ምልካዊ ስርዓት ኣስመራ፣ ንመርመራ መነጸሪ መንነት(DNA) ናይቶም ኣብ ገምገም  ባሕሪ ላምፐዱሳ ብዘሰቅቕ ኩነታት ዝሞቱ 360 ኤርትራውያን ካብ ነፍስወከፍ መቕርብ 150 ኤውሮ ክሽምጥጥ ዝኣለሞ ኣስሓኮ ኣልቦ ውዲት ፈሺሉ።

ጉጅለ ህግደፍ ትርጁማን ኣምሲሉ ዝለኣኾም ሃሱሳት፣ ንኩነታት ናይቶም ብሓዘን ተኾምቲሮም መቕርቦም ንምልላይ ላዕልን ታሕትን ዝብሉ ዝነበሩ ኤርትራውያን  መዝሚዞም፡ መንነት ሬሳ ንምንጻር ገንዘብ ክኸፍሉ ዘካየድዎ ውዲት ብተባዕ ተቓውሞ ኤርትራውያን በርዒኑ፣  ብደም ሰብ ክጻወቱ ዝገበርዎ ፈተነ ምስ ተሳዕረ ካብቲ ቦታ ብሕፍረት ከምዝተባረሩ ተፈሊጡ።

እቲ ጉጅለ ብፈነወ ፕሮፓጋንዳኡ ነቶም ብ3ጥቅምቲ ዝሞቱ ኤርትራውያን ቆልዓ ሰበይትን መንእሰያትን  ዘይሕጋውያን ኣፍሪቃውያን ስደተኛታት ኢሉ ብምጽዋዕ  መንነቶም ክሒዱ፡ ከብቅዕ መነጸሪ መንነት ሬሳ ገንዘብ ምሕታቱ ኣብ ልዕሊ ኤርትራውያን ዜጋታት ደረቱ ዝሓለፈ ንዕቀት ከምዘለዎ ዘመልክት ኢዩ ክብሉ ብዙሓት ቁጠዐኦም ገሊጾም።

ነቶም ንዓለም ብዘሰንበደ ኩነታት ሂወቶም ዝሰኣኑ ግዳያት ላምፐዱሳ፣ መንግስቲ ጥልያን ሃገራዊ ስነስርዓት ቀብሪ ክገብር ቃል ኣትዩ ’ኳ  እንተነበረ፣ ኣብ ኣግሪጀንቶ ዝተባህለት ከተማ ኢጣልያ ዝኽሪ ምዉታን ብምፍጻሙ ተቓውሞ ገጢምዎ ኢዩ። ኣብቲ ስነስርዓት ድማ እቶም ውጻእመዓት ከምዘይተጸንበሩ ይፍለጥ።