ብሕግን ብሕልናን ክኹነን ዘለዎ ተግባር፥

መንግስቲ ኢትዮጵያ ብዕለት 15 መጋቢት 2012 ንሉኡላዊ መሬት ኤርትራ ጢሒሱ ወተሃደራዊ መጥቃዕቲ ከምዝፈጸመን፡ ተመሳሳሊ መጥቃዕቲ ክፍጽም ምዃኑውን ብወግዒ ገሊጹ።

ህዝቢ ኤርትራ ብሰንኪ ድሑርን ጨካንን ምሕደራ ስርዓት ህግደፍ ኣብ ኣዝዩ ዝኸፈ ደረጃ ወሪዱ፡ ብሓጺሩ ምሉእ ህዝቢ ኣብ መቑሕ ኣሎ፡ ሃገራዊ ሓይሊ ሃገረ ኤርትራውን ከም ሃገር ኣብ ታሪኻ ኣብ ዝተሓተ ሞራላዊ ውድቀት ትርከብ። እዚ ከይኣክል ግን፡ ነዚ ኩነታት ብምምዝማዝ ብወገን መንግስቲ ኢትዮጵያ ዘይምኽኑይ ስግረዶባዊ ወተሃደራዊ መጥቃዕቲ ኣብ ልዕሊ ንጹህ ኤርትራውን፡ ልኡላውነት ኤርትራን ምፍጻሙ ተወሳኺ ሓደጋዩ።

እዚ ወተሃደራዊ መጥቃዕቲ ከኣ ብውሕዱ በዘን ዝስዕባ ነጥብታት ምሉእ ብምሉእ ክኹነን ዘለዎዩ፡

ብሕጋዊ መንገዲ፡

ብሕጋዊ መንገዲ መንግስቲ ኢትዮጵያ ንመሬት ኤርትራ ጥሒሱ ወተሃደራዊ መጥቃዕቲ ከካይድ ዝኾነ ይኹን ሕጋዊ መሰረት የብሉን፡፡ ካብ ኤርትራ ንዝመጾ ተጻብኦ፡ ዶብ ሰጊሩ ንክኸይድ ዝምርኮሶ ኣህጉራዊ ሕጊ ወይ ውዕላት የለን፡፡ ብኣንጻሩ ንሕመረትን መንፈስን ቻርተር ውድብ ሕብረት ኣፍሪቃን ውድብ ሕቡራት ሃገራትን ዝጥሕስዩ። እዚ መንፈስዚ ሓይሊ እንተሎ ሕጊ ንየው በሎዩ። ሎሚ ብነኣሽቱ ወተሃደራዊ ቃፍላያት ጽባሕ ብከበድቲ ኣጽዋራትን ብነፈርቲ ውግእን ኣይፍጸምንዩ ክበሃል ኣይከኣልንዩ።

ብሰብኣውን ሞራላውን መንገዲ፡

ኣብ ልዕሊ ሐደ ልኡላዊ ህዝቢ፡ ዝኾነ ይኹን ኣበሳ ዘይብሉ ኣብ ገዛእ ቤቱን መሬቱን ኣቲኻ ወተሃደራዊ መጥቃዕቲ ከተካይድ ካብ ሓደ መንግስቲ ዘይኮነስ ተራ ሽፍታውን ዘይትጽበዮ ተግባራትዩ፡ ኢሰብኣዊ ተግባራት ብምዃኑ ድማ ብሰብኣውን ሞራላውን መንገዲ ፈጺሙ ቅቡል ኣይኮነን፡፡ነፍሲወከፍ ኤርትራዊ ነዚ ዘይተዓደመ ህውከት ድማ ኣብ ልዕሊኡ ዝፍጸም ድፍረት ምዃኑ ጥራይዩ ክድምድም ዝኽእል። ኣብ ልዕሊ ሕጋዊ ወኪል ዘየብሉ ህዝቢ ከምዚ ዓይነት ተግባራት ምፍጻም ድማ ብታሪኽ ዘውቅስ’ዩ።

ብመንጽር ቃልሲ ንደሞክራሲ፡

ህዝቢ ኤርትራ ካብ ንሕስያ ኣልቦ ምሕደራ ስርዓት ህግደፍ ሓራ ክኸዉን በብዝከኣሎ ይቃለስ ምህላዉ ብሩህ እዩ፡ ስርዓት ህግደፍዉን ካብ ዝኾነ ናይ ደገ ሓይሊ፡ ነዚ ህዝባዊ ሓይሊ ናብ ማዕበላዊ ሓይሊ ተቕይሩ ካብ ኤርትራ ሓንሳብን ንሓዋሩን ምልካዊ ስርዓት ከይእለ ኣዝዩ ከምዝፈርሖን ከይደቀሰ ዝሓድረሉን ጉዳይ እዩ፡፡ ከምዚ ናዚ ሰሙን እዚ ዝተኻየደ መጥቃዕቲ ብመንግስቲ ኢትዮጵያ ግን፡ ንመንግስቲ ኤርትራ ስልጣኑ ንምንዋሕ ካብ ሰማይ ዝወረደ ግንዖዩ። በዚ መንጽርዚውን ወተሃደራዊ መጥቃዕቲ መንግስቲ ኢትዮጵያ ዕንቅፋት ንግዕዞ ደሞክራሲያዊ ለውጢ ኣብ ኤርትራዩ። ኣብዚ ጊዜ’ዚ ስሙር ሓይሊ ህዝቢ ኤርትራ ንምእላይ ምልካዊ ስርዓት ህግደፍ ከይኸውን ካልእ ሰግለለት ሻቕሎት ክገጥሞ ኣይግባእን።

