ውምቀምልካዊ ስርዓት ህግደፍ፡ ሎሚ 4 መጋቢት ንደገፍቱ ዓዲሙ፡ ብመሪሕነት ኣብ ጀነቫ ዝመደበሩ ወካሊኡ ሽለሺ እድሪስ፡ ኣብ ዋና ከተማ ስዊዘርላንድ፡ በርን፡ ከካይዶ መዲቡዎ ዝነበረ ኣኼባ፡ ብመኸተ ምንቅስቓስ ኤርትራውያን መንእሰያት ንለውጢ ከይተጀመረ ፈሺሉ ከምዝተረፈ ካብቲ ቦታ ዝበጽሓና ሓበሬታ ኣረዲኡ።

ብመሰረት’ቲ ሓበሬታ፡ ነቲ እኼባ ንምቅዋም ካብ ትሽዓተ ካንቶናታት ስዊዘርላንድ እንተላይ ካብ ሉጋኖ ማዕረ 3 ሰዓታት ብማኪና ዝተጓዕዙ ሓያለ ኣባላት ምንቅስቓስ መንእሰያት ንለውጢ ኣብቲ ናይ ኣኼባ ኣዳራሽ ምስ ኣተዉ፡ ወከልቲ ህግደፍን ከውጽኡዎም ኳ እንተፈተኑ፡ እቲ ኣኼባ ንዓኣቶም ‘ውን ከምዝምልከቶም ብምግላጽ ካብቲ ኣዳራሽ ምውጻእ ኣብዮም።

ወከልቲ ህግደፍን ደገፍቶምን ፖሊስ ብምጽዋዕ ከምውጽኡዎም ዝገበሩዎ ፈተነ ‘ውን ኣይተዓወተን። እቶም ወከልቲ ህግደፍ፡ ንረዲኤት ንዝጸውዖኡዎም ፖሊስ፡ ነቶም መንእሰያት ፈልዮም ከውጽኡሎም ኳ እንተለመኑዎም፡ ፖሊስ ስዊዘርላንድ ግን፡ ባዕልኹም ዝዓድምኩሞም ሰባት ከነውጽእ ስርሕና ኣይኮነን ኢሎም ኣበዩዎም። ደጊሞም ፈቲሾም ከእትዉዎም ንዘቕረቡሎም ሕቶ ‘ውን እቶም ፖሊስ ስርሖም ከምዘይኮነ ብምግላጽ ንጠለቦም ነጺጎምም።

ወከልቲ ህግደፍ ነቶም ልዕሊ 80 መንእሰያት ነጺሎም ንምውጻእ ዝመሃዙዎ ምኽንያታት ምዃን ምስኣበዮም፡ ኣብ መወዳእታ፡ በቲ ኩነታት ዝተሻቐለት ዋና ኣዳራሽ፡ ንድሕነት ንብረታ ከምዘጽግኣ ብምጥቃስ ነቲ ክትህቦ ዝሓሰበት ኣገልግሎት ኣቋሪጻ ኣዳራሻ ከምዝዓጸወት እቶም ምንጭታት ኣረጋጊጾም።