ኣብ ቃልሲ ንናጽነት ኤርትራ ካብ 1971 ኣትሒዙ ብተወፋይነት ዝተጋደለ፣ ሜጀር ጀነራል ገረዝጊሄር ዓንደማርያም (ውጩ) ብሕማም ክሳቐ ድሕሪ ምጽናሕ ዓሪፉ።

እቲ ኣብ ግዜ ገድሊ ናጽነት ኤርትራ ምእንቲ ህዝቡ ሃገሩን ብጅግንነት ዝተዋግአን ዘዋግአን ውጩ፣ ከም መብዛሕትኦም ጀነራላት ኤርትራ፣ እቲ ሓራ ዘውጽኦ ህዝቡ ብውልቀምልካዊ መራሒ ህግደፍ ኢሳይያስ ኣፈወርቂ እናተጨፍጨፈን እናጠፍአን ከሎ ግን፣ ናይ ቀደም ጅግንነቱ ክደግም ኣይከኣለን፣ በንጻሩ ክሳብ ዕለተ ሞቱ መጋበርያ ምልኪ ኮይኑ እዩ ጸኒሑ።

ከምቲ ቅድሚ ሒደት መዓልታት ኣብ ዜና ኣሰና ዝጠጠቕሰ፣ ውልቀመላኺ ኢሳይያስ ኣፈወርቂ፣ ሜጀር ጀነራል ገረዝጊሄር ዓንደማርያም (ውጩ)፣ ብሕማም ተኻኢሉ ሎሚ ጽባሕ እናተባህለ ከሎ፣ ሒደት መዓልታት ቅድሚ ሞቱ ከም ሓለቓ ስታፍ ሓይልታት ምክልኻል ኤርትራ ምሻሙ ኸኣ፣ ንምዉት ኣእምሮ ናይቲ ቀልቡ ስሒቱ ዘሎ ኢሳይያስ ዘመልክት፣ ንህዝቢ ኤርትራን ሓይልታት ምክልኻሉን ዘስተናዕቕ ጽዩፍ ተግባር እዩ።