ምልካዊ ስርዓት ኢሳይያስ፣ ነቲ ኣብ ዝተፈላለየ ኩርናዓት ሃገርና ከካይዶ ዝጸንሐ ኣባይቲ ህዝቢ ናይ ምፍራስ ተግባሩ ብምቕጻል ሎሚ ቕነ ኣብ ጎዳይፍን ሕምብርትን ዘካየዶ ወፈራ ዕንወት፣ መቐጸልታ ናይቲ ህዝባዊ ሓልዮት ዘይብሉ ኣዕናዊ ፖሊሲኡ ምዃኑ ነቲ ኩነታት ዘረጋገጹዎ ምንጭታት ሓቢሮም።

ንሳቶም፣ “ምልካዊ ስርዓት ኢሳይያስ ነዚ ናይ ዕንወት ተግባር ዝህቦ መመኽኔታ፣ ‘ብሕጋዊ ፍቓድ መንግስቲ ዘይተሰርሑ ኣባይቲ’ ዝብል ኳ እንተኾነ፣ ይኹን’ምበር እቶም ኣባይቲ ከም ቃንጥሻ ኣብ ሓደ መዓልቲ ቦቝሎም ዝሓደሩ ኣይኮኑን። እቲ ንባዕሉ ሕጋውነት ዘይብሉ ስርዓት ህዝባዊ ሓልዮት እንተዝህልዎ ነይሩ፣ ነቶም ኣብ ዝሓለፈ 20 ዓመታት ናይቲ ድኻ ህዝቢ ምልዮናት ገንዘብ ፈሲሱዎም ኣብ ቅድሚ ዓይኑ ዝተሃንጹ ኣባይቲ፣ ገና ገንዘብን ጉልበትን ከይባኸነሎም ከሎ ብኣግኡ ክቋጻጸሮም ነይሩዎ። እንተኾነ፣ እንሆ ነቲ ንኣፉ ገዲፉ ጨቖቝ ኢሉ መጽለሊ ዝሰርሐ ውጹዕ ህዝቢ ምስ ቆልዓ ሰበይቱ ብዘይ መዕቆቢ በታቲኑዎ፣ ክፉእ ንርኢ ኣለና፣” ብምባል የምርሩ።

ምልካዊ ስርዓት ኢሳይያስ ነዚ ኣዕናዊ ስጉምቱ ንምምስማስ ዝኾነ ምኽንያት እንተምጽአ ሞራላውን ሕጋውን ተቐባልነት የብሉን። ቅድሚ ኹሉ፣ እቲ ጉዳይ፣ እቲ ምልካዊ ስርዓት ብቑዕ ናይ ኣባይቲ ፖሊሲ ከማዕብል ስለዘይከኣለ ህዝቢ ኣማራጺ ስኢኑ ዝኣተዎ እዩ። ኣብ ርእሲ ‘ቲ ናይ ፖሊሲ ፍሽለት፣ ነቲ ናይ ምቍጽጻር ድኽመቱ ብሓይሊ ጠበንጃን ሽበራን ነቲ ውጹዕ ህዝቢ ከምዝስከሞ ምርኣይ ‘ውን ካብ ሓላፍነት ንምህዳም ዝገብሮ ዘሎ ድርብ ገበን እዩ። ህዝቢ ድማ ብትሪ ክቃወሞ ይግባእ፣