ምልካዊ ስርዓት ኢሳይያስ፣ ትማሊ 1 ሚያዝያ ዕጡቓት ወተሃደራት ብምውፋር ኣብ ዳዕሮ ቃውሎስ 400 ኣባይቲ ከምዘዕነወ ምንጭታት ካብ ኤርትራ ሓቢሮም።

ምልካዊ ስርዓት ኢሳይያስ ፈለማ ንህዝቢ ናይቲ ዓዲ ናብ ኣስመራ ገጹ ንኸይወጽእ፣ ካብ ኣስመራ ‘ውን ናብታ ዓዲ ንኸይኣቱ ብምዕጋት እዩ ነቲ ናይ ዕንወት ተግባር ፈጺሙዎ።

ብሰንኪ ‘ዚ ኣዕናዊ ተግባር’ዚ እቶም ኣባይቶም ዝፈረሶም ግዳያት ገለ ምስ ቤተሰብ ክጨቓጨቑ ከለዉ ሓያለ ስድራቤታት ብዘይመጽለሊ ኣብ ጎልጎል ተዛሕዚሐን ኣለዋ።

ኣብ ዝሓለፈ ሳምንታት ምልካዊ ስርዓት ኢሳይያስ ኣብታ ዓዲ ንዝርከብ ንዕንወት ዝሓረዮ ኣባይቲ ብቐይሕ ቀለም ድሕሪ ምምልካቱ ህዝቢ ዳዕሮ ቃውሎስ ታቦት ኣውጺኡ ተቓውሞ ኣርእዩ ስለዝነበረ፣ ነቲ ህዝቢ ድሂሉ ናይ ዕንወት ተግባሩ ንምቅላል ንወንንቲ ናይቲ ንዕንወት ዝሓጸዮ ኣባይቲ “200 ሽሕ ናቕፋ መቕጻዕቲ ክትከፍሉ ኢኹም” እናበለ ከፈራርሖም ከምዝወርሐ እቶም ምንጭታት ይጠቕሱ።

እቶም ህዝቢ ዳዕሮ ቃውሎስ ፈለማ ብዘርኣዮ ተቓውሞን ናይ ህዝቢ ዓዲ ቐይሕ ናዕብን ዝሰግኡ ብጀነራል ፍሊጶስ ወልደየወሃንስ ተኣዚዞም ነቲ ናይ ምፍራስ ዘመተ ዘተግበሩ ዕጡቓት ወተሃደራት ብታንክታት ተዓጂቦም ከምዝወፈሩ ‘ውን እቶም ምንጭታት ኣገዚቦም።