ምኽትል ሓላፊ ቁጠባዊ ጉዳያት ህግደፍ ዝነበረ፣ ኣቶ ነጋሽ ኣፈወርቂ፣ ኣብዚ ሰሙን’ዚ ንስርዓት ህግደፍ ብወግዒ ራሕሪሑ ኣብ ነርወይ ፖለትካዊ ዑቕባ ሓቲቱ ከምዘሎ ተረጋጊጹ።

ንልዕሊ 15 ዓመታት ኣብ ልዑል ጽፍሒ ቁጠባዊ ጉዳያት ህግደፍ ዝሰርሐ ኣቶ ነጋሽ፣ ድሕሪ ሓጎስ ክሻ ዝለዓለ ተኣማንነት ከምዝዝነበሮ ይፍለጥ።

በቲ ነጋሽ ዝወሰዶ ስጉምቲ ዝሰንበደ ሓጎስ ክሻ ብተደጋጋሚ ልኡኻት ብምስዳድ ናብ ኣስመራ ንኽምለስ ጻዕሪ ከምዝገበረ፣ ሓደ ካብቶም ልኡኻት ሓላፊ ባንክ ኣባይቲ (Housing Bank) ከምዝኾነ ‘ውን ተፈሊጡ ‘ሎ።

ኣቶ ነጋሽ ናይ Commercial School ምሩቕ ኮይኑ ኣብ ግዜ ስርዓት ኢትዮጵያ ኣብ ወደብ ዓሰብ ከም ብዓል ሞያ ሕሳብ (Accountant) መጻረዪ ነዳዲ ኮይኑ ዘገልገለ እዩ። ይኹን’ምበር ካብ ስርዓት ደርግ ኣምሊጡ ህይወቱ ብምድሓን መጀመርያ ኣብ ሊብያ፣ ቀጺሉ ኣብ ኦክላንድ፣ ካሊፎርንያ ተሰዲዱ ክነብር ድሕሪ ምጽናሕ፣ ኣብ 1992 ናይ መጀመርያ ኣማሓዳሪ ስራሕ ኤምባሲ ኤርትራ ኣብ ኣመሪካ ኮይኑ ሰሪሑ።

ክሳብ’ዛ ንምልካዊ ስርዓት ህግደፍ ዝራሕርሓላ ዕለት ከኣ ኣብ ጎኒ ሓጎስ ክሻ ብእምነትን ምስጢራውነትን ከገልግል ጸኒሑ።

እቲ ብሓጎስ ክሻ ዝምራሕ ቁጠባዊ ጉዳያት ህግደፍ፣ ሓደ ካብቶም ቀንዲ ብኣምልኾ ኢሳይያስ ዝምእዘዙ፣ ንብልሽውና ዝተቓልዑ ተሓታትነት ዘይብሎም፣ ንሃገርና ናብ ዕንወት ዘምርሑዋ ዘለዉ ትካላት ህግደፍ እዩ። ገለ ካብቶም ቁጠባዊ ጉዳያት ህግደፍ ብልሹው ኣእዳው ዘእተወሎም ናይዚ ቀረባ ዓመታት ምስጢራውያን ንጥፈታት፣ ዕደና ወርቂ ቢሻ፣ ንግዲ ዱባይን ሃገራት ኣፍሪቃን፣ ሕቡእ ናይ ቻይና ሕሳባትን ንግድ ኣጽዋርን ከም ኣብነት ክጥቀሱ ይከኣሉ።