ምልካዊ ስርዓት ኢሳይያስ ኣብዘን ዝሓለፋ ቀረባ መዓልታት ካብ ከረን ክሳብ ተሰነይ ሸሞንተ ናይ መፈተሺ ንቝጣታት (ብሎኮታት) ብምውዳድ ኣብ ዝሓዘን 90 ናይ ጽዕነት መካይን ንዝረኸቦ ብብዝሒ ስሚንቶን ነዳድን ዝርከቦ ንብረት ከምዝዘረፎ ምንጭታት ካብ ኤርትራ ሓቢሮም።

እቲ ኩሉ ዓይነት ቀረብ ሓሪሙዎ ዘሎ ህዝቢ ኤርትራ ካብ ሱዳን ብኮንትሮባንዳ ብዝኣቱ ነዳድን ሲምንቶን እዩ ክጥቀም ጸኒሑ። ድሕሪ’ዚ ኩነታት ከኣ፣ እቲ ብኮንትሮባንዳ ንሊትሮ በንዚን 60 ናቕፋ፣ ንሊትሮ ናፍታ 45 ናቕፋ፣ ንኩንታል ቸሜንቶ 1600 ናቕፋ እናገዝአ ክጥቀም ዝጸንሐ ህዝቢ ዕጽፊ ክኸፍል ተገዲዱ ኣሎ።

ንህዝቢ እኹል ሃለኽትን ኣገልግሎትን ዘቕርብ ሓደ ንቡር መንግስቲ ኮንትሮባንዳዊ ንጥፈታት ክቆጻጸር ሓላፍነቱ እዩ። እንተኾነ፣ ነቲ ስእነት ሃለኽትን ዘይሕጋዊ ንግዳዊ ንጥፈታትን ባዕሉ ዝፈጠረ ኮንትሮባንዳ ስርዓት ህግደፍ ከምዚ ዝኣመሰለ ስጉምቲ ክወስድ ከሎ ኣየምሕረሉን እዩ።

ስርዓት ህግደፍ፣ ብወደብ ባጽዕ ንዝኣተወ ንብረት ናብ ዶብ ሱዳን ወሲዱ፣ ባዕሉ ብዘዋፈሮም ኮንትሮባንዳ ትራንዚት ኣምሲሉ ናብ ኤርትራ መሊሱ ከምዝሸጦ ናይ ኣደባባይ ምስጢር እዩ።