ጥሪ  5  2014

ቕልዕቲ ደብዳቤ

ንህዝቢ ቦስቶን

ኣቐዲምና ንኹሉ ኣብ  ቦስቶንን  ከባቢኣን ዝርከብ ኤርትራዊ  ዜጋ  ርሑስ ሓዲሽ ዓመት፡  ዓመተ ስላም ፡ ፍቕሪ ፡ ቅሳነትን ራህዋን ክኾነልና ንምነ፡፡

 

እቲ ናይ ላምፓዱሳ  ህልቂት ኤርትራውያን፡ ዕሸላት ህጻናት ከይተረፈ ዝርከብዎ፡ ሬሳታቶም ጌና ካብ ውሽጢ ባሕሪ ከይወጸ፡ ንቡር ሓመድ ኣዳም ከይለበሰ፡ ህግደፋውያን-ቦስቶን፡ ንዘካየድዎ ናይ ዳንኬንራን ሳዕሲዕትን መደብ፡ ልክዕ’ዩ ኔሩ ንዝብል፡ ዘቕረብዎ ምስምስን፡ ግርንቢጥ ስነ-መጎተን ፡ ምስ ሕሱር ጸርፍታቱን፡ ዝዘርግሕዎ ጽሑፍ  በጺሑና፡፡  እዚ ዝፈጸምዎ ሰብኣዊ ሕልና ዝጎደሎ ተግባር ጥራይ ዘይኮነስ  ነቲ ኩቡር ያታን ባህልን ህዝቢ ኤርትራ ዘናሹ ምንባሩ፡ ጌና ሕጂ’ውን ዝተሰቖሮም ኣይመስልን፡፡

ካብ “ባሃሊኣኡስ  ደጋሚኡ”  ኮይኑና፡፡

 

ንህልቂት ላምፓዱሳ ብዝምልከት፡ ህዝብን መንግስታትን ሃገራት ኤውሮጳ፡ ህዝብን መንግስታትን ሃገራት ኣፍሪቃ፡ ንህዝቢ ኤርትራ ክድብሳ ከለዋ፡ ፕረዚደንት ሃገረ ኤርትራ፡ ኣብ ውሽጢ ሃገር ናይ ሓዘን መዓልቲ ኣዊ ጁ’ዶ?  ናይ ሓዘን ቃል’ከ ኣስሚዑ’ዶ?  ንስድራቤታት መወቲ’ኸ ኣጸናኒዑ’ዶ?

 

መንግስቲ ኤርትራ፡ ንሬሳታት ላምፓዱሳ ንዓዲ ከእቱ ብቐጻሊ ጻዕሪ የካይድን፡ ቡዙሕ ላዕልን ታሕትን ይብል ከምዘሎ ጠቒሶም፡፡ እዚ ስርዓት’ዚ ነዞም ሊዕሊ 300 ሬሳታት’ስ ይትረፍ፡ ነቲ ሓደ ሬሳ ናይ ተጋዳላይ ናይዝጊ ክፍሉ ዓዲ ኣትዩ ንኽይቅበር ዝኸልከለ ኣረሜናዊ ስርዓት ምዃኑ ድሮ ዝረስዕዎ ይመስሉ፡፡

 

