ምልካዊ ስርዓት ኢሳይያስ፣ ነቶም ኣምሳያ ፓትርያርክ ተዋህዶ ቤተክርስትያን ኣቦና ኣቡነ እንጠንዮስ ብውዲት ዝተክኦም ቐሺ ዲዮስቆሮስን ሰላዪኡ ይፍታሄ ዲሞጥሮስን ብምልኣኽ ብተንኮል ካብ ወርሒ ሰነ ክሳብ ሎሚ ቕነ ኣዕጽዩዋ ዝጸንሐ፣ ኣብ ጀርመን ድራይኣይሽ ኣብ እትብሃል ከተማ እትርከብ ቤተክርስትያን ቅድስተ ማርያም፣ 16 ሕዳር 2013 ዳግም ኣገልግሎታ ከምዝጀመረት ምንጭታት ኣሰና ካብ ጀርመን ሓቢሮም።

ምልካዊ ስርዓት ኢሳይያስ፣ ነዞም ኣገልገልቱ ልኢኹ፣ ደጋፊ ኣቡነ እንጠንዮስ እዮም ንዝበሎም ኣብታ ቤተክርስትያን ዝነጥፉ ቀሺ መርካጽዮን ክውግዙ ንዘቕረበሎም ትእዛዝ ኣብቲ ቤተክርስትያን ዘገልግሉ ካህን ቀሺ ኣማኑኤል ኣብ ቅድሚ ጀርመናውያን ተዓዘብቲ ብትብዓት ስለዝነጸጉዎ ክርከር ተፈጢሩ፣ እታ ቤተክርስትያን ተዓጽያ፣ እቲ መፍትሕ ከኣ ክሳብ ዝሓለፈ ሰንበት 16 ሕዳር በቶም ጀርመናውያን ኣመሓደርቲ ብምንጎኝነት ተታሒዙ ጸኒሑ። ይኹን እምበር፣ እቶም ሕጊ ጀርመን ንኣገልገልቲ ቤተክርስትያን ከምዘየውግዝ ኣብ መደምደምታ ዝበጽሑ ኣመሓደርቲ ናይቲ ቅድስተ ማርያም ኣገልግሎት እትህበሉ ቤተክርስትያን፣ ነቶም ወገዛ ስርዓት ኢሳይያስ ዝተቓወሙ ካህናት መፍትሕ ኣረኪቦሞም።

እቶም ሃይማኖታዊ ኣገልግሎቶም ክቕጽሉ ዝተፈቕደሎም ኣገልገልቲ ኦርቶዶክስ ተዋህዶ ቤተክርስትያን ቅድስተ ማርያም ብወገኖም፣ ሮማዊት ካቶሊካዊት ቤተክርስትያን ቤተክርስትያኖም ዳግም ኣብ ምኽፋት ንዝገበረትሎም ሓገዝ ኣመስጊኖም።

እቶም ምንጭታት፣ ኣቐዲሙ፣ ኣብ 2012 ቆንስል ስርዓት ኢሳይያስ ኣብ ጀርመን፣ የውሃንስ ደባስ፣ ደገፍቲ ናይቲ ስርዓት እዮም ንዝበሎም ካህናት፣ “ስለዘይትሰማምዑ ካልእ ታቦት ከነምጽኣልኩም ኣብ ክልተ ተመቐሉ” ኢሉ ፈላላዪ ሓሳብ ኣቕሪቡ ‘ኳ እንተንበረ፣ ኣብቲ ቤተክርስትያን ዝገልገላ ኣዴታት “በየን ዝመጻእካ ኢኻ ተፈላለዩ ትብለና፣ ሎሚ ኣይንፍለ ጽባሕ” ኢለን ስለዝተቓወማኦ ሓሳቡ ከምዝፈሸለ ኣዘኻኺሮም።

ብሰንኪ ፖለቲካዊ ጣልቃ ምልካዊ ስርዓት ህግደፍ፣ ኣብ ስደት ኣብ ዝተፈላለያ ሃገራት ዝርከባ ኣብያተ ክርስትያናት ኤርትራውያን ብፍልልይ ተበኪለን ኣብ ሕማቕ ኩነታት ከምዝለዋ ይፍለጥ።