ኣብ መደምደምታ፡

ንነባሪ ሰላም ክልቲኡ ህዝብታት፡ መንግስቲ ኢትይጵያ ካብ ከምዚ ዝኣመሰለ ወተሃደራዊ ስጉምቲ ተቖጢቡ፡ካብ ደረጃ ስርዓት ህግደፍ ክብ ብምባል ንዝያዳ ሰላምን ምርግጋግእን ኣብ ቀርኒ ኣፍሪቃ ኣብ ምብርካት ብዓቕሙ ክሰርሕን፡ ንህዝቢ ኤርትራ ብመንጽር ተግባራት ስርዓት ህግደፍ ክጥምቶን ክልክዖን ኣይግባእን።

ሰመረ ከሰተ

19 መጋቢት 2012

ጨለ ዘረባ

ኣብ ቀርባ ግዜ ሓደ ብጣዕሚ ተሃዋሲ ዜና ብማዕከናት ዓለም ክፍኖ ቀንዩ። እዚ ዜና፡ “መንግስቲ ኢትዮጵያ ኣብ ውሽጢ መሬት ኤርትራ ተደጋጋሚ መጥቃዕቲ ኣካይዱ፡ ገለ ዓድታት ኢውን ኣብ ትሕቲ ምቁጽጻሩ ጌሩ” ዝብል ኢዩ። ተኣፋፍነት ናይቲ ፍጻመ ዝተገንዘባ ሃገራት፡ መንግስቲ ኤርትራ ተመሳሳሊ ስጉምቲ ከይወስድሞ አቲ ኩነታት ከምቲ ምወዳእታ ተስዓታት ናብ ህልቂት ከየምርሕ ብምስጋእ ክልቲኦም ወገናት ነቲ ነገር ካብ ምብእኣስ ከቑጠቡ ዘትሓሳስብ መገለጺ ኣውጺአን። በየናይ ኣእጋር በየን ኣሰጋጋር፡ ወዳጀ!

መንግስቲ ኢትዮጰያ ብመንገዲ ኣፈኝኡ ዕላማ ናይቲ መጥቃቲ ብምግላጽ ኤርትራ ካበቲ ተካይዶ ዘላ ናይ ህውከት ስጉምቲ ተዘይተዓቂባ ተመሳሳሊ ስጉምቲ ካብ ምውሳድ ከመዘይቁጠብ ብምግላጽ ምጉባዕብዒ ዝመስል መግለጺ ኣውጺኡ።

ነቲ ዜና ከብ ወግዓዊ መግለጺ መንግስቲ ኤርትራ ንምስማዕ ተጓይየ ንገዛ ብምኻድ ቲቪ ኤረ ከፊተ ብዓቢ ኣትኩሮ ተኸታተለኩ። ዜና ስዓት ኣኺሉ፡ ብዛዕባ እቲ ተፈጺሙ ዝተባህለ ወራር ምንም ወረ የለን። ጸኒሑ “በትሪ ኣሕድጉለይ ኢሉ ሃሪሙንሰ ቀዲሙኒ በኸዩ” ዝብል ኣርእሰቲ ሓተታ ምስ ሃበ፡ ብዛዕባ ዘሎ ህልው ኩነታት ምዃኑ ኣይስሓትኩዎን። መንበረይ ኣጠዓዒመ ድማ ክሰምዕ ጽን በልኩ። ንኩነታት ዘበርህ እንታይ ኮነ ዝእምት ምንም ፈረ ነገር ኣይሰማዕኩን። ግን ንኲናት ዝህንደድ ኲናት ዘስዕቦ ክሳራ ዘይፈልጥ ጥራይ ኢዩ ዝብል ሓረግ ድርብይ ኣቢሉ ሓታታይ ሓተትኡ ወድአ።

ዓጀብ  በልኩ ኣስደሚምኒ። ንኹሉካ መምህር ኣለዎ፡ ንኹሉካ ኣያ ኣለዎ በልኩ ንታሪኽ ተመሊሰ እናሰተንተነኩ።

ኣብ ዘይጓይልኡ ዝቑጸ፡ በዓል ቆለ፡ ካብ ምዓስ ድኣ ኲናት ክሳራ ከምዘምጽእ ተማህረ? ኤርትራውያን ናብ ሱዳን፡ ዛየርን ርዋንዳን እናሰደደ ኣብ ዘይምለከቶም ኲናት እናጠበሰ ከህልቕ ዝኸረመ ሎሚ እታ ኲናት ናብ ቤቱ ከምዝተጸግዓቶ ግዲ ኣሚኑ ኮይኑ ኲናት ክሳራ ኢዩ ክብል ሰሚዕና።

