ንሕና ኣብ ዓባይ ብርጣንያ ከተማ ሎንዶን እንርከብ: ንምዕዋት ሃገራዊ ጉባኤ ንደሞክራሲያዊ ለውጢ ከይተሓለልና ክንጽዕት ዝጸናሕናን ዘለናን ኣባላት ናይ ዝተፈላለያ ተቓወምቲ  ውድባትን ሲቪካውያን ማሕበራትን ውልቀ ተቓወምቲ ዜጋታትን ምዃና ኣቐዲምና ክንሕብር ንፈትው።

ኣብዚ ቅሉዕ ደብዳቤ ከነልዕሎ ዝደለናዮ ጉዳይ እዚ ዝስዕብ ኢዩ።

ኩልና ከም እንፈልጦ ዓሚ ከምዚ እዋን ብዘይሕለል ጻዕሪ ተቓለስቲ ዕዉት ሃገራዊ ዋዕላ ንደሞክራሲያዊ ለውጢ ድሕሪ ምስልሳልና፣ ካብ መንጉኡ ኣብ ውሽጢ ሓደ ዓመት ናብ ሃገራዊ ጉባኤ ንደሞክራሲያዊ ለውጢ እተብጽሓና ሃገራዊ ኮሚሽን ከም ዝመዘዝና ዝዝከር’ዩ። ንሱ ጥራሕ ዘይኮነ’ውን ኣብ ኩሉ ዞባታት ንሃገራዊ ኮሚሽን ዝተሓባበራ ጨናፍራት ብምቛም ብመንገዳ ዝተላእኹ ሰነዳት ንህዝቢ ኣብ ምክታዕን ምብርባርን ዘይንዓቕ ኣስተዋጽኦ ክፍጸማ ጸኒሐን ኢየን። ስለዚ ንሕና’ውን እንተኾነ ኣብ ዓዲ እንግሊዝ እንርከብ ሃገራውያን ከም ኩሉ ዜጋ ንሃገራዊ ጉባኤ ንደሞክራሲያዊ ለውጢ ንምዕዋቱ ካብ ዘለና ጽኑዕ እምነት ተበጊስና ተሓባባሪት ኮሚቴ ንኮሚሽን ብምቛም ኩሉ ዝተዋሃበና ዕማማት ክንፍጽም እኳ እንተጸናሕና ኣብዚ መወዳእታ እዋን ግን ኣብ ጉዳይ መረጻ ናብ ጉባኤ ብዝምልከት ሓደ ዓቢ ብድሆ ገጢሙና ጸኒሑ’ሎ፣ ንሱ ክኣ ገለ ሸነኻት ነቲ ኩሉ በብዓቕሙ ክዋሳእ ዝጸንሐ ግዱስ ሃገራዊ በዚ መጸ ዘይብሃል ኮሚሽን ዘይፈልጦ ልዕሊ ዓቕሙ ዝኾነ ስልዒት ገንዘብ ሰሊዖም እዚ እንተዘይ ከፈልካ ኣይትመርጽ ኣይትምረጽ ብዝብል ቅድመ ኩነት ነዚ ናይ መረጻ መስርሕ ኣብ ሓደጋ ከውድቕዎ ተራእዮም። እዚ ጉዳይ ቅኑዕ ከምዘይኮነን፣ ኣብ ከባቢና ዘለዋ ሃገራት ዝጥቀማሉ ፍትሓዊ ዝኾነ ኣከፋፍላ ጌርና ካብ ዉሑዳት ሰብ ገንዘብ ጥራሕ ዝሳተፉ፣ መሰል ብዙሓት ዝረጋገጸሉ ሱታፌ ንድለ ብምባል፣ ካብታ 7 ፈጸምቲ ኣካላት ዘለናያ 18 ዝዓቕሚ ሰባ ተሓባባሪት ኮሚሽን 9 ካብኣ 4 ፈጸምቲ ኣካላት ምክትል ኣቦ-መምበርን ሰክረርታሪያ ዘለናያ  ዓገብ እንተበልና ሰማዒ እዝኒ ስኢንና። ብድሕሪ’ዚ ነቲ ዝወከለና ህዝቢ ሓቢርና ካብቲ 118 ዝተመዝገበ ህዝቢ ናይ 74 ኣባላት ስምን ክታምን ዘለዎ ናይ ጥርዓን ደብዳቤ ንኮሚሽነር ዳኣኒኤል ወልደትንሳኤ ሂብና ፈለማ ነቲ ብኢደዋኒኖም ኣብ ዕለት 09 ጥቅምቲ 2011 ዓ.ም ካብ 118 ኣባላት ብ29 ሰባት ጥራሕ ንይምሰል ክመራረጹ ድኣምበር ኣቐዲሙ ዝሰማዕናዮ ብሕርያ ዝመጹ ንኽምርቑ እናተሸባሸቡ ከለዉ፣ ኮሚሽነር ዳኒኤል <እዚ ዝካየድ ዘሎ ምርጫ ቁኑዕ ከምዘይኮነ ምኽንያቱ ናይ 74 ኣባላት ጥርዓን (ፒትሽን) እንሆ’ሞ ጠጠው ተብልዎ> እንተበሎም; ኣይዓጠጦምን። ንሱ ጥራሕ ዘይኮነ፣ ከምቲ ኣቐዲሙ ዝተጠቕሰ ናይ 118 ኣባላት ብጽሒት ሰሪቖም ምርጫና ብደሞክራስያዊ መስርሕ ኣሰላሲልና እናበሉ በቲ ምስኦም ዝወገነ ኮሚሽነር በረኸት ካሕሳይ ኣቢሎም ኣብ መርበብ ሓበሬታ ተጎርባ ዘርጊሖሞ ንዕዘብ ኣለና። ብወገና እዚ ናይ ጥርዓን ደብዳብ እንተላይ ዝርዝር ኣስማት ኣባላትን ክታሞምን ብመንገዲ ኮሚሽነር ዳኒኤል ወልደትንሳኤ ናብ ዝምልከቶ መራሕቲ ሃገራዊ ኮሚሽን ልኢኽና ዛጊት መልሲ ኣይመጻኣናን። ደጊምና’ውን ካልኣይ ምሕጽንታ ልኢኽና ሓደ ዘይርጡብ ሓጺር መልሲ ብሓደ ውልቀ ሰብ ዝተጻሕፈ መጺኡና።

