ጋዜጣ ጉጅለ ህግዲፍ(ሓዳስ ኤርትራ) ኣብ ናይ 28 መጋቢት ዜና ወጻኢ ብዛዕባ እቶም ኣብ ሲናይ ተጨውዮም ዝነበሩ ሓንቲ ኖርወጅያዊትን ሓደ እስራኤላውን ሓንጢጣ።ኣብቲ ዜና ተባሂሉ ዝሰፈረ ብስእሊ እቶም ክልተ ወጻእተኛታት ዝደመቐ ጽሑፍ እዚ ዝስዕብ ትሕዝቶ ኣለዎ።

ኣብ ምስሪ፡ምድረበዳ ሲናይ ብዕጡቓት ተጨውዮም ዝጸንሑ ሓደ እስራኤላውን ሓንቲ ኖርወጅያዊትን ተለቒቖም።እቶም እስራኤላውያን በጻሕቲ ሃገር ብኸመይ ከምእተፈትሑ ዝተፈልጠ ነገር እካ እንተዘየለ ብርክት ዝበለ ገንዘብ ከይተኸፍለሎም ክልቀቑ ከምዘይክእሉዮም ተዓዘብቲ ዝገልጹ።ኣብቲ ቦታ ካብ ቀደሙ ዝጸንሐ ዘይርጉእ ኩነታት ጸጥታ ድሕሪ ውድቀት ስርዓት ሙባረክ እናገደደ ምምጽኡ ይፍለጥ።ኣብቲ ንምስሪ ምስ እስራኤል ዘዳውባ ምድረበዳ መጭወይቲ በጻሕቲ ሃገርን መሸጣ ሰብ ንሰብን ቅትለትን ኣዝዩ ገኒኑ ምህላው ው.ሕ.ሃ. ጸብጻብ የመልክት።

ነዚ ዜና ዘንብብ ኤርትራዊ ንምትንታን ርቀት ዘድልዮ ኣይመስለንን።

1.ዝተጨውዩ ክልተ ናይ ዝተፈላለያ ሃገራት ዜጋታት ከምዝኾኑ ተጠቒሱ፡ቀጺሉ ድማ እቶም እስራኤላውያን በጻሕቲ ሃገር ተባሂሉ ንምንታይ ዕላማ?

2. ብርክት ዝበለ ገንዘብ ከይተኸፍለሎም ክልቀቑ ከምዘይክእሉዮም ተዓዘብቲ ዝገልጹ ተባሂሉ።መንዮም ተዓዘብቲ?ብርክት ዝበለ ገንዘብ ክንደይ ኢዩ?ሚሊዮን?ቢልዮን?

3.ኣብቲ ንምስሪ ምስ እስራኤል ዘዳውባ መጭወይቲ በጻሕቲ ሃገርን፡መሸጣ ሰብ ንሰብን ቅትለትን ገኒኑ ከምዘሎ ው.ሕ.ሃ. የመልክት።መንዮም ዝተጨውዩ፡ዝተሸጡ፡ዝተቐትሉ?

ኣብታ ቀዳመይቲ ነጥቢ እስራኤላውያን ምባሉ፡ዜጋታት እታ ዓባይ ሃገር ካብ መጭወይቲ ኣይድሕኑን ኢዮም ንምባል ኢዩ።

ካልኣይትን ሳልሰይቲን ነጥቢ ድማ ዝተጨውዩ ሰባት ገንዘብ ከፊሎም ኢዮም ዝልቀቑ ዝብል መልእኽቲ ንምትሕልላፍን ኤርትራውያን ገንዘብ ከፊሎም እንተወጽኡ ንቡርዩ ንምባልዩ። ድሕሪ ውድቀት ሙባረክ መጭወይቲ ከምዘገነነ ምግላጽ ድማ፡ኢሳያስ ኣፈውርቂ ኣብዚ ቀረባ ጊዜ ናብ ው.ሕ.ሃ. ብዛዕባኡ ተዛሪቡስ ተሰማዕነት ረኺቡ ንምባል ኢዩ።ሽግር ኤርትራውያን ግን ቅድሚ ምውዳቕ ሙባረክ ዝጀመረን ብዝኸፍአ ደረጃ ዝቕጽል ዘሎንዩ።

ዘይከም እተን ሎኹመኛታት ኣፍ ህግዲፍ፡ እቲ ሓቀኛ ኩነታት ናይቲ መጭወይቲ ማዕከናት ዜና ኖርወይ ሞያውን ሰብኣውን ሓላፍነት ደሪኽወን ተኸታቲለን የቕርባኦ ኔረን።

ዓርቢ 22 መጋቢት ሓንቲ 31ዓመት ዝዕድሚኣ ኖርወጅያዊት ኢንግቪልድን 34 ዝዕድሚኡ እስራኤላዊ ኣሕመድን ብታክሲ እናተጋዕዙ ኣብ ሲናይ ኣብ መንጎ ታባን ዳሃብን ዝተባህለ ቦታ ተጨውዮም።

