ንሕና ኣባላት “ኤ.ም.ል.ም.ግ.”  (ኤርትራዊያን፤ ንምህናጽ ልፍንቲን፤ ምፍታሕ ግርጭትን) ብዝብል ሽም እንጽዋዕ ኣቐዲምና ንመሰጋገሪት ሽማግለ ነቲ ብርቱዕ ስራሕ ብምቕባሎም ልዑል ልባዊ ምስጋናና ይብጻሓዮም ንብል። ከምኡ እውን ነዚ ወሲዶሞ ዘሎዉ ዕማም ምስላጥ ዓቢ ሓላፍነት ምዃኑ፤ ብፍላይ ድማ ኣብዚ ናይ ታሪኽና ቐጻሊ ግርጭትን ሕልኽልኽን ዝመልኦ መንገዲ ኣዝዩ ትዕግስትን ተጻዋርነትን ከም ዝሓትት ንዕዘቦ።

ኣብዘን ዝሓለፋ ኣዋርሕ ብሓፈሻ ኣብ ዓለምና ብፍላይ ድማ ኣብ ሚነሶታ ኩነታት ጸገም ኤርትራ ብዝምልከት ዓቢ ምብርባርን ምንቕስቓስን ክንዕዛብ ኪኢልና ኣሎና። ኤርትራ ንጽልትን ፍንፍንትን ሃገር ኮይና ካብ ትልለን፤ ህዝባ ድማ ኣብ ውሽጥን ኣብ ደገን ኣብ ጭካነ ዝመልኦ ዓዘቕትን ክፉእ ኣተሓሕዛን ግዳይ ኮይኑ ካብ ዝወድቕ ዓመታት ሓሊፉ ኣሎ። ሓደጋ ላምፐዱዛ መቕዘፍቲ ኣማኢት ዜጋታት ኣብ ሓንቲ መዓልቲ፤ ብተለቪዢዮን ምስ ተቓለሐ፤ ሓቀኛ ኣቓልቦ ከምጽእ ኪኢሉ ኣሎ። እዚ ፍጻመ እዚ ድማ እዩ ንዳግመ ምላድ ሓዲሽን ሓያልን ምንቕስቓስ ኤርትራውያን ንለውጢ ብሓፈሻ፤ ብፍላይ ድማ ኣብ መንእሰያት ኣገንፊሉዎ ዘሎ።

ብመሰረት ኣብትን ዝሓለፋ ክልተ ዕላውያን ኣኼባታት ብመሰጋግሪት ሽማግለ ዝተኻየደ ትዕዝብትና ከምዚ ዝስዕብ እዩ፤

ድሕሪ ዘሰምብድ ኣጋጣሚ ላምፐዱዛ ናይ ሕልና ጸሎት ብኤርትራውያን ነቲ ልሙድ ኣገባብን ብዘይ ፍቓድ ወከልትን ልኡኻትን መንግስቲ ኤርትራ ምክያዱ ዘይልሙድ ምዃኑ ጥራሕ ዘይኮነ ነዚ ኣጋጣሚ ተጠቒምካ መንቐሊ ፍታሕ ሽግር ምንዳይ ንዝተኻየደ ተበግሶታት ንብዙሓት ዘተባብዔን ተግባራዊ ስጉምቲ ክወስዱ ገይርዎም ኣሎ። ኣብ ናይዘን ክልተ ኣኼባታት ብዝምልከት ትዕዝብትና ዘተባብዕ ኩነታት ከምዝነበረ እዩ ዝሕብር፤ እዚ ድማ ሳላ እቲ ግልጹን ኣዝዩ ጽዑቅን ተኻፋልነት ዝመልኦ ብዛዕባ ሃገርናን ኸባቢናን ዝምልከት ኣርእስታት ኣልዒልና ዝተመያይጥናሉ ደራኺ መድረኽ እዩ ነይሩ። ክምኡ እውን ንመሰጋጋሪት ሽማግለ ብዘይ ምርጫ ግን ብምርድዳእ ሓላፍነት ዝተሸከመትሉ ተዓዚብና ኣሎና፤ ሓደሓደ ካብ እቶም ምሩጻትን ካብ ተኻፈልቲ ዝነበሩ ኣኼበኛታትን ድማ ነዚ ናይ ምርድዳእ መንፈስ ብምኽትታል ቀጻሊ ርኽክባት ከም ዝገበሩ ተዓዚብና ኣሎና።