ኣብዚ ሕጂ እዋን፡ ንኤርትራውያን ኣጋጢሙ ዘሎ፡ ንግዲ ድቂ ሰባት (Human traffficking) ቀንዲ ኣበጋሲኡን ሃንዳሲኡን፡  እቲ ኣዕናውን በታንን ፖሊሲ ስርዓት ህግደፍ ምዃኑ ኣብ ቃልዕ ዝወጸ ሓቂ እዩ፡፡ ገለ ካብቲ መሰረታዊ ጠንቅታት፡ እቲ ገደብ ዘይብሉ “ሃገራዊ ኣገልግሎትን”  ምግሃስ ሰባኣዊ መሰላትን ምዃኑ፡ ዘማትእ ኣይኮንን፡፡  መንእሰይ ኤርትራ ካብ ዝወረዶ ኣርዑት ዘመናዊ ባርነትን ሕሰምን ንምንጋፍ፡ ነቲ ተኩስካ ቅተል (shoot to kill) ዝብል ፖሊሲ ናይቲ ስርዓት ከይዓጠጦ፡ ገለ ብሱዳን፡ ገለ ቢኢትዮጵያ፡  ገለ ብጁቡቲ፡ ነታ ዝፈትዋን ዘገልግላን ሃገሩ ራሕሪሑ፡ ኣብ ታሪኽና ተራእዩ ብዘይፈልጥ ናህሪ ናብ ኩሉ ኩርናዓት ዓለም ይስደድ ኣሎ፡፡ ኣብዚ ናይ ምስግጋር መስርሕ፡ ኢድ  ላዕለዎት ሓለፍቲ ሰራዊት ከምዘለዎ፡ ኣብቲ ናይ ምትሕልላፍ ገንዘብውን ገሊኡ ኣብ ማእከል ከተማ ኣስመራ ከምዝካየድ ይስሕትዎ ኣይንብልን፡፡ ገለ ካብ ህግደፍውያን፡ ንቤተሰቦም ከድሕኑ፡ ኣብ ማእከል ከተማ ኣስመራ ገንዘብ ዝኸፈሉ ከምዘለዉ ንፈልጥ፡፡  እዚ ግን ብኣታቶም ጥራይ ዝግበር ዘይኮነስ ብኹሉ ዘጋጠሞ ዜጋ ዝፍጸም ተግባራት እዩ፡፡  ኮይኑ ግን ነዚ መስርሕዚ ተገልቢጥካ  ብሲኣይኤ፡ ብኣሜሪካ ፡ ዝተመወለ እዩ ክበሃል ካብ ሓቂ ዝራሓቐ፡ ሕንቂል-ሕንቂሊትይ እዩ፡፡

 

እዚ ስርዓትዚ ተጻዋርነት (Tolerance) ዘይብሉ፡ ፍልልያት ናይ ሓሳባትን ርእይቶን ዘይጻወር፡ ምፍታሕ ግርጭታት ብጀካ ብሓይልን ዓመጽን ካልእ ምዕቡል ኣገባብ ዘይፈልጥ፡ ጉድለታቱን ድኻማቱን ዘይኣምን፡ ንኹሉ ድኽመታቱ ብግዳማዊ  ኩነታት ከመኽንን ክሽፍንን ዝነብርን ዘሎን ስርዓት እዩ፡፡  ትማል ትማል’ኳ እቲ የማናይ  ኢዱን፡ ኣፈኛ መንግስትን ዝነበረ ዓሊ ዓብዱ፡ ነቲ ስርዓት ራሕሪሕዎ ምስ ከደ፡ ወያኔ ‘ዩ

ሲኣይ ኤ’ዩ  ኢሎም ክደርፉ ሰሚዕና፡፡  ሕጂውን ከምፓፓጋሎ፡ በዚ ሕሱር ስያሜታት ነዞም ኣብ ካባቢ ቦስቶን ዘለው ደለይቲ ፍትሕን ለውጥን – ወያኔ ‘ባ፡ መቐለ’ባ፡ ካራቆሬ’ባ ኢሎም ክዝልፉ ይስምዑ ኣለዉ፡፡  እዚኣቶም ርእሰ -ታኣማንነት ዘጥፋኡ ሕልና ዘይብሎም “ንሕና-ንሱ” በሃልቲ ዑሱባት ኣገልገልቲ ናይቲ ውልቀ -መላኺ እምበር፡ ናይ ህዝቦም ሽግርን ጸገምን ከምዘይዓጦም፡ እዚ ትማል ትማል ኣብ ልዕሊ ሬሳ ህዝቦም ዘርኣይዎ ዳንኬራን ሳዕሲዒትን ሓደ ቡቑዕ ኣብነት እዩ፡፡

 

