ስርዓት ኢሳያስ ጸላኢ ህዝቢ ኤርትራ’ዩ

ውልቀ መላኺ ኢሳያስን ኮራኩሩን፡ ወትሩ ዝምድርዎን ህዝብና ንምድንጋር ዘቅርብዎ ብመዓር ዝተለበጠ መርዝን ብዘየገድስ፡ ንሳቶም ጸላእቲ ህዝቢ ኤርትራ ምዃኖም ኣረሜናውን ኣዕናውን ተግባራቶም ብግብሪ የረጋግጾ ኣሎ፡፡

ኢሳያስን ደቂ መዛሙርትን፡ ጸላእቲ ህዝቢ ኤርትራ ምዃኖም ብዙሕ መርትዖታት ክቐርብ ዝኸእል’ዃ እንተኾነ፡ ነቶም “ኣይፋል ስርዓት ኢሳያስ ንጹህ ከም ጲላጦስ ኢዩ” ኢሎም ዝማጎቱ  ገለ ኤርትራውያን ንምብዳህን ንስርዓት ኢሳያስ ስለምንታይ ጸላኢ ህዝቢ ኤርትራ’ዩ ከምዝበልኩዎ ንምንጻርን፡ ኣብዘን ዝስዕባ ኣርባዕተ ነጥብታት ጥራይ ከተኩር።

ቀዳማይ፡ ስርዓት ኢሳያስ፡ ብሕጊ ዘይምእዘዝ፡ ገባቲ ኩሉ ስልጣንን ገባርን ሓዳግን’ዩ። ንኣብነት፥ ኣብ ኤርትራ፡ ህዝብን መንግስትን ዝምርሓሉን ዝቅየደሉን ሕገ መንግስቲ የለን። ኣብ 1997፡ ገንዘብን ጉልበትን ፈሲስዎ ዝተነድፈ ቅዋም ኤርትራ ብኢሳያስ መኺኑ። ምኽንያቱ ድማ ኢሳያስን መሰልቱን መታን ንህዝቢ ኤርትራ ከም ቃሕታኦም ክረግጽዎን ብሕጊ ከይሕተቱንን ዝመሃዝዎ ተንኮል’ዩ። ስልጣን ኢሳያስ ደረት የብሉን። ኢሳያስ ኩሉ’ዩ፥ መራሒ መንግስቲ፡ ኣዛዚ ሰራዊት፡ ኣቦ መንበር ስማውን ዘየለን ባይቶ ኤርትራ፡ ሓጋግን  ፈጻምን ኣካል፡ ኣማሓዳሪ ሃማኖታዊ ጉዳያትን መራኸቢ ብዙሓን፡ሕሉፍ ሓሊፉ  ኣብ ዓድታትን  ትካላት መንግስትን ኢዱ ጣልቃ ብምእታው ሰባት ካብ ስርሖምን መዝነቶምን ከባርርን ክኣስርን ጸገም የብሉን ።

ካልኣይ፡ ኣብ ኤርትራ መሰረታዊ ሰብኣዊ መሰልን ክብርን ዝብሃል የሎን፡፡ እቲ እንኮ ጨካን ኢሳያስ ክቆጻጸሮ ዘይከኣለን ከም መሰል ዝቁጸር እንተኾይኑን፡ ህዝቢ ኤርትራ  ብሕማም፡ ብጓሂ ብጥሜትን ክመውትን ጥራይ ኢዩ ዕድል ዘለዎ። ህዝብና፡ ሓሳቡ ብነጻ ክገልጽ፡ ወከልቱ ክመርጽ፡ ኣብ ዓበይቲ ፖለቲካዊ፡ ቁጠባዊ ይኹን ማሕበራዊ ክዋሳእ ስልጣን የብሉን። ንምሳሌ፡ ወለዲን ስድራቤታትን ናይቶም ብኣባላት ጸጥታ ስርዓት ኢሳያስ ካብ መንበሪ ኣባይቶም፡ ካብ ስርሖምን ካብ መገሽኦምን ተመንጢሎም ኣብ ኣብያተ ማእሰርቲ ዝተደርበዩን ዝተሸርቡን ደቆምን ኣሕዋቶም ድሃይ ክፈልጡን መእሰሪ ምኽንያት ክንገሮምን መሰል የብሎምን። ኣብ ርእሲኡ፡ እሱራት ጠበቃ ኣውጺኦም ቃል ክሕደት ወይ እምነት ክህቡን ብስድራቤቶም ክብጽሑን ኣይክእሉን’ዮም፡፡

