ኣሰና (10 ለካቲት 2014)

ምልካዊ መራሒ ስርዓት ህግደፍ ኢሳይያስ ኣፈወርቂ፣ ትማሊ ምሸት ኣብ ዘካየዶ ቃለመጠየቕ፣ ብዘይካ ህግደፍ ኣብ ኤርትራ ፖለቲካዊ ህይወት ክህሉ ኢልካ ዘይሕሰብ ምዃኑ ደጊሙ ብምግላጽ፣ ኣብቲ ብስርቅን ዓመጽን ዝሓዞ ዘይሕጋዊ ስልጣን ናይ ምንባር ገባቲ ሕልሙ ከም ቀደም ኣብ ቦትኡ ምህላዉ ብብድዐ ኣረጋጊጹ።

ንሱ ኣብቲ፣ ኣብ ወረቐት ዝነብሩ ዘይፍጸሙ መደባት ልምዓት እናጸፍጸፈ ከም ቀደሙ ንህዝቢ ብኣጉል ተስፋ ንምትላል ዝፈተነሉ ኣጋጣሚ፣ ኣብ ኤርትራ ብዙሓዊ ፖለቲካ ዶ ዲሞክራሲ ከነተኣታቱ ኢሉ ዝሓልም ሰብ ኣብ ወርሒ ወይ ካልእ ዓለም ዝነበር ክኸውን ኣለዎ ብምባል፣ ንፖለቲካዊ ብዙሕነት ከም ቀደሙ ተጻዋርነት ከምዘይብሉ ዳግም ኣገንዚቡ።

ኢሳይያስ ብተግባር፣ ከምኡ ‘ውን ኣብ ቃለመጠየቓት “ብዘይ ስልጣን ህይወት ኣይረኣየንን እዩ” ክብል ብቓል ምርግጋጹ ደረት ዝሓለፎ ዕብዳን ስልጣን ከምዘለዎ  ድሮ ብሩህ ኳ እንተኾነ፣ ነቶም ኣንጻር ምልካዊ ስርዓት ኢሳይያስ ፊትንፊት ምግጣም ሰልችዩዎም ሓደስቲ ምኽንያታት እናማእረሩ ዝማትኡ ክፋላት ሕብረተሰብና ንየዋህነቶም ኣጸቢቖም ክሓስቡሉ ዘዘኻኽር ንጹር መልኽእቲ ኣለዎ።

ንኢሳይያስ ብቛንቍኡ ምዝራቡ እምበር ምቅብጣር ፋይዳ ከምዘይብሉ ከኣ ክግንዘቡዎ ይግባእ።

ምልካዊ መራሒ ስርዓት ህግደፍ ኢሳይያስ ኣፈወርቂ፣ ብቓላት ኣብ ድርኵዅት ሓድሽ መድረኽ ኣለኹ ክብል ኳ እንተፈተነ፣ ብህዝቢ ኤርትራ ተፈንፊኑ፣ ብዓለም ተነጺሉ፣ ድሕረይ ሳዕሪ ኣይብቆላ ብዝብል ቅብጸታዊ ኩነት ንሃገርና ኣብ ገምገም ውድቀት ኣብጺሑዋ ከምዝርከብ ካብ ዝኾነ እዋን ንላዕሊ ብሩህ ኮይኑ ‘ሎ።

ክቡራት ተኸታተልቲ ኣሰና፣ ኣብዚ ትማሊ ዘካየዶ ቃለመጠየቕ ዘተኮረ “ ሰኽራም ሲ ናይ ልቡ ይዛረብ” ዘርእስቱ ኣብ ናይ ሎሚ 10 ለካቲት ድምጺ ኣሰና ዝተፈነወ መደብ  ክትከታተሉ ነዘኻኽረኩም።