ኣምባሳደር ኖርወይ ኣብ ምስሪ ብዛዕባቲ ኩነታት ምስ ተነግሮ ምስ መንግስቲ ምስሪ ተራኺቡ ምሉእ ለይቲ ዘትዩ።

ዮሩሳለም ፖስት ድማ ሰበስልጣን ጸጥታ እስራኤል ምስ መዘናታቶም ምስራውያን ንምፍታሕ ዝተጨውየ ዜጋኦም ርክብ ከም ዝጀመሩ ገሊጻ።

እቶም ገጾም ብማስኬራ ሸፊኖም ዝጨወዩ ሹዱሽተ በደዊን ብመንገዲ መራኸብቲ ኣቢሎም ኣብ ካይሮ ብመሸጣ ሓሽሽ ተኸሲሶም ንዝተኣስሩ ክልተ ኣሕዋቶም ክፍትሑ ጠሊቦም።

ኣሕመድ ጢቢ ዝተባህለ ኣባል ባይቶ እስራኤል(ክነሰት)፡እቲ ምይይጥ ይካየድ ከምዘሎ ንተለቪጅን ኖርወይ ሓቢሩ።

እቶም ጨወይቲ ሞባይል ተለፎን እታ ኖርወጅያዊት ተጠቒሞም ንኣምባሳደር ኖርወይ ኣብ ካይሮ ከምዝሓበሩ ገሊጾም።

ናጻ ጋዜጠኛ(ፍሪ ላንሰር)ፋድል ፋህሚን ስድራቤት እቲ እስራኤላውን እቶም ጂሆታት ጽቡቕ ተታሒዞም ከምዘለው ገሊጾም።እቲ እስራኤላዊ ንቤተሰቡ ኣብ ዘመሓላለፎ መልእኽቲ ጥዕናኡ ጽቡቕ ከምዘሎን ክቐስኑን ሓቢርዎም።

መንግስቲ እስራኤልን ኖርወይን በብወገኖም ብዝገበርዎ ጽዑቕ ምክትታል ድማ እቶም ክልተ ሰባት ድሕሪ ኣርባዕተ መዓልቲ ነናብ ሃገሮም ብሰላምን ብዓጀባን ተመሊሶም።ኖርወጅያዊት ኢንግቪልድ ሓኪም ህጻናት ኢያ።ንሳ ናጻ ምስተለቀት ኣብ ዝሃበቶ ርእይቶ፡ሓዲሽ ስረን ሳእንን ከምዝተዋህባን መግቢን መስተን እውን ብዝግባኣ ይቐርበላ ከምዝነበረ ሓቢራ።ወለዳ ድማ ኣብ መጀመርያ ተሻቒሎም ከምዝነበሩን እንተኾነ ኣብ መንግስቶም ብዘለዎም ምሉእ እምነት ጋሎም ብሰላም ከምእትመጾም ትጽቢት ከምዝነበሮም ኣብ መዓርፎ ነፈርቲ ንዝተረኽቡ ጋዜጠኛታት ገሊጾም።

ነዞም ጂሆታት ንምፍታሕ ዝተኸፍለ ገንዘብ ከምዘየልቦን እቶም ጨወይቲ ድማ ከምዘይተኣስሩን ጋዜጣታት ኖርወይ ነቲ ንህዝቢ ኣሻቒሉ ዝቐነየ ፍጻሜ መደምደምታ ገይረናሉ።

ኖርወጅያዊት ኢንግቪልድን እስራኤላዊ ኣሕመድን ክዛወሩ ኢዮም ተጨውዮም።ኤርትራውያን ግን ከም ጠለበጊዕ ተሸይጦም ከምዝመጽኡን ኣገዳሲ ክፋል ውሽጣዊ ኣካሊቶም ከም መቀያየሪ ማኪና ይጥባሕ ኣሎ።ኢንግቪልድ ነታ ኣብ ዝሓለፈ ወርሒ በደዊን መልሓሳ ኣሕሪሮም ኣማሲኖም ዝቐተልዋ ቆራጽ እግራ ሕርይቲ እንተትርእይስ እንታይ ምበለት?ኣብ ሲናይ ዕሸላት፡ጎራዙ፡መንእሰያት፡ኣረጋውያን ብኻራ ክዝልዘሉ ብዝረሰነ ሓዊ ክትኮሱ ዘይሰምዐ ኤርትራዊ የልቦን።ማዕከናት ዜና ዓለም ቢቢሲ፡ሲ.ኤን.ኤን. ፡ኣልጀዚራን ካልኦትን ሞትን ሕልፈትን ኤርትራውያን ጽሒፈናሉ።ሳላ ኤርትራውያን ማዕከናት ዜና ኣሰና፡ኢሪናን ድማ ኣውያት ግዳያት የስምዓና ኣለዋ።ኣፍ ህግዲፍ ግን ብጸበባ ኤርትራውያን ይዋራዘ ኣሎ።ስእሊ እስራኤላዊን ኖርወጅያዊትን ጸቢቑሉ ኣብ ጋዜጣኡ ጠቒዕዎ።ስእሊ ዝተባላሸወ ሬሳ ኤርትራውያን ግን ኣብ ሲ.ኤን.ኤን ሪእናዮ ። ጉጅለ ህግዲፍ ብንጹሃት ኤርትራውያን ክሳብ መዓስዩ እናሽካዕለለ ክነብር።

ደጎል ድራር