ምልካዊ ስርዓት ኢሳይያስ ካብ ትማሊ ሰሉስ 5 ታሕሳስ ኣትሒዙ ብዘይግሉጽ ምኽንያት ኣብ ኣስመራ ሆቴላት፡ ኣብያተ መግብን ካልኦት ወሃብቲ ኣገልግሎታትን ዝርከባአን ልዕሊ 180 ብሕታዊ ትካላት ከምዝዓጸወ ምንጭታት ካብ ኣስመራ ሓቢሮም።

ብመሰረት እቲ ክሳብ ሕጂ ዝረኸብናዮ ሓበሬታ፡ ኣብ ሕምብርቲ ከተማ ኣስመራ ዝተደኮና ከም ብዓል፡ ሳቫና ሆቴል፡ ካራቨል፡ ባር ቪቶርያ፡ ኢምፐርያል ሆቴል፡ ጉራዕ ፈርኒቸር፡ ተኽለ ግርማጽየን ፈርኒቸር፡ ባር ኢምፖሮ፡ ማስክ፡ ባር ኣልባ፡ ላዮን ሆቴል፡ ዝርከባአን ሓያለ ትካላት ተዓሺገን ኣለዋ።

እቲ ምልካዊ ስርዓት ካብ ሕጊ-ዕዳጋ ወጻኢ ብሓይሊ ንሸርፊ ባጤራ ናቕፋ ኣዝዩ ከምዝኸብር ድሕሪ ምግባሩ፡ ምንቅስቓስ ንግድ ኤርትራ ሞይቱ እዩ ጸኒሑ። እቲ ተስፋ ዘይቆርጽ ህዝቢ፡ ኣብዚ ሓድሽ ዓመት 2018 ከ ነገራት ይመሓየሽ ደኾን ይኸውን እናበለ ብተስፋ ክጽበ ኣብ ዝጸንሓሉ እዋን ከኣ፡ እቲ ድሮ ብዘይርትዓዊ መንገዲ `ርትዓዊ ድኳናት` ኢሉ ዝኸፈተን ትካላት ተጠቒሙ፡ ናይ ህንጻን ልምዓትን ትካላት ገቢቱ፡  ንብሕታዊ ጽላት ኤርትራ ብምርማስ፡ እቶም ዝርካቦም ታተ ዝብሉ ዝነበሩ ሰብ ንብረት ኤርትራ ናብ ፈቖዶ ሃገራት ኣፍሪቃ ከምዝበታተኑ ገይሩ ዝጸንሐ ስርዓት ህግደፍ፡ ሕጂ ውን ነቲ ናይ ጫካ ሕጊ ደጊሙ ትካላት ብምዕሻግ መሊሱ ቀቲሉዎ ይርከብ።

በዚ ምልካዊ ስርዓት ኢሳይያስ ኣብ ልዕሊ `ተን ንልዕሊ 60 ዓመታት ኣብ ኣገልግሎት ዝጸንሓ ትካላት ወሲዱዎ ዘሎ ዓምጣሪ ስጉምቲ፡ ኣሽሓት ሰራሕተኛታት ስራሕ ኣልቦ ኮይኖም ክጭነቑ ከለዉ፡ ተገልጋሊ ህዝቢ `ውን ካብኡ ብዘይፍለ ግዳይ ናይዚ ዘይሓላፍነታዊ ስጉምቲ ኮይኑ ከምዘሎ እቶም ምንጭታት የረድኡ።

ብመሰረት `ቲ ሓበሬታ፡ እቲ ስርዓት ነዚ ስጉምቲ `ዚ ወግዓዊ መግለጺ ከይሃበ እዩ ዝወስዶ ዘሎ። እቶም ምስዘን ትካላት እዚኣተን ናይ ቀረባ ርከብ ዘለዎም ከም ባንክን ክፍሊ ቱሪዝምን ዝኣመሰሉ ኣካላት መንግስቲ `ውን ፡ `ካብ ላዕሊ ዝመጸ ትእዛዝ እዩ` ካብ ምባል ሓሊፎም ዝህቡዎ ጭቡጥ ምኽንያት የልቦን።

ከም ሳዕቤን ናይቲ ወግዓዊ መግለጺ ዘይተዋህቦ ናይ ምዕሻግ ስጉምቲ ከኣ፡ ህዝቢ ዘስመስሎ ምኽንያታት እናሃበ ወረ ኣብ ምቅብባል ይርከብ።

ገሊኡ እቲ ሓሳድ ስርዓት ብቕንኢ ዝወሰዶ ዘሎ ስጉምቲ እዩ ኢሉ ከማርር ከሎ፡ በቲ ሓደ ወገን እቶም ጀነራላት ነቲ ኣብ ዓይኖም ዝኣተወ ትካላት ክምንዝዑዎ ስለዝደለዩ ዝወሰዱዎ ስጉምቲ እዩ ይብል። ገሊኡ እቲ ዝርካቡ መንእሰይ ናብ ስደት ክነፍጽ ስለዝደለዩዎ እዩ፡ ክብል ከሎ፡ ኣብ ውሽጢ ዘለዉ ተቓወምቲ ናይቲ ስርዓት ዝኾኑ ሰበስልጣን ህዝቢ ኣንጻር እቲ መንግስቲ ንኸለዓዕሉ ዝወሰዱዎ ስጉምቲ ክኸውን ይኽእል `ዩ ክሳብ ምባል ዝበጽሑ ምህላዎም `ውን እቶም ምንጭታት የገንዝቡ።

ኣብዚ  ምልካዊ ስርዓት ኢሳይያስ ሎሚ ቕነ ዝወስዶ ዘሎ ናይ ምዕሻግ ስጉምቲ፡ ነቲ ትእዛዝ ምኽባር ወይ ድማ ንዓመታት ምእሳር ጥራይ እዩ እቲ ምርጫ። እንታይ እዩ እቲ ምኽንያት፡ ስለምንታይ ምዕሻግ ዝብሃል ሕቶ ምቕራብ ኣይከኣልን `ዩ።  እዚ ኸኣ `ዩ፡ እቲ ብናይ ጫካ ሕጊ ዝውሰድ ዘሎ ስጉምቲ `ዩ ዘብሎ።

እቲ ቅድሚ ሓያለ ዓመታት፡ ኣብ ህንጻ ተዋፊሮም ንዝነበሩ ኢንጅነራት ብምእሳር ናብ ስደት ከምዘምርሑ ብምግባርን ንህንጻዊ ስርሓት ባዕሉ ብምግባት፡ ድኳናት ሕድሪ ዝብለን ትካላት ከፊቱ ቀረጽ ዘይክፈሎ ሃለኽቲ እናሸጠ ነቶም ናእሽቱ ትካላት ዝነበሮም ርሂጸ በላዓት ብምጥፋእ፡ ኣብ ኤርትራ ብሕታዊ ክፋል ስማዊ ህላወ ጥራይ ከምዝህልዎ ገይሩ ዝጸንሐ ምልካዊ ስርዓት ኢሳይያስ፡ ነዚ ስጉምቲ እዚ ብምውሳድ ንብሕታዊ ጽላት ኣሰር መሰረቱ ከዝጠፍእ ገይሩዎ ምህላዉ ሓልዮት ህዝብን ባህጊ ምዕባለ ሃገርን ከምዘይብሉ ዳግም ዘረጋግጽ እዩ።

Subscribe ASSENNA YouTube to get Radio Assenna shows on time: