ምልካዊ ስርዓት ህግደፍ ናብ ጎረባብቲ ሃገራት ክትሃድሙ ሓሲብኩም ኢሉ ኣብ ናቕፋ ኣሲሩዎም ዘሎ ብዙሓት ትሕቲ ዕድመ ቆልዑ ብለበዳ ሕማም ተጠቒዖም ክንሶም ግቡእ ሕክምናዊ ክንክን ብምስኣኖም ኣብ ኣስጋኢ ኩነታት ከምዝርከቡ ካብ ኤርትራ ዝበጽሓና ሓበሬታ ኣረዲኡ።

እቶም ምልካዊ ስርዓት ኢሳይያስ ኣብ መንደፈራ ንልዕሊ ክልተ ወርሒ ኣሲሩዎም ዝነበረ ‘ሞ፣ ንስድራቤቶም “ኣካዳምያዊ ትምህርቲ ከነስተምህሮም ኢና” ኢሉ ብምትላል ኣብ ዝሓለፈ 3 ሰሙን ናብ ሳሕል (ናቕፋ) ዝወሰዶም ትሕቲ ዕድመ ቆልዑ ብለበዳ ሕማም ተጠቒዖም ምህላዎም ምስ ሰምዑ ስድራቤቶም ሸቐልቀል ይብሉ ከምዘለዉ፣ ባዕሎም ከሐክምዎም ዘቕረቡዎ ጥርዓን ‘ውን ብሰበስልጣን ህግደፍ ኣውንታዊ ምላሽ ከምዘይረኸበ እቲ ሓበሬታ ብተወሳኺ የረድእ።

መብዛሕትኦም ኣቦታት ናይቶም ትሕቲ ዕድመ ቆልዑ ኣብ “ሃገራዊ ኣገልግሎት” ተጸሚዶም ብምህላዎም እቲ ኣሻቃሊ ኩነታት ናይቶም ቆልዑ ኣብ እንግድዓ ናይተን ብቐረባ ዝኣልያኦም ኣዴታት ተጻዒኑ ዓቕለን ኣጻቢበን ዝገብራኦ ሓርቢቱወን ከምዘሎ ‘ውን እቶም ምንጭታት ብተወሳኺ ኣገንዚቦም።

ህዝቢ ብሓፈሻ፣ ብፍላይ ድማ ኣብ ውሽጢ ሃገር ዘለኹም ዜጋታትን ኣባላት ሰራዊትን፣ ደሃይን ኩነታትን ናይዞም ኣቦታት እንከለዉዎም ዘኽቲሞም ዝሳቐዩ ዘለዉ ትሕቲ ዕድመ ቆልዑ ንምፍላጥን ንምድሓኖምን ብኣግኡ ክትንቀሳቐሱ ነዘኻኽር።