በቲ ን29 ጥቅምቲ ኣብ ኒው ዮርክ ንምክያዱ ኣብ ሰሜን ኣመሪካ ብዝርከቡ ደለይቲ ፍትሒ ዓቢ ምሽብሻብ ዝግበረሉ ዘሎ፣ ብተሳተፍነቱ ዝዓበየ ሰላማዊ ስለፊ ደለይቲ ፍትሒ ክኸውን ትጽቢት ዝግበረሉ ሰፊሕ ሰላማዊ ሰልፊ ዝተሰናበደ ምልካዊ ስርዓት ኢሳይያስ ሃሱሳቱ ኣዋፊሩ ንምትዕንቓፉ ሰፊሕ ዘመተ የካይድ ከምዘሎ ካብ ዝተፈላለዩ ቦታታት ዝበጽሑና ሓበሬታት ኣረጋጊጾም።

ሓላፊ ጸጥታ ምልካዊ ስርዓት ኢሳይያስ ብሪጋደር ጀነራል ወዲ ካሳ ኣብ ጀዳ፣ ስዑዲ ዓረብ ኣብ ዘካየዶ ናይ ደገፍቲ ‘ቲ ስርዓት ኣኼባ ነዚ ጉዳይ ‘ዚ ኣመልኪቱ ኣብ ዝሃቦ መግለጺ፣ ነቲ ሰለማዊ ሰልፊ ንምፍሻል ዝከኣል ዘበለ ንምግባር እቲ ስርዓት ይሰርሕ ከምዘሎ ምግላጹ፣ ኣብ ጅዳ ዝነበሩ ምንጭታት ኣሰና ሓቢሮም።

ምስዚ ተተሓሒዙ፣ ምልካዊ ስርዓት ኢሳይያስ፣ ብፍላይ እቶም በብመዓልቱ እናፈንፈኑዎ ዝመጹ ዘለዉ ደገፍቱ ዝነበሩን መንጎመንጎ ዝኾኑን ዜጋታት ኣብቲ ናይ ደለይቲ ፈትሒ ሰላማዊ ሰልፊ ከይሳተፉ ንምፍርራሕ፣ ን25 ጥቅምቲ ማለት ራብዕቲ ቅድሚ ‘ቲ ሰላማዊ ሰልፊ ኣብ ኒውዮርክ ኣኼባ ከካይድ መዲቡ ኣሎ።

ብዘይካ ‘ዚ ኣብ ኒውዮርክ ዝርከቡ እሙናት ሃሱሳት ናይቲ ስርዓት፣ ክሰምዑና ይኽእሉ እዮም ንዝበሉዎም ሰባት ብኢመይላት በብሓደ እናለኣኹ፣ “እዚ ብወያነ ዝተወደበ ወያነ ዝሳተፉዎ ሰለማዊ ሰልፊ እዩ፣ ኣብኡ ከይትሳተፉ ተጠንቀቑ” እናበሉ ከም ኣመሎም ናይ ምፍርራሕን ምድንጋርን ጎስጓስ የካይዱ ከምዘለዉ ተፈሊጡ።

እዚ ብህዝቢ ኤርትራ ብምንጻሉን ምፍንፋኑን ሰንቢዱ ዓወንወን ዝብል ዘሎ ምልካዊ ስርዓት ዘካይዶ ዘሎ ናይ ፍርሒ ፕሮፖጋንዳ፣ ልክዕ ከምቲ ኣብ ጀኔቫ ናይ ደገፍቱ ሰላማዊ ሰልፊ ኣቐዲሙ ምውዳቡ ንብዙሓት ኣቖጢዑ መሊሱ ናብቲ ብ 26 ሰነ ዝተኻየደ ናይ ደለይቲ ፍትሒ ሰላማዊ ሰልፊ ክሳተፉ ዘሕነኖም፣ ነቲ ሃገሩ ትዓኑ ህዝቡ ይበርስ ከምዘሎ ተገንዚብ ዘሎ ህዝቢ ዝይዳ ድርኺት ክፈጥረሉ ምዃኑ ተዓዘብቲ ይገልጹ።