ስክፍታትና፤

ንሕና ኣባላት “ኤ.ም.ል.ም.ግ.” (ኤርትራዊያን፤ ንምህናጽ ልፍንቲን፤ ምፍታሕ ግርጭትን) ነቲ ኣብዘን ክልተ ኣኼባታት ብህዝብን ብመሰጋጋሪት ሽማግለን ንዝመጸ እማመታትን ርእይቶታትን ክምኡ እውን ኣገዳሲ ነጥቢታትን ብሰፊሕ ተዛቲናን ተረዳዲእናሉን ኣሎና። ካብዚ ተበጊስና ድማ ብዝሓሸንን ብዝበለጸንን ውዳበ ንቐጻሊ ምስቲ ህሉው ኩነታትን ፍጻመታትን ንኹሉ ኩርናዓት ዝዕግብ ኣከያይዳ ዘትሕዝ መርሚርና ኣሎና። ኣብዘን ዝስዕባ ኣብ ታሕቲ ተጠቒሰን ዘሎዋ “ኣርባዕተ ነጥቢታት” ድማ ብዚያዳ ትኩረት ዝገበርናለን፤ ህዝብን መሰገጋሪት ሽማግለን ብዝለዓለ ደረጃ ኣዕሚቖም ክሓስቡለንን  ከማዓራርዩወንን፤ ምእንቲ ናብቲ ዘላቒ ኤርትራዊ ሓድነት ክረጋገጸሉን ዝኽእለሉን ባይታ ከብጸሐና ስለ ዝኾነ ንኹሉ ንላቦ።

1. ትኩረት ናይ እዚ ተጣባቒ ሲቪካዊ ምንቅስቃስ ኣብ ምምስራትን ምኽባርን ግዝኣተ ሕጊ ዝተመስረተ ኮይኑ ኣብ ከባቢናን ከምኡ እውን ኣብ ኤርትራ ዘማዕዱ ክኸውን ኣሎዎ፤ እዚ ምንቕስቓስ እዚ ማሕበረሰብ ኣይኮነን፤ምስ ኣግልግሎትን ዕማምን ማሕበረሰብ ኤርትራ አብ ሚነሶታ፡ ክደናገር እውን የብሉን፤ንማሕበረሰብ ክትክእ፤ ወይ ክቆጻጸር፤ ወይ ክዕንቅፍ፤ ወይ እውን ነቲ ነጻ መንፈስን ነጻ ኣገልግሎትን ክትንክፍ ወይ ክሕንኩል የብሉን። እዚ ምንቅስቅስ እዚ ግን ንግብኣተ ሕጊ ወኪሉ ኣብ ዝኾነ ይኹን እዋን ኣብ ከባቢና ይኹን ኣብ ኤርትራ ዓገብ ክብል ክኽእል ኣሎዎ።

2. እዚ ምንቅስቃስ ዕማማቱ ብግቡእ ንከሰላስል፤ ብመሰረት ሚነሶታ ሲቪካዊ ተጣባቒ ኣወዳድባን ቅርጽን ክልተ ኣማራጺ ይህልውዎ፤

ሀ.         ቐዳማይ ኣማራጺ (ብዘይ ኣባልነት)፤ ክፉት ንኹሉ ኤርትራዊ ግን ኣባልነት ብኣባላት ቦርድ ቁጽሮም ካብ 16 ክሳብ 20 ዝበጽሑ በብዓመታዊ ብሓፈሻዊ ባይቶ ዝምረጹ ጥራሕ ይውሰን። እዚ ኣማራጺ ውልቀሰብኣዊ ወይ ድማ ማሕበራዊ ኣባልነት ኣይህልዎን።

ለ.         ካልኣይ ኣማራጺ (ብኣባልነት)፤ ክፉት ንኹሉ ኤርትራዊ ንክምረጽን ክመርጽን ኮይኑ ግን ብውልቀሰብኣዊ ወይ ድማ ብማሕበራዊ ኣባልነት ዝቅረጽ፤ ብካብ 20 ዘይበዝሑን ካብ 16 ዘይውሕዱን ኣባላት ቦርድ ዝመሓደር ይኸውን።