ግደፍ ዕረቂ ግበር፡ ካብቲ ብወራር ዝሓዝኩሞ መሬት ውጽኡ እሞ ጉዳይ ዶብ ብሰለማዊ መንገዲ ክፍታሕ ኣብ ዝተባህለሉ እዋን፡ “ባድመ ወጻእና ማለት ጸሓይ ብምብራቕ ዓሪባ ማለት ኢዩ።” ኢሉ የጉርር ከመዘይነበረን ናይ ኲናት ፈላሰፋ ኢዬ ፈጣሪ ኲናት ባዕለይ ኢዬ እናበለ ኣሽሓት  ዕሸላት ናብ ኲናት ጠቢሱ ከምዘየህለቐን፡ ሎሚ ናብ ኲናት ዝህንጠ ናይ ኲናት ክሳራ ዘይፈልጥ ኢዩ ክብል ብዘይካ ዓጀብ እንታይ ክብሃል ይከኣል።

ኣይኮነንዶ ሰራዊት ባዕዲ ኣብ ውሽጢ መሬት ኤርትራ ኣትዩ ስርሒት እናካየደ፡ ዶብ ሰጊሩ ኣብ ዘይምልከቶ ኲናት እናኣተወ ኣይትሓዙኒ እናበለ ዝጋላገል ዝነበረ ሎሚ እንታይ ወረዶ ህጥም ኢሉ ኣጽቂጡ። “ዝፈልጦ ቋንቋ ኢዩ። ወያነ በቲ ንመልኮ ቋንቋ ተዛሪባትና ከነርእያ ኢና ከምዘይበለ ካብ መዓስ ድኣ አቲ ዝፈልጦ ቋንቋ ረስዖ።” ሎሚ ኣብ ውሽጡ መሬቱ ወራር እናተፈጸመ ኣሰሩ ጠፊኡ ህጥም ዝበለ።

ግዲ ብልኩምን፡፤ ግርም ጌሩ ተገንዚብዎ ኣሎ። ሎሚ ኣታሊሉ ናብ ኲናት ዝጠብሶ መንእሰይ የለን። ኲናት እንተተወሊዓ ኣብ ርእሱ ከም እተኹድድን ብዓንደ ርእሱ ንዕኡ ከም እትልከምን ግርም ጌሩ ተገንዚብዋ ኣሎ። ኲናት ክገጥምስ ይተረፍ ወረ ኲናት  ውን ከባህድሎ ጀሚሩ ሰልዘሎ፡ ውግእን ወረ ውግእን ካብታ ሓንቲ መልሓሱ ቲቪ ኤረ እውን ርሒቑ ኩሉ መደባት ብሽንግርዋ ተዓብሊሉ ኣሎ። መደብ ምዝንጋዕ ሽንግርዋ፡ ዜና ሽንግርዋ፡ ቃለመጠይቕ ሽንግርዋ፡ ሓተታውን ሽንግርዋ ኮይና ክትቀርብ ተኽእሎታት ኣሎ ንግዜ ንሓድጎ። እታ ቲቪ ውን ብዘይካ ንሱን መሰልቱን ካልእ ዝርእያ ሰለዘየለ፡ እዚ ኣብ ርእሶም አንጠጥዩ ዘሎ ደበናን ኣንጸላልይዎም ዘሎ መልኣከሞትን ክርእይዎን ክሰምዕዎን ስለዘይደለዩ ሽንግርዋ ኣብ መደብ ቲቪኦም ዝልዓለ እጃም ክህልዋ ኢዩ። ሽንግርዋ ግን ተዘናግዖም ተረሳስዖም እንበር ካብ ጥፍኣቶምስ ተድሕኖም ኣየኮነትን። እንተ በቲ እንተ በቲ አታ ዕምርስ ኣኺላ ኢያ። እቲ ንነዊሕ ዝተታለለ መንእሰይ፡ እቲ ብቕንዕና ዝገበረሎም ህዝቢ ተበራቢሩ ኢዩሞ ምእንቲ ዕብዳኖም ከመውት ዘይኮነስ ባዴላን ኣፍራዛን ቀሪቡ መቓብሮም ክኹዕት ኢዩ። ስርቂ ብማዕጾ ምሂሮምና ብፍኒስትራ ቀዲምናዮም ኢዩ ነገሩ። ሓፋሽ ቀዲሙ ኣኳሊምዎም ከምዘሎ ከይተገንዘብዎ ኣይተረፉን። ከምኡ እንተዘይኮኑ በትሪ መወጣወጡ፡ ኣይትሓዙና እናበሉ ምተገላገሉ፡ ነጋሪት ኲናት ወግሐ ጸብሕ በታ ሓሳዊት ተቪኦመ ዓለም መጽመሙ። ተፋሊጥና ኣለና።

Eritrea Awakening