ሚኒስተር ምክልኻል ጀነራል ስብሓት ኤፍሬም ሎሚ ቕነ ኣብ ሽወደን ዘካየዶ ንኣባላት ሰልፍን ኣገደስቲ ዝበሎም ካብ ሽወደንን ካልኦት ሃገራት ስካንዲነቭያን ዓዲ እንግሊዝ ከይተርፈ ዝተዓደሙ ውልቀሰባትን ዝተሳተፉዎ ስቱር ኣኼባ፣ ምልካዊ ስርዓት ኢሳይያስ ዕድሚኡ ንምንዋሕ ንዝህንድሶ ዘሎ ሓዱሽ ፈተታት ባይታ ንምንጻፍ ዝዓለመ ፖለቲካዊ ውዲት ዝሓዘ ተልእኾ ምዃኑ ምንጭታት ኣሰና ሓቢሮም።

ብመሰረት እቲ ዝበጽሓና ጸብጻብ፣ ቀንዲ ኣጀንዳ ናይቲ ምስጢራዊ ኣኼባ፣ ምስ ጉዳይ ኢትዮጵያን ኣፈታትሓ ሽግር ባድመን ዝተኣሳሰረ እዩ።

ንሱ ኣብቲ ኣኼባ፣ ከም ራሻን ቻይናን ዝኣመሰሉ ዝርካቦም ደገፍትና ነዚ ብሰንኪ ባድመ ምስ ኢትዮጵያ ዘለኩም ጸገም ብዘተ ፍትሑዎ ዝብል ጸቕጢ ይገብርሉና ኣለዉ ብምባል፣ ፈቲና ዘይኮነ ከይፈተና ክንትግብሮ ንሓስበሉ ኣለና ኢሉ።

ብኣበሃህላኡ፣ እቶም ናይ ምብራቕ ሓያላን ሃገራት ነዚ ሻቕሎት ‘ዚ ኣልዒሎምሉ ዘለዉ ምኽንያት፣ ተኽእሎ ምብትታን ኢትዮጵያን ንኤርትራ ዘለዎ ኣስጋእነትን እዩ። “ኢትዮጵያ እንተፈሪሳ፣ ንዓኻትኩም ንኤርትራውያን ‘ውን ሰላም የብልኩምን፣ ስለዚ ብዘተ ምፍታሕ የርብሓኩም እዩ” ከምዝበሉዎም እዩ ኸኣ ዝጠቅስ።

ጀነራል ስብሓት ኤፍሬም፣ ምስዚ ኣተሓሒዙ፣ “እቲ ንኢትዮጵያ ዝመርሕ ዘሎ ወያነ ኣብ 2015 ከብቅዕ እዩ፣ ንሕና ኸኣ ብማዕዶ፣ ብመንገዲ ደምሓትን ግንቦት 7 ን ካልኦት ተቓወምቲ ኢትዮጵያን ኣብ ውሽጢ ኣቲና ንምብትታኑ ክንሰርሓሉ መደብ ሒዝና ኣለና” ክብል ምስቲ ከምዝተቐበሉዎ ኣመት ዝሃበሉ ሻቕሎት ራሻን ቻይናን ዝጋራጮ ነጥቢ ኣቕሪቡ።

ድሕሪ መግለጺኡ ካብ ትሳተፍቲ ንዝቐረበሉ፣ “ስለምንታይ ‘ዮም ደምሓት ኣብ ውሽጣዊ ጉዳያት ኤርትራ ዝሳተፉ ዘለዉ?” ዝብል ሕቶ ክምልስ ከሎ ድማ፣ “ ኣብ’ዚ እዋን’ዚ ንደምሓትን ሰራዊት ምክልኻል ኤርትራን ክትፈልዮ ኣይትኽእልን ኢኻ። ብቛንቍኡ፣ ታዕሊሙን ልብሱን ከይተረፈ ልክዕ ከምቲ ኣብ ሜዳ ዝሃነጽናዮ ህዝባዊ ሰራዊት እዩ። ምሉእ ዕጥቅን ኣጽዋርን ኣለዎም። ንሕና መሬትን መንቀሳቀሲ ፍቓድን ጥራይ ኢና ሂብናዮም ዘለና። ምሉእ ሓገዝ ዝገብራሎም ሃገራት ኣለዋ” ኢሉ።