ሳልሳይ፡ ህዝቢ ኤርትራ፡ ፖለቲካውን ሰብኣውን መሰላት ጥራይ ኣይኮነን ተሓሪምዎ ዘሎ።  ክእለት፡ ጉልበትን ገንዘብን ዘለዎ ዜጋ ብርሃጹ ሰርሑ  ክዕንገልን ካብ ተጸባይነት ተናጊፉ ነብሱ ክኽእል ንዝገብሮ ፋሕተርተር ብስርዓት ኢሳያስ ተኸልኪሉን መሬቱን ገንዘቡን ተመንዚዑን። ንኣብነት፡ ድሕሪ ናጽነት ኤርትራ ብዙሓት ዜጋታት ርእሰማሎምን ክእለቶምን ኣብ ሃገሮም ከዋፍሩ ጠቅሊሎም ምስኣተዉ ብሕጊ ዘይግዛእ ስርዓት ኢሳያስ ምስራሕ ስለዝኸልኦምን ብትካላት ህግደፍ ስለዝተዓብለሉን፡ መብዛሕቶኦም ብክሳራ ኢዶም ሓጺቦም  ውሑዳት ዕድል ዝገበሩ ዜጋታት ድማ፡ ገንዘቦምን ፍልጠቶም ኣብ ጎረባብቲ ሃገራት ከዋፍርዎ ተገዲዶም። ህዝቢ ኤርትራ፡ ብሰሪ ገባቲ ቁጠባዊ ሜላ ስርዓት ኢሳያስ ብጥሜት ሓለንጊ ኣብ ዝግረፈሉ ዘሎ እዋንን ስእነትን ሕጽረትን መሰረታውያን ማሕበራዊ ኣገልግሎታት ሰማይ ኣብ ዝዓረገሉን፡ ዘይሕጋዊ ንግድን ብላዕን(ጉቦ) ምስዕራሩ ድማ፡ መርኣያ ውድቀትን ብልሽውናን ስርዓት ኢሳያስ’ዩ ዘነጽር።

ራብዓይን ናይ መወዳእታን፡ ኣብዚ ዘለናዮ መዋእል፡ ምስ ጎረባብትኻን ዓለምን ብፍቅርን ስኒትን ምንባር እምበር፡ ከም ጭርናዕ እናተታኾብካን ከም ኣንጭዋ ክልተ ዓንደል እናኣናቆትካን ዕድሜኻ ከተናውሕ ምፍታንን መን ከማይ ኢልካ ኣብ ጥራይ ጎልጎል ምዕንዳርን ምስ ከውሒ ምርጻም ወይ ድማ ድንቁርና ኢዩ። ኣብ ጉዳይና ዓሎቕ ርእሰ ሓያላንን ተሻረኽተንን፡ ረብሓታተን ንምሕላው ዝፍጽምኦ ዘሕፍትሓዊ ኣሰራርሓ ክምዘሎ ፍሉጥ’ዩ። የግዳስ ንኽብርኻን ልኡላውነትካን ኣብ ዋጋ ዕዳጋ ከየእተኻ፡ ንህዝብኻን ሃገርካን ዘርብሕ ሜላታት ምኽታል፡ ዘየሰማምዓካ ብዘተ ምፍታሕን ምስ ክውንነት ምጓዓዝን ምልክት ፍቅሪ ሃገርካን ህዝብኻን’ዩ። ስርዓት ኢሳያስ ግን ብኣንጻር’ዚ ሓቅታት’ዚ፡ ብሰሪ ሕጊ በረኻ ምኽታሉ፡ በትሪ ምውጥዋጥን ንዕቅትን፡ ንህዝቢ ኤርትራ ካብ ጎረባብቱን ዓለምን ነጺሉዎ ይርከብ። እዚ ጥራይ ከይኣክል፡ ስርዓት ኢሳያስ ናይ ጸላኢአይ ጸላኢ ፈታዊየይ ፖሊሲ ብምኽታል፡ ሓንሳብ ምስ ሕጋውያን መንግስታት ካልእ እዋን ድማ ምስ ተቃወምቶም ዝገላበጥ ዘይቅዱስ  ምትዕርራኽ ምፍጣር ኣመሉ’ዩ። ገለ ካብቲ ምስ ጎረባብቲ ሃገራት ዘካይዶ ምሕዝነት ወይ ተጻብኦታት ድማ ንህዝብና  ዝሓንቕ ኣምበር ዘርሁ ኣይኮነን። ንኣብነት፡ ምስ መንግስቲ ሱዳን ዝገብሮ ዲፕሎማስያዊ ርክባት፡ ናብራ ሓሲምዎምን ሃገራዊ ኣገልግሎት ብምቅዋምን ኣብ ሱዳን ፖሎቲካዊ ዕቁባ ዝሓተቱ ኤርትራውያን  ጨዊኻ ናብ ኤርትራ ንምምላስን ኣብ ኣብያተ ማእሰርቲ ንምስቃዮምን ኢዩ።

ስለዚ እዚ ክብ ኢሉ ዝተጠቅሰ ዝባህርያቱ ስርዓት ኢሳያስ፡ ብዘየማትእ ጸላኢ እምበር ፈታዊ ህዝቢ ኤርትራ ክኸውን ኮቶ ኣይክእልን’ዩ። ኣይፋል፡ ስርዓት ኢሳያስ  ተቆርቛሪ ህዝቢ ኤርትራ ኢዩ ዝብል ሰብ እንተሎ ድማ መርሓባ እብል ምስ ርእይቶይ ክራታዕ።

ጽላል

ካብ ሕቡራት መንግስታት ኣመሪካ