ስርዓት ኢሳይያስ ኩሉ ሰብ፡ እንተላይ ዳይረክተር ጀነራላትን ኮሚሽነራትን ዝርከቡዎም ላዕለዎት ሓለፍቲ ናይቲ ስርዓት፡ ብረት ክዓጥቕ ትእዛዝ ኣመሓላሊፉ ከምዘሎ ምንጭታት ካብ ኣስመራ ሓቢሮም።

ብመሰረት’ቲ ትእዛዝ፡ እንተላይ’ቶም ተጠቒሶም ዘለዉ ካብ ሚኒስተራት ሓደ ጽፍሒ ንታሕቲ ለጠቕ ኢሎም ዝርከቡ ላዕለዎት ሓለፍቲ፡ ወረቐት መንቀሳቐሲ ኪወሃቦም፡ ኪገሹ ኸለዉ ፍቓድ ክረኽቡ፡ ብክፖን ሃለኽቲ ናይ ምግዛእ ዕድሎም ክሕሎ፡ ማለት ኩሉ ኣገልግሎት ክረኽቡ እንተኾይኖም፡ ካብ ብሪገደር ጀነራል ተኽለ ማንጁስን፡ ብሪገደር ጀነራል ፍጹም ወዲ መምህርን ፍቓድ ክሓቱ ኣለዎም።

ብዛዕባ ምኽንያት ናይዚ ተመሓላሊፉ ዘሎ መምርሒ፡ ብዘይካ’ቲ ነቲ ትእዛዝ ዘመልሓላለፈ ውልቀመላኺ ኢሳይያስ፡ ዋላ እቶም ፍቓድ ናይ ምሃብ መዝነት ተዋሂቡዎም ዘሎ ተኽለ ማንጁስን ወዲ መምህርን ውን ኣይፈልጡን እዮም።

ብፍላይ ድሕሪ’ቲ ኣብ ጥሪ 21 2013 ኣብ ፎርቶ ዝተኻየደ ምንቅስቓስ ሰራዊት፡ ምትእማኑ መሊሱ ኣንቆልቍሉ፡ ብራዕዲ ተዋሒጡ ዘሎ፡ ዕድመ ስልጣኑ ናይ ምንዋሕ ሜላታት ክምህዝ ሰለም ከይበለ ዝሓድር ውልቀመላኺ ኢሳይያስ፡ ንዝኾነ ምንቅስቓስ ላዕለዎት ሓለፍቲ ብጸቢብ ንምቍጽጻር፡ ንእግረመንገዱ ኸኣ፡ ሓደ ጉዳይ ፈጢሩ ንኣእምሮ ህዝቢ ብግዝያዊ ወረ ውግእን ስግኣትን ንምጽማድ ዝወሰዶ ስጉምቲ ክኸውን ከምዝኽእል እቶም ምንጭታት ይእምቱ።

ስርዓት ህግደፍ፡ ኣብ ከተማን ገጠርን ክሳብ ደቂ ልዕሊ 70 ዓመት ዝዕድሚኦም ሽማግለታት ዝርከቡዎም፡ ሰራሕተኛታት መንግስቲ፡ ነጋዶ፡ ደረፍቲ፡ መሳሰይቲ ከይተረፈ ብምዕላም ብረት ከምዘዕጠቖም ይፍለጥ።