እቲ 2014 እንተረጊጹ ‘ውን ከገርም ዝግብኦ፣ ንርእሱ ነቕነቕ ዝብል ዘሎ ስርዓት ኢሳይያስ፣ ኣብ 2015 ክፍጸም ኢዩ ኢሉ ብዛዕባ ዝተነበዮ ምብቃዕ ወያነ ዝተኣማመን እንተኾይኑ፣ ካብ ወጻኢ ንዝመጾ ጸቕጢ ዘተን ሰላምን ክቕበል ምግዳዱ ተጋራጫዊ ምዃኑ ብምጥቃስ ንዘልዓልናሎም ሕቶ ኣመልኪቶም እቶም ምንጭታት፣ ብመሰረቱ ብልቡ ስርዓት ወያነ ኣብዚ ዝበሎ ግዜ ክወድቀሉ ካብ ዘለዎ ተስፋ፣ ንርእሱ ብህጹጽ ከይወድቕ ዘለዎ ስግኣት ከምዝዓቢ ብምምልካት፣ ዘተን ሰላምን ክቕበል ዝግደደሉ ምኽንያት ዘቤታዊ ፖለቲካዊ ጸቕጢ ብምትህድዳእ ንግዚኡ ዕድሚኡ ንምንዋሕ፣ ብሰላምን ዘተን ተሸፊንካ ከኣ ነቲ ንቐጻሊ ውሕስነት ክኾነኒ ይኽእል’ዩ ዝብሎ ንመንግስቲ ኢትዮጵያ ብሳተላይት ክኾኑዎ ዝኽእሉ ተቓወምቲ ኢትዮጵያ ናይ ምትካእ ውዲት ምስልሳል ኣሚቶም።

እቲ ን13 ዓመት ንባድመ ብዝምልከት ምስ ኢትዮጵያ ተዛቲና ማለት ዓለም ተገልቢጣ ማለት እዩ እናበለ “ኣሻፈረኝ” ዝበለ ኢሳይያስ፣ ካብ ማንም ልኡኻቱ፣ ነዚ ዕማም ‘ዚ ጀነራል ስብሓት ኤፍሬም ክፍጽመሉ ዝሓረየሉ ምኽንያት እንታይ ምዃኑ ክገልጹ ከለዉ ኸኣ፣ ኢሳይያስ ይኹን እቶም ነዚ ዝሓለፈ 13  ዓመታት ዘዝበሎ ቓላት ዝደጋግሙ ዝነበሩ፣ ከም ብዓል የማነ ማንኪ ዝኣመሰሉ ልኡኻት፣ ነዚ ምዕጻፍ መልሓስ ኢሳይያስ ዘንጸባርቕ ኣንፈት ንደገፍቲ ‘ቲ ስርዓት ከእምኑዎም ኣይክእሉን እዮም ዝብል መረዳእታ ስለዘለዎ፣ ነቲ ኣጽቂጡ ዝጸንሐ ጀነራል ከምዝምመዘዞ ኣገንዚቦም።

ብመሰረት’ቲ ሓበሬታ፣ ጀነራል ስብሓት ኤፍሬም ነቲ ምስጢራዊ ኣኼባ፣ ኣብ ጀርመን፣ ፍራንክፈት፣ ካብ ሆላንድ፣ ዓዲ ጥልያን ስዊዘርላንድ ዝተዓደሙ ደገፍቱ ኣብ ዝተረኽቡሉ ኣጋጣሚ ብተመሳሳሊ መንገዲ ከምዘካየዶ ‘ውን ተፈሊጡ።