ሐ.         ዝኾነ ኣባል ፖሊቲካዊ ወይ ድማ ሲቪካዊ ማሕበር፤ ኣባል ቦርድ ኮይኑ ከገልግል ወይ ድማ ክምረጽ ኣይክእልን። ኣባል ቦርድ ድርብ ማሕበራዊ ኣባልነት ክህልዎ ኣይፍቀድን።

3. ናይ ክብሪ ኣባልነት ንጥርኑፍ ኤርትራዊ ማሕበራት (ፖሊቲካዊ፤ሲቪካዊ፤ህይማኖታዊ፤ ወዘተ) ይወሃብ። እዘን ምንቅስቃሳት እዚኣተን ብቅጥታ ክሳተፋ ስለ ዘይፍቀደን ስክፍታታን፤ ጥርዓናተን፤ ርእይቶታተንን፤ ብጽሑፍ ኣብ ዝኾነ እዋን ከቅርባ ይኽእላ። ብተወሳኺ ሓንሳብ ኣብ ውሽጢ ሓደ ዓመት ንህዝብን፤ ንኣባላት ቦርድን ብኣካል መልእኽተን ከስማዓ ዕድል ይወሃበን።

4. እዚ ምንቅስቃስ ስርሑ ብዝለዓለ ደረጃ መምዘንን፤ ተሓታትነትን የሰላስል። ዝኾነ ይኹን ፋሉላዊ ወይ ድማ ካብ ፍቃድ ወጻኢ ተግባራት ምስቲ ሕጊን፤ መትከላትን፤ ኣገባባትን፤ ማሕበርን ህዝብን ወይ ድማ ኣባላት ቦርድን ዝገራጮ ክፍጽም የብሉን።

እዚ ምንቅስቃስ እዚ ክሳብ ብዲሞክራሲያዊ ስርዓትን መትከላትን ክሳብ ዝምራሕ፤ ንሕና ብዕቱብነትን ውሕስናን ናብ ዓወት ክነብጽሖ ኣበርቲዕና ከም እንሰርሕ ነረጋግጸልኩም።

ሓርነት ንህዝቢ ኤርትራ፤

ስምና፡   “ኤርትራዊያን፤ ንምህናጽ ልፍንትን፤ ምፍታሕ ግርጭትን”፡ ስለዚ  ድማ “ኤ.ም.ል.ም.ግ.”

ዕላማና፡ ነቲ ፖሊቲካውን ሲቭካውን ሽግራት ኣብ ከባቢናን ኣብ ሃገርናን ኤርትራ ዘሎ ግርጪታት ብምፍታሕን ልፍንቲታት ብምህናጽንን ነቲ ጾር ምቅላል እዩ።

ብዛዕባና፤           “ኤ.ም.ል.ም.ግ.” (ኤርትራዊያን፤ ንምህናጽ ልፍንትን፤ ምፍታሕ ግርጭትን) ሲቪካዊ ምንቅስቃስ ኣብ ሚነሶታ ኮይኑ ዓለማዊ መልእኽቲ ክሓድግ ዝህቅን እዩ። ቅዲ ኣሰራርሓና፤ ኣብ ግርጭታት ምፍታሕን፤ ልፍንቲታት ምህናጽን፤ ፍልልያት ምቅርራብን ዝተመስረተ እዩ። ነዚ ኣብ ግብሪ ንምትግባር እንስዕቦ ኣካያይዳ፤ ባይቶታት ልዝብ፤ ሰሚናራት ብምድላው፤ ካብ ዝተፈላለዩ ፖሊቲካዊን፤ሲቪካዊን፤ማሕበራት ዝውክሉ ክምኡ ድማ ናይ ትምህርቲ ሊቃውንትን፤ ናይ ሞያ ኪኢላታትን ምስቲ ጉዳይናን ዕላማናን ተመኩሮ ዘሎዎም ናብ ህዝቢ እናቅረብካ ሰፊሕን ዓሚቁን ናይ ሓሳብ ምልውዋጥን ትምህርትን ሃዋሁ ምፍጣር ይርከቦም።