2014