ሕብረት ኤውሮጳ፣ መኣትዎ ናይቶም ብማእከላይ ባሕሪ ናብ ኤውሮጳ ዝመጽኡ ዘለዉ ዓሰርተታት ኣሽሓት ስደተኛታት ብምዃነን፣ ብጻዕቂ ስደተኛታት ተዋጥረን ዝርከባ፣ ከም ቅድመ ግንባር ናይቲ ሰብኣዊ ቅልውላው ዝጥቀሳ ከም ዓዲ ጥልያንን ግሪኽን ዝኣመሰላ ሃገራት ጽዕነተን ንምፍኳስ ኣብ ድሮ ኣብ መሬተን ንዝርክቡ 40 ሽሕ ስደተኛታት ናብ ዝተፈላለያ ሃገራት ኤውሮጳ ንምምቕርሖም ብዘውጽኦ ውጥን መሰረት ሽወደን ነቶም ብማእከላይ ባሕሪ ኣቢሎም ናብ ዓዲ ጥልያን ዝኣተዉ ኤርትራውያን ስደተኛታት ብምውሳድ ዑቕባ ክትህቦም ወሲና ከምዘላ AFP ሓቢሩ።

በዚ መሰረት ቀዳማይ እግሪ ናይቶም ኤርትራውያን ዑቕበኛታት ጽባሕ ዓርቢ 9 ጥቅምቲ ካብ ዓዲ ጥልያን ናብ ሽወደን ክኸዱ ምዃኖም፣ ቤት ጽሕፈት ዘቤታዊ ጉዳያት ሕብረት ኤውሮጳ ከምዘገንዘበ እቲ ሓበሬታ የረድእ።

ኣብ ቲቀዳማይ እግሪ ክንደይ ስደተኛታት ናብ ሽወደን ከምዝኸዱ ‘ኳ እንተዘይተፈለጠ፣ ሽወደን፣ ኣብዚ ክልተ ዓመት፣ ካብ ዓዲ ጥልያን 821 ካብ ግሪኽ ድማ 548 ስደተኛታት ክትወስድ ተሰማሚዓ ከምዘላ ተገሊጹ።

እቲ ብሕብረት ኤውሮጳ ዝቐረበ ስደተኛታት ናይ ምምቕራሕ ውጥን፣ ብፍላይ ኣብ ሃገራት ምብራቕ ኤውሮጳን ዓዲ እንግሊዝን ኣሻማዊ ኮይኑ ከምዝተረኽበ ይፍለጥ።