ብቐዳምነት   ናይ ክብሪ ሰላምታይ   የመሓላልፍ ፡ ኣከታቲለ   ድማ  ነቲ  ንስኹምዉን እትፈልጥዎ  ሃዋህዉ ሃገርና  ብሓጺር ከብርህ   ሃገራዊ ግዴታይ ምዃኑ  ከዘኻኽረኩም እፈቱ ።

ግዚያዊ መንግስቲ ኤርትራ  በቲ  ዘሐብን  ናይ ህዝቡ  ድምጺ ኣብ ረፍረንዱም  ኮሪዑ  ኣብክንዲ   ፍረ-ጻማ ህዝቡ  ክፈዲ  ዝመጣጠርን  ን ሰብኣዊ    መሰላቱ   ሓልዩ   ፖለቲካዉን  ማሕበራዉን ነጻነቱ  ዘረጋግጸሉን    ህዝባዊ መንግስቲ  ክምስርት  ዘተባብዖን  ነቲ ሕሉፍ ሃገራዉነትን ቅንዕናን  ህዝቢ  መዝሚዙ  ቅድም   ቅዋም  ንመስርትሞ  ደሓር  ሃገራዊ ምርጫ  ከነካይድ  ህዝባዊ መንግስቲ ክንተክልን  እናበለ ግዜ  እናዓደገን  ንእግረ-መንገዱ  ድማ  ንንጹሃት  እናቐርደደን  ዒም ዝበለ ይተሓጎም  ዝዓይነቱ   ምልካዊ   ስርዓት ክተክል  ክኢሉን  ንዕስራን ሓሙሽተን ዓመታት   ብዘይ  ቅዋም ፣  ብዘይ ማሕበራዊ  ፍትሒ፣   ብዘይ  ናይ ምዝራብን ምጽሓፍን ነጻነት፣’    ብዘይ ማዕርነት   ሃገር ክድህካ ምስጀመረ   ቁጠባዊ  ምንቑልቛል   ኣኸቲሉ  ዓያይን መሃዝን ጉልበት  ካብ ሃገር ነፊጹ ከምዝሃድም  ምሁር ሰንቢዱን ተዳሂሉን ከምዝስደድ  ኮታ ኩሉ ፈታዉ  ስራሕን መሃዝን ኩቦ ደርብዩላ ከምዝወጽእ ጌሩን  ንብርሰታ  ተዓጢቑ   ኣሎን  ።

ነዚ ካብ ዓይንኹምን  እዝንኹምን ዘይተሰወረ  ሃዋህዉ ሃገርና  ዓገብ ናይ ምባል  ግዴታ  ናተይን  ናትኩምን ምዃኑዉን  ትስሕትዎ ኣይብልን።  ስለዝኾነ  ደቂ ሓንቲ ሃገር  ብሓባር ዝደመናን  ሂወት ዝኸፈልናን  ንኸይንሰማማዕ  ዝገብር ዘሎ ድማ እቲ   እኩይ  ዕላማ   ናይቲ  ትስዕብዎን  ትኽተልዎን   መንግስቲ  ምዃኑ  ትሰማምዑ  ይመስለኒ  ።

ስለዚ  እቲ ቅኑዕ  ጎደና   መሪጽኩም  ንኹሉቲ ግዕዘይ  ምሕደራን ፖሊሲን  ግዚያዊ መንግስቲ  ኤርትራ ኮኒንኩም  ኣብ ጎኒ  ዉጹዕ ህዝብኹም  ጠጠዉ ክትብሉ  እናተማሕጸንኩ  ዳንኬራን  ጨፈራን  ገዲፍኩም  ንፍታሕ ደኒንኩም ክትሓስቡ እጽዉዕ ።  ናይ መሬት ነጻነት ምስ ናይ ህዝቢ ሓርነት ኣጣሚርኩም ብምርኣይ   ካብዚ ኣንጸላልዩና ዘሎ ናይ ሓደጋን ብርሰትን  ሃዋህዉ   ንምድሓን    ዝሓይሽ    ንሕልናኹም  ክትምርምሩን   ነዚ  ቅዱስ   በዓለ-ነጻነት  ናብ ናይ ለዉጢ መድረኽ  ክተቕንዕዎን  ህዝብኹም ንምድሓን ክትጽዉዑን  እምሕጸን ።  ብዕምቖትን  ንጹህ ሕልናን  ርኢኹም  ኣብ ግብሪ ከተዉዕልዎ   ድማ   እትስፎ ።  ።

ሃገር  ማለት ህዝቢ ህዝቢ ማለት ሃገር ካብኮነ  ህዝባ ዝጸነተ መሬት  ንዓኻን ዓሌትካንዉን ስለዝይትጾረኩም  ንከርሳን  ንኽብረታን   ጣዕሳን ካሕሳን ምረጹ  ።

ንጥምረት ህዝቡ ዝቃለስ   ወዲ ሃገር

ኣብ ኮሉምቦስ ኦሃዮ ።