ድሕሪ ናጻነት፡ ስደተኛታት ኤርትራውያን፡ ኣብ ቦስቶንን ከባብን ብብዝሒ ምምጻእ ዝጀመሩ ካብ 2005 ዓ.ም እዩ ። እዞም ስደተኛናታት ቡዙሕ ሓሰረ-መከራ ዝረኣዩን ዘሕልለፉን ስለ ዝኾኑ፡ ኣበየናይ ደንበ ይጸግዑ፡ ቡዙሕ ምኽሪ ዘድልዮም ኣይምስልናን፡፡  ማሕበር ምትሕግጋዝ ኤርትራውያን -ቦስቶን ዓቕሙ ብዘፍቅደሉ መጠን ካብ 2005 ዓ.ም.  ጀሚሩ ክሳብ ሎሚ ናይ ሞራልን ካልእ ምትሕግጋዝን፡ ምትሕብባርን ብቐጻሊ ይገብረሎም እዩ፡፡  ብወገኖም ህግደፋውያን  ሽግር’ዞም ስደተኛታት  ንምቅላል፡ ሕጂ ውን ተበግሶ እንተድኣ ወሲዶም፡ ሰናይ በሃልቲ ኢና፡፡

 

እስከ ድፍረት ረኺቦም ህግደፋውያን ነዚ ዝስዕብ መልሲ ይሃቡና፡፡

ኣበየናይ ዘመነ መግዛእቲ ኤርትራ’ዩ (ቱርኪ – ጣልያን – ደርግ….ወዘተ..)?

 

• ልዕሊ 350 ሽሕ ዝቁጸር ህዝቢ ኤርትራ ኣብ ሓጺር እዋን ካብ ሃገሩ ሃጽ ኢሉ ዝተሰደ
• ኣካሉ ተጠቢሑ፡ ኩላሊቱ ንዕዳጋ ዝወረደ
• ማይ ዝስተ ሲኢኑ፡ ኣብ ጸልማት ውን ዝሓደረ
• ባኒ ከይተረፈ ብኩፖን ዝተዓደለ
• ንብጹዕ ፓትሪያክ ኣርቶዶክሲያዊት ሃይማኖት ተዋህዶ ካብ መዝነቶም ኣውሪዱ ዝቐየደ
• ወለዲ ብዘይ ፈጸምዎ ገበን ክሳብ 50 ሽሕ ናቕፋ መቕጻዕቲ ክኸፍሉ፡ እንተዘይ ከፈሉ ክእሰሩ ዝበየነ
• ኣባላት ቤተሰቦም ብዝወሰድዎ ስጉምቲ፡ ትሕቲ ዕድመ ከይተረፉ ምስ ኣሮግቶት ኣቦሓጎታቶም ከም ትሕጃ ኣብ ማሕዩር ዘእተዉ
• እጽናሓለይ ተባሂሉ ብዘይ ፍርዲ ኣብ ትሕቲ መሬት ዝመቁሐ
• ኣብ ሓደ ረፍዲ ሊዕሊ 350 ሂወት ዘዓረበ

 

ኣብየናይ ዘመነ መንግስቲ’ዩ?

 

ኣብ መወዳእታ፡ ከነተንብሆ እንደሊ ሓቂ ኣሎ፡፡  ነባሪ ህዝብን ሃገርን እምበር ነባሪ ስርዓትን መንግስትን ከምዘየሎ፡፡  ሰብኣዊ መሰላቱ ዝተሓረመ፡ ብሓይልን ዓመጽን ዝተዓፈነ ህዝቢ፡ ዊዒሉ ሓዲሩ ዓርሞሸሻዊ ህዝባዊ ምልዓል ፈጢሩ ከም ዝዕወት ታሪኽ ዘረጋገጾ ጉዳይ እዩ፡፡  እዚ ኣብ ካልእ ታሪኽ ከይሰገርና ካብ ታሪኽ ቃልሲ ህዝቢ ኤርትራ ዝተማሃርናዮ ሓቂ እዩ፡፡  ይንዋሕ ይሕጸር እዚ ታሪኽ ‘ዚ ክድገም’ዩ፡፡  ኣብ ሓሙኽሽቲ ናይ’ዚ ምልካዊ ስርዓት’ዚ ከኣ፡ ህዝባውን ቅዋማውን ስርዓት ዝተኸለት፡ ብስርዓተ-ሕጊ እትማሓደር፡  ዲሞክራስያዊት ሃገረ ኤርትራ ከም እትምስረት ጥርጥር የብልናን፡፡

 

 

ዓወት ንዲሞክራሲያዊ ቃልሲ ህዝቢ ኤርትራ!

ዝኽርን ክብርን ንጀጋኑ ሰማእታትና!

 

ኣወሃሃዲት ሽማግለ-ሰላማዊ ሰልፊ ላምፓዱሳ- ቦስቶን