ምልካዊ ስርዓት ኢሳይያስ፣ ነቲ ካብ ቅድሚ ሓያለ ኣዋርሕ ኣትሒዙ ብምስጢር ምስ ስዑዲ ዓረብ ቀጠርን ብምስምማዕ ኣቐዲሙ ኣብ ውግእ ሕድሕድ የመን ዝኣተዎ ዕንደራዊ ጣልቃ ጋዜጣዊ መግለጺ ብምውጻእ ኣግሂዱዎ።

እቲ “መግለጺ ሚኒስትሪ ጉዳያት ወጻኢ ብዛዕባ’ቲ ግብረ-ሽበራ ንምቅላስ ብንግስነት ስዑዲ ዓረብ ዝተወስደ ተበግሶ” ብዝብል ኣርእስቲ ብ 21 ታሕሳስ ዝወጸ ኣርባዕተ መስመር ዝንውሓቱ መግለጺ ቃል ንቓሉ ከምዚ ይብል፣-

“ከም ኣካል ናይ’ቲ ሰፊሕ ስትራተጅያዊ ምትሕብባር ኣንጻር ግብረ-ሽበራን ስርዓት-ኣልቦነትን ብምህናጽ – ሰላምን ጸጥታን ዞባና ንምውሓስ ዝካየድ ዘሎ ጻዕሪ፡ መንግስቲ ኤርትራ፡ ንግስነት ስዑዲ ዓረብ ዝወሰደቶ ተበግሶ ምቛም ኪዳን ኣንጻር ግብረ-ሽበራ፡ ኣገዳሲ ስጒምቲ ንሰላምን ምርግጋእን ዞባናን ዓለምን ምዃኑ ስለዝኣምን፡ ብዘይ ዕቃበ ከምዝድግፎን ምስኡ ክተሓባበር ቅሩብ ምዃኑን የረጋግጽ።”

ውልቀመላኺ ኢሳይያስ ኣፈወርቂ ኣብዚ ቅንያት’ዚ ስዑዲ ዓረብ በጺሑ ናብ ኤርትራ ድሕሪ ምምላሱን ምስ ኣሚር ኢሚት ኢማራት ዓረብ ኣብ ኣስመራ ድሕሪ ዝገበሮ ርክብን እዩ ነቲ ጋዜጣዊ መግለጺ ኣውጺኡዎ።

ይኹን እምበር እቲ ሎሚ “…ክተሓባበር ቅሩብ ምዃኑ የረጋግጽ” ኢሉ ንህዝቢ ኤርትራ ዘደናግር ዘሎ ውልቀምልካዊ ስርዓት፣ ቅድሚ ሓያለ ኣዋርሕ ናብ ስዑዲ ዓረብ ኣብ ዝፈጸሞ ዘይእዉጅ ምብጻሕ ንወደብ ዓሰብ ነቲ ብስዑዲ ዓረብ ተመሪሑ ኣብ የመን ኣንጻር ሽዓውያን ተቓወምቲ ሑቱ ደብዳብ ኣየርን ናይ መሬት ውግእን ከካይድ ዝጸንሐ ምሕዝነት ናይ ሱኒ ሃገራት ዓረብ ከምዘወፈዮ ብ18 ሓምለ ናይዚ ዓመት’ዚ ብዜና ኣሰና ተገሊጹ እዩ። ሞኒተሪንግ ግሩፕ ውድብ ሕቡራት ሃገራት ኣብ ወርሒ ጥቅምቲ 2015 ኣብ ዘውጽኦ ጸብጻብ ‘ውን፣ ስርዓት ኢሳይያስ ልኡላዊ መሬት፣ ባሕርን ክሊ ኣየርን ኤርትራ ኣንጻር ሽዓውያን ተቓወምቲ የመን ኣብ ዝካየድ ዘሎ ወተሃደራዊ ዘመተ የውዕሎ ከምዘሎ ምግላጹ ይፍለጥ። እቲ ስርዓት ወተሃደራት ኤርትራ ከይተርፈ ኣብቲ ውግእ የሳትፍ ምህላዉ ዝገለጻ ጋዜጣታት ማእከላይ ምብራቕ ‘ውን ኣለዋ።

ምልካዊ ስርዓት ኢሳይያስ እምብኣር ሓደ መንፈቕ ንዘሕለፈ ምስጢራዊ ምሕዝነት እዩ ሕጂ ይፍጸም ከምዘሎ ኣምሲሉ ብምግላጽ ንህዝቢ ኤርትራ ከደናግር ዝፍትን ዘሎ።

እቲ ገንዘባዊ ምወላ ንምምእራርን ካብ ተነጽሎ ንምድሓንን ብኢደ ወነኑ ዝወሰዶ ስጉምቲ፣ እቲ ስርዓት፣ ካብ ረብሓ ህዝቢ ኤርትራን ከምዚ ዝኣመሰለ ዘተን መጽናዕትን ዘይተኻየደሉ ተኣፋፊ ስጉምቲ ዘምጽኦ ሓደጋ ሳዕቤናትን፣ ምንዋሕ ዕድመ ምልካዊ ስርዓቱ ጥራይ ከምዘገድሶ ዳግም ዘረጋግጽ እዩ።

ውልቀመላኺ ኢሳይያስ፣ ኣብ 2003፣ ኣመሪካ ዝመራሒተን መሓዙት ኣብ ዒራቕ ወራር ኣብ ዝፈጸማሉ እዋን፣ “ካብ ቀደም ዘይተወደአ ኵናት ዶ ንብለኩም ኣይነበርናን፣ ጸገም የለን ኣብ ጎንድኑኹም ኣለና” ኢሉ ብምውርዛይ ብተመሳሳሊ መንገዲ ተሓዊሱዎ ‘ኳ እንተነበረ፣ ድሕሪ ‘ቲ ኵናት ቅልውላው ዒራቕ ዝበኣሰ ህወከት ምስ ኣሳበ ግን፣ ከምዛ ኣጆኹም ዘይበለ ተገምጢሉ “ወራር ዒራቕ” እናበለ ንኣመሪካ ክውንጅልን ክዋራዘን  ከምዝተሰምዐ ዝዝከር ኮይኑ፣ ሕጂ ‘ውን እዚ ብስም “ግብረሽበራ” ድሮ ዝኣተዎ ‘ምሕዝነት’ ነገር ከም ገለ እንተኾይኑ ነዚ ኣመሪካ ዘላትሉ ምሕዝነት ከም ኣመሉ ካብ ምዅናን ዓዲ ከምዘይውዕል ይእመት።

ኣብዚ ህዝቢ ኤርትራ ከስተብህለሉ ዘለዎ ሓደጋ፣ በቶም ኣድራዕ ዝወርዶም ዘሎ ሽዓውያንን መሓዙቶምን ክስዕብ ዝኽእል ሕነን ጽልእን ጥራይ ኣይኮነን። እተን ብወገን ሶርያን ዒራቕን መኣደቢ ተሳኢኑዎ ኣብ ዘሎ ህወከት ከም መወልቲ ናይቲ ኣይሰስ ዝመርሖ ግብረሽበራ ዝሕመያ፣ ሕጂ ልኡላዊ መሬት ኤርትራ ረጊጸን ዘለዋ ስዑዲ ዓረብን ቀጠርን ኣሰረን እንታይ ከምዝገድፍ ዝፍለጥ ስለዘየልቦ ኣብ ቅድሚ ህዝቢ ኤርትራ ዘይርጉጽ ኩነታት ከምዘሎ እዩ።