ምልካዊ ስርዓት ህግደፍ ብምኽንያት ብዓል ልደት ንፖለቲካዊ ጎስጓስ ናብ ወጻኢ ዝለኣኾም፣ ኣሚነ ተ/ስላሰ፣ ኢሳያስ ደበሳይ፣ ፋጥማ ኢብራሂም፣ ሳሙኤል ተዓገስ፣ ሄኖክ ተኽላይ ዝተባህሉ ሓሙሽተ ደረፍቲ ንሓደ ሰሙን ኣብ ኣህጉራዊ መዓርፎ ነፈርቲ ፍራንክፈርት ተታሒዞም ከምዝቐነዩ ምንጭታት ኣሰና ሓቢሮም።

በዚ ምኽንያት፣ እቲ ኣብ ሆላንድ፣ ሮተርዳም፣ ን25 ታሕሳስ ከቕርቡዎ ሒዞሞ ዝነበሩ መደብ ፈሺሉዎም፣ ብኻልኦት ኣብ ኤውሮጳ ዝጸንሑ ደረፍቲ ከምዝተተክአ ተፈሊጡ።

ንሳቶም ብቐጥታ ናብ ጀርመን ዘእቱ ቪዛ ዘይብሎም ክንሶም ካብ መዓርፎ ነፈርቲ ፍራንክፈት ክወጹ ስለዝፈተኑ እዮም ተታሒዞም ቀንዮም። እቲ ኣብ ኤምባሲ ጥልያን ኣስመራ ዘህረሙዎ ናይ ሸንገን ቪዛ ናብ ሃገራት ኤሮጳዊ ሕብረት ዘንቀሳቕሶም ‘ኳ እንተኾነ፣ ቅድሚ ናብ ዝኾነ ሃገር ምኻዶም፣ ፈለማ ግን ናብታ ቪዛ ዘውቁዑላ ዓዲ ጥልያን ክበጽሑ ነይሩዎም።

ሓደ ካብቲ ነዞም ስነጥበባውያን ንኽንድዚ ዝኣክል እዋን ዘደናጎዮም ምኽንያት፣ ከምቲ ሰበስልጣን ህግደፍ ብልሙድ ዝገብሩዎ፣ ምእንቲ ገዲፎሞም ከይከዱ ብጉድለት ሓበሬታ ክቋጽጸሩዎም ክብሉ ምሉእ ሓበሬታ ስለዘየስንቑዎም እዩ። ካብ ኣስመራ ከም ኣቕሓ ኣፋንዮም ዝቕበሉዎም መሓዮታት ከኣ ይገብሩሎም፣ እምበር እቶም ገያሾ ተዓጻጺፎም ንዘጋጥሞም ዋላ ናእሽቱ ጸገማት ክፈትሑ ናጽነት ኣይህቡዎምን እዮም።

ኣብዚ እዋን’ዚ ካብ ሊብያ ማእከላይ ባሕሪ ቆሪጾም ናብ ዓዲ ጥልያን ዝኣተው ኤርትራውያን ብብዝሒ ናብ ጀርመን ብኡ ኣቢሎም ‘ውን ናብ ካልእ ሃገራት ይኣትዉ ስለዘለዉ፣ ፖሊስ ጀርመን ኣብ ልዕሊ ኤርትራውያንን ካልኦት ኣፍሪቃውያን ስደተኛታትን ጽዑቕ ምክትታል ይገብሩ ከምዘለዉ ‘ውን እቶም ምንጭታት ኣገንዚቦም።