መደምደታ።-
ስለዚ እምባኣር ንሕና ሕጂ’ውን እዚ ሃገራዊ ጉባኤ ክዕወት ከይሰልከና ክንሰርሕ እኳ እንተኾንና፣ ሃገራዊ ጉባኤ ክዕወት ግን ካብ መሰረቱ ካብ ታሕቲ ክቐንዕ ኢዩ ዘለዎ። ዓወት ሃገራዊ ጉባኤ ብትምኒት ጥራይ ዝመጽእ ኣይኮነን። ስለዚ መሪሕነት ሃገራዊ ኮሚሽን ዛጊት ንሕቶና ብዘይምምላስኩም ተሓተቲ ምዃንኩም ከነስምረሉ ንደሊ። ኪንኡ ክኣ እዞም ኣብ ሎንዶን ብደሞክራሲያዊ ኣገባብ ኢዮም ተመሪጾም ተባሂሎም ጸብጻቦም መጺእኩም ዘሎን ኣብ መርበብ ሓበሬታ ተጎርባ ብዘቑጸልጽል ቃላት ተገሊጾም ዘለዉ ብዉሑዱ ካብቶም 118 ዝተመዝገቡ ኣባላት ምክትል ኣቦ-መምበርን ሰክረተርን ዝርከብዎም 9 ተሓባባሪት ኮሚቴ ወሲኽካ ናይ 74 ኣባላት ወከልቲ ከም ዘይምኻኖም ብንጹር ክንገልጽ ንፈትዉ። ንምጥቕላል እዚ ጹሑፍ እዚ ክንዝርግሕ ዘገደደና እዞም ዝጠቐስናዮም ሸነኻት ብምትሕብባር ኮሚሽነር በረኸት ካሕሳይ ብጽሒትና ሰሪቖም ክንሶም እሞ ኽኣ ናብ ኮሚሽን ዘቕረብናዮ ጥርዓን ጉቡእ መልሲ ብዘይ ምርካብና ብግሉጽ ኩሉ ደላይ ፍትሒ ክፈልጦ’ሞ ብኡ ኣቢሉ ክኣ ጉዳዩ’ውን ስለዝኾነ ዓገብ ንኽብል ብምባል ኢና።

ዓወት ንሃገራዊ ጉባኤ!
ተሓባባሪት ኮሚቴ ንኮሚሽን ሃገራዊ ጉባኤ
ሎንዶን ዓባይ ብርጣንያ 16ጥቅምቲ 2011።