ምልካዊ ስርዓት ኢሳይያስ፣ ነቶም ኣብ ኤርትራ ዝሕብሕቦም ዘሎ ዕጡቓት ትግራዎት ተቓውምቲ (ደምሒት) ኣብ ዝተፈላለየ ከባቢታት ኣስመራ ብምውፋር ግፋ ከምዘካየደ ክበጽሓና ንዝቐነየ ቀጻሊ ሓበሬታታት እሙናት ምንጭታትና ካብ ኣስመራ ኣረጋጊጾም።

ብመሰረት’ቲ ሓበሬታ፣ እቶም ብ26 ጥቅምቲ ብስርዓት ኢሳይያስ ዝተዋፈሩ ዕሱባት (Mercenaries) ኣብ ዕዳጋ ሓሙስ ከባቢ ወክማ፣ ጎደና ሓርነት (ኮምብሽታቶ) ከባቢ ካራቨልን ክበብ ኣዱሊስን ዝርከቡዎም ከባቢታት ኣስመራ እዮም ግፋ ኣካይዶም።

ብፍላይ ኣብ ክበብ ኣዱሊስን ከባቢ ካራቨልን ናይ ኤውሮጳ ኩዕሶ ጸወታ ኣብ ቴለቪዥን ዝከታተሉ ዝነበሩ ሓያለ መንእሰያት፣ ነቶም “መታወቅያ” እናበሉ ክገፉዎም ዝመጽኡ ኣባላት ደምሒት ብኣእማን ከምዝገጠሙዎም እቲ ሓበሬታ የገንዝብ።

ኢሳይያስ ንኣሃዱታት ደምሒት ኣብ ግፋ ከምዝዋፈሩ ዝገበረሉ ምኽንያት፣ ላዕለዎት ሓለፍቲ ምክልኻል “ህዝቢ ኣብ ከቢድ ሓዘን ከሎ ግፋ ኣይነካይድን ኢና” ኢሎም ንትእዛዙ ስለዘይተቐበሉዎ ምዃኑ ‘ውን እቶም ምንጭታት ሓቢሮም።

እቲ ኩነታት ዘተሓሳሰቦም ተቐማጦ ኣስመራ፣ “ንልዕሊ 20 ዓመታት ዘይሰማዕናዮ ቋንቋ ሰሚዕና” ኢሎም ከስተንትኑ ከለዉ፣ “ቆልዑ፣ ወያነ ይገፉ ኣለዉ” ክብሉ ከምዘምሰዩ፣ እቲ ሓበሬታ የመልክት።

እቲ ብደምሒት ዝተኻየደ ወፈራ ግፋ፣ ድሕሪ ‘ቲ ህዝባዊ ቁጥዐ ደው ‘ኳ እንተበለ፣ ካብ ህዝቢ ሓሊፉ ዋላ ኣብ ማእከሎትን ላዕለዎትን ሓለፍቲ ሰራዊት፣ “መን እዩ ነዚ ትእዛዝ ዘመሓላለፈ” ዝብል ሕቶታት ኣለዓዒሉ ክሳብ ሕጂ መዛረቢ ኮይኑ ከምዘሎ ተፈሊጡ።