ስርዓት ህግደፍ ኣብ ዓዲ እንግሊዝ ዝመደበሩ ኣምባሳደሩ ተስፋሚካኤል ገራህቱ ብምልኣኽ፡ ኣብ ማንቸስተር (ዓባይ ብሪጣንያ) ምርጫ ማሕበረኮም ኤርትራውያን ንምክያድ ኣብ ዝግበር ዘሎ ጻዕሪ ኢድ ስለዘእተወ፡ ትማሊ ቀዳም 31 መጋቢት ኣብታ ከተማ ኣብ ዝተኻየደ ኣኼባ ኣካላዊ ምትህርራም ዝተሓወሶ ግጭት ስዓቡ እቲ ቆጸራ ንሰለስተ ሰሙን ከምዝተሰጋገረ ምንጭታት ሓቢሮም።

ኣብቲ ናይ ማሕበረኮም ኤርትራውያን ኣኼባታት፡ ነቲ ስርዓት ዘይድግፉን ተቓወምትን ኤርትራውያን ብዓብላሊ ቁጽሪ ይሳተፉ ከምዘለዉ ዝተዓዘበ ኣምባሳደር ህግደፍ፡ እቲ ማሕበረኮም ካብ ቁጽጽሩ ይመሉቕ ከምዘሎ ስለዝተገንዘበ፡ ብ24 መጋቢት፡ ሓደ ሰሙን ቅድሚ’ቲ ሓፈሻዊ ኣኼባ ማሕበረኮም ኤርትራውያን፡ ካብ ለንደን ናብ ማንቸስተር ብምጕዓዝ ምስ ደገፍቲ ናይቲ ስርዓት ዝኾኑ ኣገደስቲ ዝበሎም ውልቀሰባት ብምርካብ ነቲ መስርሕ ከተዓናቕፉዎ ከምዝደፋፍኦም ምንጭታት የረድኡ።

ብሰንኪ እዚ ምድፍፋእ’ዚ ኣብቲ ብቀዳም 31 መጋቢት ዝተኻየደ ኣኼባ ግጭት ተላዒሉ ገለ ሰባት ከምዝተሃርሙ ፖሊስ ማንቸስተር ‘ውን ናብቲ ቦታ ፍጻሜ ተጸዊዖም ነቲ ጉዳይ ይከታተሉዎ ከምዘለዉ እቶም ምንጭታት ብተወሳኺ ኣገንዚቦም።

ብመሰረት’ቲ ሓበሬታ ጠንቂ ናይቲ ናብ ግጭት ዘምርሐ እምባጋሮ ክልተ ደገፍቲ ህግደፍ እዮም።

ኣብቲ ኣኼባ ዝተሳተፉ ግዱሳት ኤርትራውያን ተቐማጦ ማንቸስተር፡ ናይ ደገፍቲ ህግደፍ ወይ ድማ ናይ ተቓወምቲ ህግደፍ ዝብሃል ማሕበረኮም ክህሉ ከምዘይብሉ፡ ማሕበረኮም ንኹሉ ኤርትራዊ ዝጥርንፍ ኮሙኒቲ ክትከል ከምዘለዎ ብምጥቃስ፡ ነዚ ክዉን ንምግባር ኣብቲ ድሕሪ ሰለስተ ሰሙን ክካየድ ተመዲቡ ዘሎ ኣኼባ ኩሎም ብዝለዓለ ተገዳስነት ክመጹ  ምዃኖም ኣረጋጊጾም።

ብሰንኪ ምትእትታውን ዕንቅፋትን ስርዓት ህግደፍ ኣብ ወጻኢ ዝርከባ ማሕበረኮማት ኤርትራውያን ኣብ ዝተሓተ ደረጃአን ከምዝርከባ፡ ኣብ ብዙሓት ሃገራት ‘ውን ክምስረታ ከምዘይከኣላ ይፍለጥ።